އެފްއޭއެމްގެ ޖެނަރަލް ސެކްރެޓަރީ އަކަށް ނާހިލް ހަމަޖައްސައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނަރަލް ސެކްރެޓަރީގެ މަޤާމަށް، ނާހިލް އަޙުމަދު ސިއްދީޤު ހަމަޖައްސައިފި އެވެ.

އެފްއޭއެމްގެ ނޯމަލައިޒިން ކޮމެޓީން އެ މަގާމަށް ނާހިލް ހަމަޖައްސަން ނިންމީ، އާންމުކޮށް ހުޅުވާލައިގެން ކުރިއަށް ގެންދިޔަ ވަޒީފާގެ ފުރުސަތުގައި އެކަމަށް ކުރިމަތިލީ މީހުންގެ ތެރެއިން، ޖެނަރަލް ސެކްރެޓަރީ އަކަށް އެންމެ ޤާބިލު މީހަކީ ނާހިލް ކަމަށްވާތީ އެވެ. އެގޮތުން އެ މަގާމަށް ކުރިމަތިލާފައިވާ ފަރާތްތަކުގެ ތަޢުލީމީ ފެންވަރާއި، ތަޖުރިބާ އަދި ވަނަވަރަށް ބަލާފައިވާއިރު، އެ މަގާމަށް ކުރިމަތިލީ މީހުންގެ މެދުގައި ވަނީ އިންޓަވިއުއެއް ވެސް ބާއްވައިފަ އެވެ.

އުމުރުން 24 އަހަރުގެ ނާހިލް ވެގެންދާނީ އެފްއޭއެމްގައި އެ ފަދަ އިސް މަގާމެއް އަދާ ކުރާ އެންމެ ޒުވާން ފަރާތަށެވެ. އެންމެ ފަހުން ނާހިލް ހުރީ ސިޔާސީ މަޤާމެއްގަ އެވެ. އެގޮތުން އޭނާ ވަނީ ކުޅިވަރާއި ހަށިހެޔޮކަމާ ބެހޭ ވުޒާރާގެ ޕޮލިޓިކަލް ޑިރެކްޓަރުގެ ވަޒީފާ އަދާ ކޮށްފަ އެވެ. އެ ވަޒީފާގެ ކުރިން ނާހިލް ވަނީ އެފްއޭއެމްގައި ވެސް މަސައްކަތް ކޮށްފަ އެވެ. އެގޮތުން ނާހިލް ވަނީ އެފްއޭއެމްގެ ކޮމްޕެޓިޝަމން ޑިޕާޓްމަންޓުގައި މަސައްކަތްކޮށް، އެ ޑިޕާޓްމަންޓު ވަގުތީ ގޮތުން ހިންގުމާ ވެސް ހަވާލުވެފަ އެވެ.

ނާހިލް ވަނީ ބިޒްނަސް އެޑްމިނިސްޓްރޭޝަން އަދި ބިޒްނަސް މެނޭޖުމަންޓުގެ ދާއިރާ އިން ފުރަތަމަ ޑިގުރީ އަދި މާސްޓަސް ޑިގުރީ ފުރިހަމަ ކޮށްފަ އެވެ. މީގެ އިތުރުން ނާހިލް ވަނީ ރާއްޖޭގެ ޒުވާން ޤައުމީ ޓީމުގައި ވެސް ކުޅެފަ އެވެ. ފުޓުބޯޅައިގެ އެކި ކަންކަމުގައި މަސައްކަތް ކުރަމުން އަންނަ ނާހިލް ވަނީ، އެންމެ ފަހުން 16 އަހަރުން ދަށުގެ ޤައުމީ ޓީމު އޭއެފްސީ މުބާރާތުގެ ކޮލިފިކޭޝަންގައި ވާދަކުރުމަށް ދިޔައިރު، އެ ޓީމުގެ އެންމެ އިސް ފަރާތުގެ ގޮތުގައި ވެސް މަސައްކަތް ކޮށްފަ އެވެ.

ނާހިލްގެ ކުރިން އެފްއޭއެމްގެ ޖެނަރަލް ސެކްރެޓަރީގެ މަގާމުގައި ހުރީ މުޙައްމަދު ޖައުޝަން ޝަރީފު (ޖައު) އެވެ. އެ މަގާމަށް ޖައު ހަމަޖެއްސީ އޭނާގެ ކުރިން އެ މަގާމުގައި ހުރި ޙުސެއިން ޖަވާޒު (ޖަވާ) އިސްތިއުފާ ދެއްވުމާާ ގުޅިގެންނެވެ. ވަގުތީ ގޮތުން އެފްއޭއެމްގެ ޖެނަރަލް ސެކްރެޓަރީގެ މަގާމުގައި ހުރި ޖައުގ ދައުރު ހަމަވެފައި ވަނީ މިދިޔަ އޮކްޓޫބަރު މަހުގެ ތެރޭގަ އެވެ.