ފްރާންސް ޤައުމީ ޓީމުގެ ސްކޮޑުން ކެޕްޓަން ކީލިއަން އެމްބާޕޭ އުނިކޮށްފައިވާތީ، އެކަމާ ގުޅޭ ސުވާލު ކުރުމުން، އެމްބާޕޭގެ ވާހަކަ ނުދެއްކުމަށް އެ ޓީމުގެ ކޯޗު ޑިޑިއޭ ޑެޝޯމްޕްސް އެދިއްޖެ އެވެ.

ބައިނަލްއަޤުވާމީ ބްރޭކުގައި ފްރާންސް އިން ދެ މެޗެއް ކުޅޭނެ އެވެ. އެއީ މި މަހުގެ 15 ވަނަ ދުވަހު އިޒްރާއީލާ ދެކޮޅަށް ކުޅޭ މެޗާއި، އަދި 18 ވަނަ ދުވަހު އިޓަލީއާ ދެކޮޅަށް ކުޅޭ މެޗެވެ. އެ ދެ މެޗަށް ފްރާންސް އިން އެކުލަވާލި ސްކޮޑުން އެމްބާޕޭ އަށް ފުރުސަތު ދީފައެއް ނުވެ އެވެ. ފްރާންސްގެ ޓީމުން އެމްބޭޕާ އުނި ކުރަން ނިންމާފައި ވަނީ އޭނާއާ ވެސް މަޝްވަރާ ކުރުމަށްފަހު ކަމަށް ޑެޝޯމްޕްސް މީގެ ކުރިން ވަނީ ބުނެފަ އެވެ.

އެކަމާ ގުޅޭ ގޮތުން ދާދި ފަހުން ވެސް ވަނީ ޑެޝޯމްޕްސްއާ ސުވާލު ކޮށްފަ އެވެ. އެގޮތުން ޓީމުގައި އެމްބާޕޭ ނުހިމެނީ ކީއްވެގެންތޯ ވަނީ އޭނާއާ ސުވާލު ކޮށްފަ އެވެ. އެ ސުވާލާ ގުޅިގެން ޑެޝޯމްޕްސް ބުނީ، އެމްބާޕޭ ޓީމުގައި ނުހިމެނުމުން އޭނާއާ އެ ސުވާލު އެތައް ފަހަރަކު، އެތައް ގޮތަކަށް އަމާޒު ކުރަމުން އަންނަ ކަމަށެވެ. ޑެޝޯމްޕްސް ބުނީ އެކަމާ ގުޅިގެން އޭނާ ބުނަން ޖެހޭ ވާހަކަ ބުނެފައިވާނެ ކަމަށެވެ. ފްރާންސް ޓީމުގައި މިހާރު ވެސް 23 ކުޅުންތެރިން ތިބޭނެ ކަމަށާއި، އިތުރަށް އެ ވާހަކަ ދައްކަން ބޭނުން ނުވާ ކަމަށް އޭނާ ބުންޏެވެ. އަދި އޭނާ ބުނީ ފްރާންސް ޓީމުގައި އެމްބާޕޭ ނެތް ކަމަށާއި، މިވަގުތު އެމްބާޕޭއާ ގުޅޭ ވާހަކަ ނުދެއްކުން އެދޭ ކަމަށެވެ.

މިއަހަރުގެ އޮކްޓޫބަރު މަހުގެ ތެރޭގައި ނޭޝަންސް ލީގުގައި ފްރާންސް އިން ކުޅުނު ދެ މެޗަށް އެކުލަވާލި ސްކޮޑުން ވެސް އެމްބާޕޭ އަށް ފުރުސަތު ނުދެ އެވެ. އެއީ އޭނާ އަށް ލިބުނު އަނިޔާއެއްގެ ސަބަބުން މުޅިން ރަނގަޅު ނުވާތީ އެވެ. އެ ފަހަރު އެމްބާޕޭ އަށް ވަނީ އެ ދެ މެޗު ގެއްލިފަ އެވެ. އޭގެ ފަހުން މިފަހަރުގެ ސްކޮޑުގައި އެމްބާޕޭ ހިމެނޭނެ ކަމަށް ބެލެވުނު ނަމަވެސް، މިފަހަރު ވެސް އޭނާ އަށް ފުރުސަތު ނުދިނީ އަނިޔާގެ ސަބަބުން ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.