ޓޫރިޒަމް ވިޔަފާރިތަކުން ޑޮލަރު މާރުކުރަން މަޖުބޫރުކުރަން ރައީސް ނަޝީދު ދެކޮޅު ހައްދަވައިފި
"އަޅުގަނޑުގެ ވިސްނުމަކީ ސަރުކާރަކަށް މީހުންގެ އަމިއްލަ ފައިސާ ބޭނުންކުރާނެ ގޮތް ކަނޑައެޅުމުގެ ބާރެއް ނޯންނާނެ. ރިސޯޓު ވެރިން އެ ފަރާތްތަކުގެ ޓެކްސް ދައްކާ. އަދި ބާކީ އޮންނަނީ އެ ފަރާތްތަކުގެ އިންވެސްޓްމަންޓުގެ ފައިދާ. އެ ފައިސާ ރައްކާކުރާނެ ނުވަތަ ހޭދަކުރާނެ ގޮތް ނިންމަންވާނީ އެ ފަރާތްތަކުން،" ނަޝީދު ވިދާޅުވިއެވެ.
ކުރީގެ ރައީސް، މުޙައްމަދު ނަޝީދު
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޓޫރިޒަމް ވިޔަފާރިތަކުން އެ ފަރާތްތަކަށް ލިބޭ ބޭރު ފައިސާގެ ބައެއް ރާއްޖޭގެ ބޭންކުތަކުގައި ޖަމާކޮށް ދިވެހި ރުފިޔާ އަށް މާރު ކުރަން ލާޒިމުކުރާ ގަވާއިދާ ކުރީގެ ރައީސް މުޙައްމަދު ނަޝީދު ދެކޮޅު ހައްދަވައިފިއެވެ.
ކުއްލި ގޮތަކަށް އެމްއެމްއޭ އިން، ކަމާބެހޭ ފަރާތްތަކުގެ މަޝްވަރާއެއް ނެތި އެކުލަވާލާ ތަންފީޒު ކުރަންފެށި ގަވައިދުގެ ދަށުން ރިސޯޓުތަކާއި އެހެނިހެން ފަތުރުވެރިކަމުގެ ވިޔަފާރިތަކުން ކޮންމެ ފަތުރުވެރިއަކަށް 500 އެމެރިކާ ޑޮލަރު ރާއްޖޭގެ ބޭންކެއްގައި މާރުކުރަން ލާޒިމުވެއެވެ.
ރިސޯޓު އޮޕަރޭޓަރުން ބުނަމުން އަންނަނީ މިއީ ތަންފީޒު ކުރަން ފަސޭހަ ގަވައިދެއް ނޫންކަމަށާއި، ހުރިހާ ޓެކްސް އެއް ޑޮލަރުން ދެއްކުމަށްފަހު އިތުރަށް ރިސޯޓުތަކުން ޑޮލަރު މާރުކުރަން މަޖުބޫރު ކުރުވުމަކީ ހަމަ ޖެހޭ އިންސާފުވެރި ކަމެއް ނޫން ކަމަށާއި، އެކަމުގެ ސަބަބުން ފަތުރުވެރިކަމުގެ އިންޑަސްޓްރީ އަށް ހީނަރުކަން އައިސް، އިންވެސްޓަރުންގެ ކޮންފިޑެންސް ގެއްލި، މުޅި ރާއްޖޭގެ އިގްތިސާދަށް ފޫނުބެއްދޭ ވަރުގެ ގެއްލުން ވެދާނެ ކަމަށެވެ. ހަމަ އެކަނި ފަތުރުވެރިކަމުގެ ދާއިރާ އަށް މި ގަވައިދު ޓާގެޓް ކުރުމަކީ ވެސް "ބޭއިންސާފު" ކަމަށް ރިސޯޓު އޮޕަރޭޓަރުން ވަނީ ބުނެފައެވެ.
