ރައީސް މުއިއްޒު ހުންނެވީ ރައްޔިތުންގެ ފަޅިއަކު ނޫން، ޓުއަރިޒަމްގެ ބޮޑުން ސަރުކާރާއި ފާޅުގައި ދެކޮޅުވީ އެހެންވެ - ރައީސް ޔާމީން
ސަރުކާރުން ކުރާ ކަންކަމާއި ޓުއަރިޒަމް އިންޑަސްޓްރީގެ ހުރިހާ އިސް މީހުން ފާޅުގައި ސަރުކާރާއި ދެކޮޅު ހަދަމުންދާ ކަމަށް ޔާމީން ވިދާޅުވި
ކުރީގެ ރައީސް އަބްދުﷲ ޔާމީން
ރައީސް ޑރ.މުހައްމަދު މުއިއްޒު ހުންނެވީ ރައްޔިތުން ތިބި ފަޅިއަކު ނޫން ކަމަށާއި ޓުއަރިޒަމްގެ ބޮޑުން ސަރުކާރާއި ފާޅުގައި ދެކޮޅުވީ އެހެންވެގެން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފްގެ ޖަލްސާގައި ވާހަކަދައްކަވަމުން، ކުރީގެ ރައީސް ޔާމީން ވިދާޅުވީ ރައީސް މުއިއްޒު ގެންދަވަނީ އެ މަނިކުފާނު ހުންނެވީ ރައްޔިތުންގެ ފަޅީގައި ކަަމަށް ފާހަގަކުރައްވަމުން ކަމަށެވެ. އެހެންނަމަވެސް ރައްޔިތުން ތިބީ މާޔޫސްކަމާއި ނިކަމެތިކަމުގައި ކަމަށާއި ރައްޔިތުން ތިބީ ނޭވާ ހޮޅިއަށް އެޅިފައި ކަމަށް އެ މަނިކުފާނު ވަނީ ސިފަކުރައްވާފައެވެ. ރައީސް މުއިއްޒު އާއި އެކުގައި މަސައްކަތް ކުރަން ތިބީ ސަރުކާރުގައި ތިބި މަދު ބައެއް ކަމަށް ފާހަގަކުރައްވާ އޭގެ ތެރެއިން ބައެއް މީހުންގެ ނަންތައް ރައީސް ޔާމީން ވަނީ ފާހަގަކުރައްވާފައެވެ. ސަރުކާރުގައި ހިމެނޭ ސިޔާސީ ބަޔަކު ފައިސާ ނަގައިގެން ފައިސާ ބޭނުންކުރާ ވާހަކަ މިހާރުވެސް އިވޭ ކަމަށާއި އެއީ ރައްޔިތުންގެ ފަޅީގައި ތިބުންތޯ ރައީސް ޔާމީން ވަނީ ސުވާލުކުރައްވާފައެވެ. އެ މަނިކުފާނުވެސް ބޭނުންފުޅުވަނީ ރައްޔިތުންގެ ފަޅީގައި ހުންނަވަން ކަމަށް ވެސް ރައީސް ޔާމީން ވަނީ ވިދާޅުވެފައެވެ. ސަރުކާރުގައި ތިބި މީހުން ހިންގާ ކޮރަޕްޝަންގެ ޢަމަލުތައް ރައީސް މުއިއްޒު އަށް ފެނިވަޑައި ނުގަންނަވާ ކަމަށް ރައީސް ޔާމީން ވަނީ ވިދާޅުވެފައެވެ.
ސަރުކާރުން ކުރާ ކަންކަމާއި ޓުއަރިޒަމް އިންޑަސްޓްރީގެ ހުރިހާ އިސް މީހުން ފާޅުގައި ސަރުކާރާއި ދެކޮޅު ހަދަމުންދާ ކަމަށް ޔާމީން ވިދާޅުވިއެވެ. ރައީސް ޔާމީން ވަނީ ޓުއަރިޒަމް ސިނާއަތުގައި އިސްކޮށްތިއްބެވި ކޮލިގޭ އުމަރު މަނިކުމެން ފަދަ ޗަމްޕާ މުހައްމަދު މޫސާ އަދި އަފީފްމެން ފަދަ ބޭބޭފުޅުންނަކީ ގައުމަށް ތަނަވަސްކަން ގެނެސްދެއްވި މޭސްތިރީން ކަަމަށް އެ މަނިކުފާނު ވިދާޅުވިއެވެ. އެހެންކަމުން އެ ބޭފުޅުން ރައްޔިތުންނާއި ދެކޮޅު ފަޅީގައި ތިއްބަވާނެ ކަމަށް ނުބެލެވޭ ކަމަށް ރައީސް ޔާމީން ވަނީ ވިދާޅުވެފައެވެ.
ރާއްޖޭގެ ޓޫރިސްޓް ފެސިލިޓީތަކަށް އަމާޒުކޮށް، އެ ފެސިލިޓީތަކަށް ލިބޭ ޑޮލަރު މަޖުބޫރުކޮށްގެން ރާއްޖޭގެ ބޭންކުތަކަށް ޖަމާކޮށް، ރިސޯޓަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭ ގޮތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ނުކުރާނޭ ކަމަށް ރާއްޖޭގެ ބޮޑެތި ރިސޯޓު ގްރޫޕްތަކުން މި ދަނޑިވަޅުގައި އަންނަނީ ބުނަމުންނެވެ.
ޑޮލަރުގެ ތާށިކަން ހައްލު ކުރަން ކަމަށް ބުނެ އެމްއެމްއޭ އިން ވަރަށް ކުއްލި ގޮތަކަށް ކަމާ ބެހޭ ފަރާތްތަކުގެ މަޝްވަރާއެއް ނެތި ގަވައިދަށް މި ގެނައި ބަދަލަށް ރިސޯޓުތަކުން ދެކޮޅު ހަދަމުން ދިއުމާއެކު މި އައު ގަވައިދު ބޭކާރު އެއްޗަކަށް ވެދާނެ ކަމުގެ ހީތައް ވަނީ އިތުރުވެފައެވެ. އެ ވާހަކަ ހޫނުވެފައި ވަނިކޮށް ރައީސް މުއިއްޒު ވަނީ އެމަނިކުފާނު ހުންނެވީ ރައްޔިތުންގެ ފަޅީގައި ކަމަށް ވިދާޅުވެ ޓްވީޓެއް ކުރައްވާފައެވެ.
