ރާއްޖޭގެ ރަށްރަތަކަށް އޭޓީއެމްގެ ޚިދުމަތް ފުޅާކުރުމަކީ ޑިޖިޓަލް އިކޮނޮމީގެ މުހިންމުގެ ތަނބެއް - ސައީދު

ރާއްޖޭގެ ރަށްރަތަކަށް އޭޓީއެމްގެ ޚިދުމަތް ފުޅާކުރުމަކީ ޑިޖިޓަލް އިކޮނޮމީގެ މުހިންމުގެ ތަނބެއް ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.

އޭނާ އެފަދައިން ވިދާޅުވީ މޯލްޑިވްސް އިސްލާމިކް ބޭންކުގެ ޚިދުމަތްތައް ފުޅާކޮށް ރާއްޖޭ އިތުރު 19 ރަށެއްގައި އޭޓީއެމް ބެހެއްޓުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައެވެ.

މިނިސްޓަރ ސަޢީދު ވިދާޅުވީ އެއީ މާލީ މުހިންމު ޚިދުމަތްތައް އެއް ތަނަކުން ލިބުމަށް މަގުފަހިވެގެންދާނެ ކަމެއް ކަމަށެވެ. އަދި މިކަމުގެ އެއް ބައިވެރިއެއް ގޮތުގައި އިސްލާމިކް ބެންކުން ދެއްވާ އެއްބާރުލުމަށްޓަކާ އެ ބޭންކަށް ސައީދު ވަނީ ޝުކުރު އަދާކުރައްވާފައެވެ. ސައީދު ވަނީ އިގްތިސާދީ ގޮތުން ސަރުކާރުން ގެންނަ މުހިންމު ބަދަލުތަކަށް އަލިއަޅުވާލައްވާ ވާހަކަދައްކަވާފައެވެ.

އެ ރަސްމިއްޔާތުގައި ވާހަކަދައްކަވަމުން ސީއީއޯ މުފައްދަލް އިދްރީސް ޚުމްރީ ވިދާޅުވީ މިފަދަ މަސައްކަތެއް ފެށުމަކީ އުފާކުރައްވާ ކަމެއް ކަމަށެވެ. އޭނާ ވިދާޅުވީ މިވަގުތުވެސް ރާއްޖޭގެ އެކި ސަރަހައްދުތަކުގައި 39 އޭޓީއެމް އެއް އެބަހުރި ކަމަށާއި އޭގެ ތެރެއިން 34 އޭޓީއެމް އަކީ ރުފިޔާ އޭޓީއެމްކަމަށާއި ބާކީ ހުރީ ޑޮލަރ އޭޓީއެމްތައް ކަމަށެވެ. އަދި މިހާރުވެސް އެމްއައިބީގެ 6 ބްރާންޗް ރާއްޖޭގެ އެކި ކަންކޮޅުތަކުގައި ހުރި ކަމަށް އެނާ ވިދާޅުވިއެވެ. އަލަށް ސޮއިކުރި އެއްބަސްވުމާއި އެކު އިތުރު 23 އޭޓީއެމެއް ބަހައްޓާނެ ކަަމަށާއި އެ އޭޓީ އެމްތައް ބަހައްޓާނީ 19 ރަށެއްގައި ކަމަށް އޭނާ ވިދާޅުވިއެވެ.

އެކަމަށްޓަކާ ރައީސުލްޖުމްހޫރިއްޔާ އޮފީހުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި އެއްބަސްވުމުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ފަރާތުން ސޮއިކުރައްވާފައި ވަނީ އިކޮނޮމިކް މިނިސްޓަރ މުޙައްމަދު ސަޢީދުއެވެ. އަދި އިސްލާމިކް ބޭންކުގެ ފަރާތުން، މި އެއްބަސްވުމުގައި ސޮއިކުރައްވާފައި ވަނީ އެ ބޭންކުގެ މެނޭޖިން ޑިރެކްޓަރ އަދި ސީއީއޯ މުފައްދަލް އިދްރީސް ޚުމްރީއެވެ.

މި އޭޓީއެމްތައް އިތުރުކުރުމުގެ މަސައްކަތަކީ ރާއްޖޭގެ ރަށްތަކުގައި އޭޓީއެމް ޚިދުމަތް ފޯރުކޮށްދެއްވުމަށް ކުރަމުންދާ މަސައްކަތުގެ ތެރެއިން ބައެކެވެ.