ރައީސް މުއިއްޒުގެ ތަސައްވުރާއި، ސްޕޯޓްސް މިނިސްޓްރީން އިރުޝާދު ދީފައިވާ ގޮތަށް މުބާރާތް ކުރިއަށް ގެންދަން މަސައްކަތް ކުރިން - އެސޯސިއޭޝަން

އައްޑޫ ސިޓީގައި ކުރިއަށްދާ ބޮޑީބިލްޑިންގ އިވެންޓް ކުރިއަށްގެންދިއުމަށްޓަކައި ރައީސުލްޖުމްހޫރިއްޔަގެ ތަސައްވުރާއި ސްޕޯޓްސް މިނިސްޓްރީން އިރުޝާދު ދެއްވާފައިވާގޮތަށް މަސައްކަތް ކުރަމުންގެންދާ ކަމަށް ބޮޑީބިލްޑިންގ އެސޯސިއޭޝަން އޮފް މޯލްޑިވްސް އިން ބުނެފިއެވެ.

އައްޑޫ ސިޓީގައި ކުރިއަށްދާ "ވޯލްޑް ބޮޑީބިލްޑިންގް އެންޑް ފިޒީކް ސްޕޯޓްސް ޗެމްޕިއަންޝިޕް 2024" އަށް އަމާޒުވަމުންދާ ފާޑުކިއުންތަކަށް ރައްދުދެއްވާ ބޮޑީބިލްޑިންގ އެސޯސިއޭޝަން އޮފް މޯލްޑިވްސް އިން ނެރުނު ނޫސްބަޔާނުގައި ބުނެފައިވަނީ މި މުބާރާތް ކުރިއަށް ގެންދިއުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަސައްވުރާއި، ސްޕޯޓްސް މިނިސްޓްރީން އިރުޝާދު ދެއްވާފައިވާ ގޮތަށް ކުރިއަށް ގެންދިއުމަށް އެ އެސޯސިއޭޝަނުން މަސައްކަތް ކުރި ކަމަށެވެ.

ނަމަވެސް މި މުބާރާތާއި ގުޅިގެން ފެތުރެމުންދާ ހަބަރުތަކާއި ގުޅީގެން އާންމު ރައްޔިތުންގެ ކަންބޮޑުވުން ހުރުމާއެކު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ދިވެހި ލޮބުވެތި ރައްޔިތުންގެ ފަރާތުން ނިހާޔަތަށް މައާފަށް އެދޭކަމަށެވެ. އަދި މުސްތަގުބަލުގައި މިފަދަ ކަމެއް ތަކުރާރުނުވާނެކަމުގެ ފުރިހަމަ ޔަގީންކަން އަރުވާ ކަމަށެވެ.

އެސޯސިއޭޝަންގެ ބަޔާނުގައި ބުނެފައިވަނީ އެ އެސޯސިއޭޝަންގެ ފަރާތުން މިފަދަ ބައިނަލްއަގުވާމީ މުބާރާތެއް ހޯސްޓް ކުރުމށް މަސައްކަތް ކޮށްފައިވަނީ ރާއްޖޭގެ ޕްރޮފައިލް ބައިނަލްއަގުވާމީ ކުޅިވަރުގެ ދުނިޔޭގައި ވަރުގަދަކުރުމަށާއި، މިކަމުގެ ސަބަބުން ދިވެހިރާއްޖޭގެ އިގްތިސާދަށާއި، ޓުއަރިޒަމްއަށް ލިބޭނެ ކުރިއެރުމަށް ވިސްނައިގެން ކަމަށެވެ.

އަދި މިއަހަރު ބެއްވުނު މުބާރާތަކީ ވަރަށް ދުރާލާ މަސައްކަތްކޮށް އެހެން ގައުމުތަކާއި ވާދަކޮށް ރާއްޖޭގައި ހޯސްޓް ކުރުމަށް ލިބުނު ފުރުސަތެއް ކަމަށެވެ. އަދި ވޯލްޑް ބޮޑީބިލްޑިންގ އެންޑް ފިސީކް ސްޕޯޓްސް ފެޑެރޭޝަން އާއި މި މުބާރާތް ބޭއްވުމަށް ކޮންޓްރެކްޓް ހެދުމަށްފަހު، ރާއްޖޭގައި މި މުބާރާތް ބޭއްވުން ކެންސަލް ކޮށްފިނަމަ ރާއްޖޭގެ ކުޅިވަރު އެސޯސިއޭޝަންތަކަށާއި، ޖުމްލަކޮށް ރާއްޖެއށް މާލީ ގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަކަކަށް ވިސްނުމަށްފަހު އެ އެސޯސިއޭޝަންގެ ފަރާތުން އެ މުބާރާތް ބޭއްވުމަށް ނިންމީ ކަމަށެވެ.

އަދި މި މުބާރާތް ބޭއްވިފައިވަނީ އާންމުން ދިރިނޫޅޭ ބައިނަލްއަގުވާމީ ޓޫރިސްޓުން އައިސް އެމީހުންގެ ދިރިއުޅުމުގެ ވައްޓަފާޅީއާއި އެއްގޮތަށް އުޅެވޭގޮތަށް، ޓޫރިސްޓް ރިސޯޓެއްގެ ގޮތުގައި ހިންގުމަށް ހުއްދަ ލިބިފައިވާ ކެނެރީފް ރިސޯޓުގައި ކަމަށެވެ.