މަޑިދަށުން 4 ލައްކައަށްވުރެ ގިނަ ފައިސާ ނެގިކަމަށް ބުނާ ޖަހަންގިރު އާލަމް ދޫކޮށްލައިފިއެވެ.

ފުލުހުން އެދިގެން އޭނާ ދޫކޮށްލާފައިވަނީ ކްރިމިނަލް ކޯޓުންނެވެ. އަދި އޭނާ ބަންދުން ދޫކޮށްލާފައިވަނީ ޝަރުތުކުރުމަށްފަހުއެވެ.

ޖަހަންގިރު ހައްޔަރުކޮށްފައިވަނީ ސައިކަލެއްގެ މަޑި ދަށުން 442،750 ރުފިޔާ ވަގަށް ނެގި މައްސަލައިގައި ސެޕްޓެމްބަރު މަހުގެ 12 ވަނަ ދުވަހުއެވެ.

އޭނާ ބަންދުން ދޫކޮށްލާފައިވާއިރު، ބުރާސްފަތި ދުވަހު އޭނާގެ ބަންދުގެ މުއްދަތު އިތުރުކުރުމަށް ގެންގޮސް ބަންދުގައި ބަހައްޓަން ބޭނުންވާ ސަބަބެއްގެ ގޮތުގައި ފުލުހުން ހަވާލާދީފައިވަނީ ޝަރީއަތްކުރުމާއި ބެހޭ ޖިނާއީ އިޖްރާއަތުގެ ގަވައިދަށް ރިއާޔަތްކޮށެވެ.

ބަންދުން ދޫކޮށްލި އަމުރުގައި ބުނެފައިވަނީ މި މައްސަލައިގައި އިތުރަށް ކުރަންހުރި ކަންތައްތަކުގެ ގޮތުގައި ތަހުގީގުކުރާ ފަރާތުގެ އިގްރާރުގައި ބަޔާންކޮށްފައިވަނީ ރިޕޯޓްތަކެއް ތައްޔާރުކުރުމާއި، ޕީޖީ އޮފީހާ މަޝްވަރާކޮށް ބައެއް ކަންކަން ސާފުކުރުން ކަމުގައިވާއިރު، މައްސަލައިގައި ލިބިފައިވާ އަދި ލިބެންހުރި ހެކިތަކަށް ބަލާއިރު، މީނާއަށް އެ ކަންކަމަށް ވާރު ފޯރުވިދާނެކަމަށް ނުބެލޭ އަދި މައްސަލައިގައި ހެކިބަސް ދޭން ތިބި މީހުންނަށް ނުފޫޒެއް ފޯރުވުމުގެ އިހުތިމާލު އޮތްކަމަށް ދަލާލަތުކޮށްދޭ ކަމެއް މި މައްސަލައިގެ ތެރެއިން ފެންނާކަށް ނެތް ކަމަށެވެ.

ޖަހަންގިރުގެ ހައްޔަރު/ބަންދު ރެކޯޑުގެ ގޮތުގައި 2012 ވަނަ އަހަރުގެ ރެކޯޑެއް އެބައޮތެވެ. އަދި މިއީ ވައްކަމުގެ މައްސަލައިގައި ހައްޔަރުކުރެވުނު ފަހުން ބަންދާމެދު ގޮތެއް ނިންމުމަށް ހާޒިރުކުރެވުނު 8 ވަނަ ފަހަރެވެ. އަދި މިހާތަނަށް 60 ދުވަސް ބަންދުގައި ބަހައްޓާފައިވެއެވެ.