މިވަގުތު އޭނާގެ ވިސްނުން ހުރީ އަނިޔާ އިން ރިކަވާ ވުމަށް ކަމަށާއި، އިތުރު އެހެން ކަމަކަށް އެއްވެސް ވިސްނުމެއް ނެތް ކަމަށް، މެންޗެސްޓަރ ސިޓީ އަށް ކުޅެމުން އަންނަ ސްޕެއިންގެ ރޮޑްރީ ބުނެފި އެވެ.
އޭނާ މިހެން ބުނީ މެންޗެސްޓަރ ސިޓީ ގައި އޭނާގެ މުސްތަޤުބަލާ ގުޅޭ ގޮތުން ސުވާލު ކުރުމުންނެވެ. އެގޮތުން ސިޓީ އާއެކު އޭނާ ސޮއި ކޮށްފައިވާ އެއްބަސްވުން އައު ކުރުމާ ގުޅޭ ގޮތުން ސުވާލު ކުރުމުން ރޮޑްރީ ބުނީ، މިހާތަނަށް އައިއިރު އައު އެއްބަސްވުމެއްގެ ވާހަކަ ސިޓީ އާއެކު ދައްކާފައި ނުވާނެ ކަމަށެވެ. އެކަމާ ގުޅޭ އެއްވެސް މަޝްވަރާއެއް ފެށި ނުވާކަން ފާހަގަކޮށް ރޮޑްރީ ބުނީ، އޭނާ ހުރީ އަނިޔާގައި ކަމަށެވެ. އެހެންކަމުން ސިޓީގެ އެއްބަސްވުން އައު ކުރުމަކީ މިވަގުތު އޭނާ އިސްކަން ދޭ ކަމެއް ނޫން ކަމަށް ވެސް ރޮޑްރީ ބުންޏެވެ. އޭގެ ބަދަލުގައި އޭނާ ބޭނުން ވަނީ އެންމެ ފުރިހަމަ އަށް އަނިޔާ އިން ރިކަވާ ވުމަށް ކަމަށާއި، އެއަށްފަހު ކަންތައް ވާނެ ގޮތެއް ބަލަން ޖެހޭނެ ކަމަށް ރޮޑްރީ ބުންޏެވެ.
ރޮޑްރީ އަށް އަނިޔާވެފައި ވަނީ މިއަހަރުގެ ސެޕްޓެމްބަރު މަހުގެ ތެރޭގަ އެވެ. އެގޮތުން އިނގިރޭސި ޕްރިމިއާ ލީގުގައި ސިޓީގެ އަމިއްލަ ދަނޑުގައި އެ ޓީމުން އާސެނަލާ ދެކޮޅަށް ކުޅުނު މެޗުގައި އޭނާ އަށް ވަނީ އަނިޔާވެފަ އެވެ. އެ އަނިޔާގެ ސަބަބުން މިހާރު ރޮޑްރީ ހުންނަނީ ކުޅުމާ ދުރުގަ އެވެ. އަދި އޭނާ އަންނަނީ އަނިޔާ އިން ރިކަވާ ވުމުގެ ކަންކަން ކުރިއަށް ގެންދަމުންނެވެ. އަނިޔާގެ ސަބަބުން މި ސީޒަންގެ ބާކީ އޮތް ބައިގައި ރޮޑްރީ އަށް ނުކުޅެވޭނެ ކަމަށް މީޑިއާ ތަކުގައި ރިޕޯޓުކުރި ނަމަވެސް، ރޮޑްރީ ބުނެފައިވާ ގޮތުގައި އޭނާ އަށް މި ސީޒަންގައި ކުޅުމުގެ ތެރެއަށް އާދެވޭނެ ކަމުގެ އުންމީދު އެބަ އޮތެވެ.
މިދިޔަ އޮކްޓޫބަރު މަހުގެ ތެރޭގައި ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ކާމިޔާބު ކުރި ރޮޑްރީ އަކީ ސިޓީގައި ހިމެނޭ މުހިންމު ކުޅުންތެރިޔެކެވެ. ސިޓީ އާއެކު ރޮޑްރީ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެ އެއްބަސްވުމުގައި ބާކީ ތިން އަހަރު އޮއްވާ، ސިޓީން ރޮޑްރީގެ އެއްބަސްވުން އައު ކުރަން ބޭނުންވާ ކަމުގެ އަޑުތަކެއް ވެސް ވަނީ ފެތުރިފަ އެވެ. ރޮޑްރީ ވަނީ މިހާތަނަށް ސިޓީ އަށް ކުޅެދިން 260 މެޗުގައި 26 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 11 ތައްޓެއް ވެސް ކާމިޔާބު ކޮށްފަ އެވެ.
