އިޒްރޭލު އދ އިން ބޭރުކުރުމަށް މަސައްކަތް ކުރަމުންދާ ކަމަށް މެލޭޝިއާ އިން ބުނެފި

އިޒްރޭލު އދ. އިން ބޭރު ކުރުމުގެ މަސައްކަތް ބައެއް ގައުމުތަކާ ގުޅިގެން ކުރިއަށް ގެންދާ ކަމަށް މެލޭޝިއާގެ ބޮޑު ވަޒީރު ވިދާޅުވެއްޖެއެވެ.

ބޮޑުވަޒީރު އަންވަރު އިބްރާހީމް މެލޭޝިއާގެ ޕާލިމެންޓުގައި ހޯމަ ދުވަހު ވާހަކަފުޅު ދައްކަވަމުން ވިދާޅުވެފައިވަނީ އދ ގެ އާންމު މަޖިލީހުން އިޒްރޭލު ބޭރުކުރުމަށް ގަރާރެއްގެ މަސައްކަތް ކުރަމުންދާ ކަމަށާއި، މެލޭޝިއާ އަކީ އެ ޤަރާރު އެކުލަވާލަމުންދާ މައި ގްރޫޕުގެ ބައިވެރިއެއް ކަމަށެވެ.

އެ ޤަރާރުގައި އިންސާނީ ޙައްޤުތަކާ ޚިލާފުވުމާއި ނަސްލު ނައްތާލުމުގެ ޖަރީމާތަކާ ގުޅިގެން އިޒްރޭލު އދ ގެ ޖެނެރަލް އެސެމްބްލީން ބޭރުކުރުމަށް ހުށަހަޅާފައިވާ ކަމަށެވެ.

ބޮޑުވަޒީރު އަންވަރު ވިދާޅުވެފައިވަނީ މި ޤަރާރުގެ ޑްރާފްޓަށް މިހާރު މަޝްވަރާ ކުރެވެމުންދާ ކަމަށާއި، އދ ގެ ޖެނެރަލް އެސެމްބްލީ އިން ފާސްކުރުމަށް ގަރާރު "އަވަހަށް" ހުށަހެޅޭނެ ކަމަށް އުންމީދުކުރެވޭ ކަމަށެވެ.

"އިޒްރޭލުން ހިންގާ އިންސާނީ ޙައްޤުތަކާ ޚިލާފު ޢަމަލުތަކާއި ނަސްލު ނައްތާލުމުގެ ޖަރީމާތަކާ ގުޅިގެން، އިޒްރޭލު އދ އިން ބޭރުކުރުން ހިމެނޭ ގޮތަށް ހަރުކަށި ފިޔަވަޅުތައް ވީހާވެސް އަވަހަކަށް އަޅަންޖެހޭ،" އޭނާ ފާހަގަކުރެއްވިއެވެ.

"މި އެޖެންޑާގެ އަޑު އިއްވައި، ސަމާލުކަމަށް ގެނެވޭކަން މެލޭޝިއާ އިން ކަށަވަރު ކުރާނަން، އެ ގޮތުގެ މަތިން، މަރުވަމުންދާ މީހުންގެ އަދަދު އިތުރުވަމުންދާ މި ދަނޑިވަޅުގައި އިޒްރޭލުގެ އަނިޔާވެރިކަން ހުއްޓުވުމާއި، ފަލަސްޠީނު ރައްޔިތުންނަށް ކޮންމެހެން ބޭނުންވާ އެހީ ފޯރުކޮށްދިނުމަށް މަގުފަހިވާނެ،" އަންވަރު ވިދާޅުވިއެވެ.

އަންވަރު ވިދާޅުވީ، އިޒްރޭލުން މިހާރު މަނާކޮށްފައިވާ، ފަލަސްތީނުގެ ރެފިއުޖީންނާ ބެހޭ އދ ގެ ރިލީފް އެންޑް ވާރކްސް އޭޖެންސީ (އަންރުވާ) އިން ފަލަސްތީނުގެ ރެފިއުޖީންނަށް ދެމުންދާ ތަޢުލީމާއި، ޞިއްޙީ ފަރުވާއާއި އިންސާނީ އެހީ ހިމެނޭ އަސާސީ ޚިދުމަތްތައް ފޯރުކޮށްދިނުން ކުރިއަށް ގެންދިއުމަށް ގާނޫނީ ގޮތުން ލިބޭ ބާރަކަށް މި ގަރާރު ވެގެން ދާނެ ކަމަށެވެ.

ފާއިތުވި ހަފްތާގައި އިޒްރޭލުގެ ކެނެސެޓް (ޕާލަމެންޓް) އިން ފާސްކުރި ބިލަކުން އަންރުވާ ހިންގުން އިޒްރޭލުން ވަނީ މަނާކޮށްފައިވެއެވެ. މީގެ ސަބަބުން ޣައްޒާ ސްޓްރިޕް އާއި އިޒްރޭލުން ހިފާފައިވާ ހުޅަނގު އައްސޭރި އާއި އިރުމަތީ ޤުދުސްގައި އެ އޭޖެންސީން ކުރަމުންދާ މަސައްކަތަކަށް ހުރަސް އެޅޭނެ އެވެ. އިޒްރޭލުން ފާސްކުރި މި ޤާނޫނު ޢަމަލުކުރަން ފަށާނީ 90 ދުވަހުގެ ތެރޭގައެވެ.

އިޒްރޭލުން އަންރުވާގެ ހަރަކާތްތައް ހުއްޓުވުމަށް ފާސްކުރި ގާނޫނުގެ ހުއްޖަތަކަށް ބުނެފައިވަނީ އަންރުވާގެ ތެރެއަށް ހަމާސްގެ ހަނގުރާމަވެރިން ވަދެފައިވާ ކަމަށެވެ.

އދ ގެ މި އޭޖެންސީން އިޒްރޭލުގެ މި ތުހުމަތުތައް ދޮގުކޮށް، އެ ޖަމާއަތުން ވަކިފަރާތަކަށް ނުޖެހުން ކަށަވަރުކުރުމަށް ފިޔަވަޅުތައް އަޅާ ކަމަށް ބުނެފައިވެއެވެ.

އަންރުވާއިން ހޯމަ ދުވަހު ބުނެފައިވަނީ އިޒްރޭލުން އެ ޖަމާއަތުގެ މަސައްކަތްތައް މަނާކުރުމުގެ ސަބަބުން ހަނގުރާމައިގެ ތެރޭގައިވާ ޣައްޒާ ސްޓްރިޕްގައި އިންސާނީ އެހީގެ މަސައްކަތްތައް "ހުއްޓުމަކަށް އަންނާނެ" ކަމަށެވެ.

މިހާރު ފަލަސްޠީނު ރެފިއުޖީންގެ އަދަދު ގާތްގަނޑަކަށް 6 މިލިއަނަށް އަރައެވެ. ގާޒާގެ 2.3 މިލިއަން އާބާދީގެ ގިނަ އަދަދެއްގެ ޢާއިލާތަކަކީ ރެފިއުޖީންނެވެ.