ބީއެމްއެލް އިން މާސްޓަރކާޑް ބިޒްނަސް ޕްރީޕެއިޑް ކާޑު ތައާރަފްކޮށްފި

ބޭންކް އޮފް މޯލްޑިވްސްއިން މާސްޓަރކާޑްގެ ބިޒްނަސް ޕްރީޕެއިޑް ކާޑު ތައާރަފްކޮށްފިއެވެ.

މިއީ ބޭންކުން ވިޔަފާރިތަކަށް ފަސޭހަކަމާއި ރައްކާތެރިކަމާއެކު ފައިސާ ދެއްކުމުގެ މުއާމަލާތްކުރުމަށް ފުރުސަތު ހޯދައިދިނުމުގެ ގޮތުން ތައާރަފްކުރި ހިދުމަތެކެވެ.

ކުދި ވިޔަފާރިތަކުން ފެށިގެން ބޮޑެތި ވިޔަފާރިތަކުންވެސް ކުރާ މުއާމަލާތްތަކުގައި ނަގުދު ފައިސާގެ ބަދަލުގައި މާސްޓަރކާޑް ޕްރީޕެއިޑް ކާޑު ބޭނުންކޮށްގެން މުއާމަލާތްތަކުގެ ތަފްސީލު ރައްކާތެރިކަމާއެކު ބެލެހެއްޓި، ނަގުދު ފައިސާއާ ނުލައި ވިޔަފާރިއާ ގުޅޭ ހަރަދު ކުރުމަށް މަގުފަހިވެގެންދާނެއެވެ.

ބިޒްނަސް ޕްރީޕެއިޑް ކާޑުގެ ރުފިޔާ ކާޑާއި ޑޮލަރު ކާޑުވެސް ލިބޭނެއެވެ. އެ ގޮތުން މި ދެބާވަތުގެ ކާޑުންވެސް ރާއްޖޭގެ ޕީއޯއެސް، ޕޭމަންޓް ގޭޓްވޭ އަދި އޭޓީއެމްތަކުގައި މުއާމަލާތުކުރެވޭނެއެވެ. އަދި މީގެ އިތުރުން ޑޮލަރު ކާޑުން ބޭރު ގައުމުތަކުގެ ޕީއޯއެސް މެޝިނާއި ޕޭމަންޓް ގޭޓްވޭ ތަކުގައި ބޭނުން ކުރެވޭނެއެވެ. މި ކާޑުތަކުން ދުވާލަކު 100،000 ދިވެހި ރުފިޔާ އަދި 50،000 ޑޮލަރުގެ މުއާމަލާތްކުރެވޭނެއެވެ. އަދި 200،000 ރުފިޔާ ނުވަތަ 50،000 ޑޮލަރު ކާޑަށް ރީލޯޑްކުރެވޭނެއެވެ. ކާޑުތަކުން ކޮށްފައިވާ މުއާމަލާތްތަކުގެ ތަފްސީލް އަދި ބެލެންސް އިންޓަރނެޓް ބޭންކިންގ އަދި މޯބައިލް އެޕް މެދުވެރިކޮށް ބަލާލެވޭނެއެވެ.

މި ހިދުމަތާއި ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ، މުޙައްމަދު ޝަރީފް ވިދާޅުވީ ބީއެމްއެލްގެ ކާޑް ޕާރޓްނަރ، މާސްޓަރކާޑާ ގުޅިގެން ވިޔަފާރިތަކަށް ޑިޖިޓަލް ބޭންކިންގ ސޮލިއުޝަނެއް ހޯދައިދެވޭކަމީ ލިބޭ ވަރަށް ބޮޑު އުފަލެއް ކަމަށެވެ. މި ތައާރަފް ކުރެވުނު ބިޒްނަސް ޕްރީޕެއިޑް މާސްޓަރކާޑަކީ ވިޔަފާރިތަކަށް އެހީތެރިވުމުގެ އިތުރުން ވިޔަފާރިތަކުން ބޭނުންވާފަދަ ޒަމާނީ ހިދުމަތްތައް ދިނުމަށް އެޅުނު މުހިންމު ފިޔަވަޅެއް ކަމަށް ޝަރީފް ވިދާޅުވިއެވެ.

އަދި މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 93 ސެލްފްސަރވިސް ބޭންކިންގ ސެންޓަރ، 148 އޭޓީއެމް، އޭޖެންޓު ބޭންކިންގ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ހިދުމަތާއެކު ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލްއިން ބުނެއެވެ.