ނަތަންޔާހޫއަށް އަމާޒުކޮށް އަނެއްކާވެސް ހަމަލާއެއް ދޭން އުޅުނު ކަމުގެ ތުހުމަތު

އަނިޔާވެރިކަމުގައި ހައްދުފަހަނަ އަޅާފައިވާ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަށް އަމާޒުކޮށް އަނެއްކާވެސް ހިޒްބުﷲ އިން ހަމަލާއެއް ދޭން އުޅުނުކަމުގެ ތުހުމަތު އިޒްރޭލު އަސްކަރިއްޔާއިން ކޮށްފިއެވެ.

ނަތަންޔާހޫ އަށް ހަމަލާދޭން އުޅުނުކަމުގެ ތުހުމަތު ހިޒްބުﷲ އަށް ކޮށްފައި މިވަނީ، ހޮނިހިރު ދުވަހު އިޒްރޭލުގެ ސެސަރިޔާގައި ހުންނަ ބޮޑުވަޒީރު ބެންޖަމިން ނަތަންޔާހޫގެ ގެކޮޅު ކައިރިއަށް ދެ ފްލެއަރ ވެއްޓުނު ކަމަށް އިޒްރޭލުގެ ސަލާމަތީ ޚިދުމަތްތަކުން ބުނުމާ ގުޅިގެންނެވެ.

މި ފްލެއަރ ތައް ދޫކޮށްލީ ކޮން ބައެއްކަން މިހާތަނަށް އެނގިފައެއް ނުވެއެވެ.

އިޒްރޭލު ފުލުހުންނާއި ޝިން ބެޓް އިންޓަރނަލް ސެކިއުރިޓީ އޭޖެންސީން އެކުގައި ނެރުނު ބަޔާނެއްގައި ބުނެފައިވަނީ "ބޮޑުވަޒީރުގެ ގެކޮޅުގެ ގޯތިތެރެއަށް ދެ ފްލެއަރ ވެއްޓިފައިވާ،" ކަމަށާއި "ހާދިސާ ހިނގި ވަގުތު ބޮޑުވަޒީރު އާއި އޭނާގެ އާއިލާ ގެކޮޅުގައި ނޫޅުއްވާ،" ކަމަށެވެ.

"މި މައްސަލައިގެ ތަޙުޤީޤު ކުރިއަށްދާ ކަމަށާއި، މިއީ ސީރިއަސް ހާދިސާއެއް އަދި ނުރައްކާތެރި އިޝާރާތެއް،" ކަމަށް އެ ބަޔާނުގައި އިތުރަށް ބުނެފައިވެއެވެ.

މި ހާދިސާއާ ގުޅިގެން އިޒްރޭލުގެ ރައީސް އިސްހާޤު ހަރޒޮގް ވަނީ މި ހާދިސާ ކުށްވެރިކުރައްވާ، އަނިޔާވެރިކަން އިތުރުވެދާނެކަމުގެ އިންޒާރު ދެއްވާފައެވެ.

"ދެންމެ ޝިން ބެޓްގެ ވެރިޔާއާ ވާހަކަދައްކާ، މި ހާދިސާއާ ގުޅޭގޮތުން ވީހާވެސް އަވަހަކަށް ތަހުގީގުކޮށް، ޒިންމާވާންޖެހޭ ފަރާތްތަކާމެދު ފިޔަވަޅު އެޅުމުގެ މުހިންމުކަން ފާހަގަކޮށްފައިވާނެ،" ހަރޒޮގް އެކްސްގައި ކުރެއްވި ޕޯސްޓެއްގައި ވިދާޅުވިއެވެ.

މި ހާދިސާ ހިނގާފައި މިވަނީ އޮކްޓޯބަރު 19 ގައި ބޮޑުވަޒީރު ނަތަންޔާހޫގެ ގެކޮޅަށް އަމާޒުކޮށް ޑްރޯން ހަމަލާއެއް ދީފައިވަނިކޮށެވެ. އެ ހަމަލާގެ ޒިންމާ ފަހުން ނަގާފައިވަނީ އީރާނުގެ އެހީތެރިކަން ލިބިގެން ހިންގާ ހިޒްބުﷲ ޖަމާއަތުންނެވެ.

މިހަމަލާއާ ގުޅިގެން ނަތަންޔާހޫ ވެސް ތުހުމަތުކުރައްވާފައި ވަނީ ހިޒްބުﷲ އިން އޭނާ އާއި އޭނާގެ އަނބިކަނބަލުން އަވަހާރަކޮށްލަން މަސައްކަތްކުރި ކަމަށެވެ.

ހިޒްބުﷲއިން އިޒްރޭލަށް ހަމަލާދޭން ފަށާފައިވަނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން އިޒްރޭލަށް ދިން ހަމަލާއާ ގުޅިގެން، ހަމާސްއަށް އެހީތެރިވުމުގެ ގޮތުންނެވެ.

ލުބުނާނުގެ އިސް އޮފިޝަލުން މައުލޫމާތުދޭ ގޮތުގައި، މިދިޔަ އަހަރުގެ އޮކްޓޯބަރު މަހުން ފެށިގެން ހިޒްބުﷲ އާއި އިޒްރޭލާ ދެމެދު ކުރަމުންދާ ހަނގުރާމާގައި މަދުވެގެން 3،380ށްވުރެ ގިނަ މީހުން ވަނީ މަރުވެފައެވެ.

ބުރާސްފަތި ދުވަހު ވޯލްޑް ބޭންކުން ބުނެފައިވާ ގޮތުގައި މި ހަނގުރާމައިގެ ސަބަބުން އިގްތިސާދި ގޮތުން ލުބުނާނަށް ލިބުނު ގެއްލުން މަދުވެގެން 5 ބިލިއަން ޑޮލަރަށް އަރާ ކަމަށާއި އުމްރާނީ ގޮތުން ލިބިފައިވާ ގެއްލުމުގެ އަގު އެތަށް ބިލިއަނަކަށް އަރާކަމަށެވެ.