ފަތުރުވެރިކަމުގެ ވިޔަފާރިވެރިންގެ ވަޓްސްއެޕް ގްރޫޕަކަށް ފޮނުއްވި މެސެޖެއްގައި ނަޝީދު ވިދާޅުވެފައިވަނީ ސަރުކާރުން އަމާޒު ހިފަންވާނީ އިތުރު މާލީ ކޮންޓްރޯލްތައް ވިޔަފާރިތަކުގެ މައްޗަށް ތަންފީޒު ކުރުމުގެ ބަދަލުގައި، މިހާރުވެސް ނަގަމުންދާ ޓެކްސް ފަރުވާތެރިކަމާ އެކު ނެގުމަށް ކަމަށެވެ. ކުރީގެ ރައީސް އިތުރަށް ވިދާޅުވީ ރިސޯޓު ވެރިންނަށް އެ ފަރާތްތަކުގެ ޓެކްސް ދެއްކުމަށްފަހު ލިބޭ އާމްދަނީ ބޭނުން ކުރުމުގެ މިނިވަންކަން އޮންނަންވާނެ ކަމަށެވެ.
"އަޅުގަނޑުގެ ވިސްނުމަކީ ސަރުކާރަކަށް މީހުންގެ އަމިއްލަ ފައިސާ ބޭނުންކުރާނެ ގޮތް ކަނޑައެޅުމުގެ ބާރެއް ނޯންނާނެ. ރިސޯޓު ވެރިން އެ ފަރާތްތަކުގެ ޓެކްސް ދައްކާ. އަދި ބާކީ އޮންނަނީ އެ ފަރާތްތަކުގެ އިންވެސްޓްމަންޓުގެ ފައިދާ، އެ ފައިސާ ރައްކާކުރާނެ ނުވަތަ ހޭދަކުރާނެ ގޮތް ނިންމަންވާނީ އެ ފަރާތްތަކުން،" ނަޝީދު ވިދާޅުވިއެވެ.
ރައީސް ނަޝީދު އިތުރަށް ފާހަގަ ކުރެއްވި ގޮތުގައި ގަވާއިދުތަކުގެ ޒަރީއާއިން ބޭރު ފައިސާގެ ރިޒާވް އިތުރުކުރުމަށް ކުރެވޭ މަސައްކަތްތައް ކުރީގައިވެސް ކާމިޔާބުވެފައި ނުވާ ކަމަށެވެ. އަދި ވިޔަފާރިތަކުން ފައިސާ ގައުމުގައި ބެހެއްޓުމަށް ނިންމަނީ ގާނޫނުތަކަށްވުރެ ބޮޑަށް ވިޔަފާރީގެ އިތުބާރު އޮތް މިންވަރަށް ބަލައިގެން ކަމަށް ފާހަގަކުރެއްވިއެވެ.
ނަޝީދު އިތުރަށް ފާހަގަ ކުރެއްވީ ދިވެހިރާއްޖޭގެ ދަރަނި ވަރަށް ނާޒުކު ހާލަތެއްގައި އޮތް ކަމަށާއި މިކަމަށް ހައްލެއް ހޯދޭނީ ދަރަނި ރީސްޓްރަކްޗަރ ކުރުމުން އެކަނި ކަމަށެވެ.
ނަޝީދު ވިދާޅުވި ގޮތުގައި މިހާރުގެ ސަރުކާރަށް މިއަހަރު 500 މިލިއަން އެމެރިކާ ޑޮލަރު އަނބުރާ ދައްކަން ޖެހޭއިރު، އަންނަ އަހަރު އިތުރު 1 ބިލިއަން އެމެރިކާ ޑޮލަރު ދައްކަން ޖެހޭނެއެވެ. އަދި މިކަމަކީ ހަމައެކަނި ޓެކްސް އިތުރު ކޮށްގެން ހައްލުކުރެވޭނެ ކަމެއް ނޫން ކަމަށް ނަޝީދު ވިދާޅުވިއެވެ.
ރިސޯޓު އޮޕަރޭޓަރުން ބުނަމުން އަންނަނީ ސަރުކާރުން ބޭރު ފައިސާގެ ގަވައިދު އެކުލަވާލީ ކަމާބެހޭ ފަރާތްތަކާ މަޝްވަރާކުރުމެއް ނެތި ކަމަށާއި، އެގޮތުން އެކުލަވާލާ އަމަލު ކުރަން ލާޒިމު ކުރި ގަވައިދަކީ "ހަގީގަތާ ދުރު" އެއްޗެއް ކަމަށެވެ.
