ފަލަސްތީނުގެ ހައްގުގައި އިހްތިޖާޖު ކުރި ޑރ. ޝަޒްރާ އާއި ޝާދިޔާގެ މައްޗަށް ދައުވާ އުފުލައިފި
މި ދެ ދައުވާ ސާބިތުވެއްޖެނަމަ، އެ ދެ މީހުންގެ މައްޗަށް ހަ މަސްދުވަހުގެ ޖަލު އަދަބެއް އަންނާނެ
އިޒްރޭލާ ދެކޮޅަށް އަޑު އުފުލި ޝާދިޔާ އާއި ޑރ.ޝަޒްރާގެ ބަންދުގެ މުއްދަތު ޖަހައިފި
ފަލަސްތީނުގެ ހައްގުގައި އިހްތިޖާޖު ކުރި މައްސަލައިގައި ދައުލަތުން ޑރ. ޝަޒްރާ އާއި ޝާދިޔާގެ މައްޗަށް ދައުވާކޮށްފިއެވެ.
އެ ދެ މީހުން ހައްޔަރުކުރީ އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް އެމްބަސީތަކުގެ ކައިރީގައި އަޑުއުފުލަމުން ދަނިކޮށް އޮގަސްޓް މަހުގެ 28 ވަނަ ދުވަހެވެ. ނަމަވެސް އިޒްރޭލުން ފަލަސްތީނުގައި ހިންގާ ނަސްލު ނައްތާލުމަށް ހަނގުރާމަ ހުއްޓުވުމަށް ގޮވާލައި ބޭރުގެ އެމްބަސީތަކުގެ ކައިރީގައި މުޒާހަރާ ކުރަމުން ދަނިކޮށް ހައްޔަރުކޮށް ފުލުހުންގެ ބެލުމުގެ ދަށަށް ގެންދިޔަ އައިޝަތު ޝާދިޔާ ބަންދުކުރުމަށް ކްރިމިނަލް ކޯޓުން ނެރުނު އަމުރަކީ ބާތިލް އަމުރެއް ކަމަށް ހައިކޯޓުން ވަނީ 8 އޮކްޓޯބަރުގައި ކަނޑައަޅާފައެވެ.
ކްރިމިނަލް ކޯޓުގެ އަމުރެއްގެ ދަށުން އެ ދެ މީހުން ހައްޔަރުކޮށްފައި ވަނީ ސުލްހަވެރިކަމާއެކު އެއްވެ އުޅުމުގެ ގާނޫނާ ހިލާފަށް ތަކުރާރުކޮށް ޑިޕްލޮމެޓިކް މިޝަންތައް ކައިރިއަށް އެއްވެ، ވަކި ސަފީރަކަށް އުނދަގޫވާ ގޮތަށް އަމަލުކޮށް، ފުލުހުންގެ ވާޖިބުތަކަށް ހުރަސް އެޅުމުން ކަމަށް ފުލުހުން ބުނެފައިވެއެވެ. ބަންދުކުރުމަށް ކުރިމިނަލް ކޯޓުން ނެރުނު އަމުރު ހައިކޯޓުގައި އިސްތިއުނާފު ކުރީ ޝާދިޔާއެވެ.
ހައިކޯޓުން ނިންމީ ކްރިމިނަލް ކޯޓުގެ އަމުރު ނެރުނީ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) އާ ހިލާފަށް ކަމަށެވެ. އެހެންކަމުން ޝާދިޔާ ބަންދު ކުރުމަކީ ގާނޫނާ ހިލާފު ކަމެއް ކަމަށް ވަނީ ކަނޑައަޅާފައެވެ.
ހައިކޯޓުން ބުނެފައިވަނީ ކްރިމިނަލް ކޯޓުން އެ އަމުރު ނެރުނު އިރު ޝާދިޔާގެ ފަރާތުން އާންމުންގެ ސަލާމަތަށް ނުރައްކަލެއް ކުރިމަތިވީ ކިހިނެއް ކަމެއް ސާފުކޮށްދީފައި ނުވާކަމަށެވެ. އަދި ޝާދިޔާގެ މައްޗަށް ތުހުމަތެއް ކުރެވޭ މިންވަރެއްގެ ހެކި ހުއްޓަސް، އޭނާ ބަންދު ކުރަން ޖެހޭ ހާލަތެއް އޮތް ކަމަށް ކޯޓުން ނިންމީ ގާނޫނާ ހިލާފަށް ކަމަށް އެ ހުކުމުގައިވެއެވެ.
ނަމަވެސް އަލުން ދައުވާކުރުމުގެ މުއްދަތު ހަމަވުމުގެ ކުރިން، ޕީޖީން ވަނީ އެ ދެ މީހުންގެ މައްޗަށް ދައުވާކޮށްފައެވެ. އެއީ ގާނޫނުލްއުގޫބާތުގެ 533 ވަަނަ މާއްދާގެ ދަށުން، ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ކުށުގެ ދައުވާ (އަސާސީ އަދަބު: ހަތަރު މަހާއި 24 ދުވަހުގެ މުއްދަތަކަށް ޖަލަށް ލުން) އަދި ގާނޫނުލްއުގޫބާތުގެ 615 ވަނަ މާއްދާގެ ދަށުން، އާންމު ތަނެއްގައި ހުރި މީހަކު، އެ މީހެއްގެ އަމަލުތަކުގެ ސަބަބުން އެހެން މީހަކަށް ގޯނާވާނެކަން، ނުވަތަ އުނދަގޫވާނެކަން، ނުވަތަ ބިރު ހީވާނެކަން އެނގިހުރެ، އެކަށީގެން ނުވާ ވަރަށް އަޑުގަދަކުރުމުގެ ކުށުގެ ދައުވާ (އަސާސީ އަދަބު: އެއް މަހާއި ހަ ދުވަހުގެ މުއްދަތަކަށް ޖަލަށް ލުން) އެވެ.
މި ދެ ދައުވާ ސާބިތުވެއްޖެނަމަ، އެ ދެ މީހުންގެ މައްޗަށް ހަ މަސްދުވަހުގެ ޖަލު އަދަބެއް އަންނާނެއެވެ.
