މޫސާ އަލީ ޖަލީލަށް ނިޝާން އަސްކަރީގެ ވެރިކަމުގެ އިއްޒަތް އަރުވައިފި

މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް ނިޝާން އަސްކަރީގެ ވެރިކަމުގެ ޢިއްޒަތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަރުއްވައިފިއެވެ.

މޫސާ އަލީ ޖަލީލަށް ނިޝާން އަސްކަރީ ވެރިކަމުގެ އިއްޒަތް އެރުއްވީ އާދިއްތަ ދުވަހުގެ ރޭ ނަސްރުގެ ދުވަހުގެ ޖަލްސާގައެވެ.

31 އަހަރަށްވުރެ ގިނަ ދުވަހު ސިފައިންގޭގައި ހިދުމަތް ކޮށްދެއްވާފައިވާ މޫސާ އަލީ ޖަލީލް ރިޓަޔާ ކުރެއްވިއިރު، އޭނާ ވަނީ ނުވަ ކުލަ އާއި 11 މެޑަލް ޙާސިލްކުރައްވާފައެވެ.

މި ޢިއްޒަތް އެރުއްވުމަށް ނިންމެވީ މޭޖަރ ޖެނެރަލް ޖަލީލް ދިވެހި ޤައުމާއި ރައްޔިތުންގެ ސަލާމަތަށް އަސްކަރީ ގޮތުން ކުރައްވާފައިވާ އަގުހުރި ޚިދުމަތްތަކަށާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށް ކުރައްވާފައިވާ މަސައްކަތްތަކަށް ޝުކުރު އަދާކުރެއްވުމުގެ ގޮތުންނެވެ. 1988 ނޮވެންބަރު 3 ގައި ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމަކީ ވެސް މި ލަޤަބް އެރުވުމުގެ ބޭނުމެކެވެ. މި ނިންމެވުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާއާއި ދިވެހިރާއްޖޭގެ ޢިއްޒަތުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިންމަވާފައިވާ ނިންމެވުމެއްކަން ފާހަގަކޮށްލެވެއެވެ.

މޭޖަރ ޖެނެރަލް ޖަލީލަށް މީގެ ކުރިން ޖިހާދުގެ ރަތް މެޑަލާއި ދިގުމުއްދަތެއްގައި ޚިދުމަތް ކުރުމުގެ މެޑަލްވެސް ވަނީ އަރުވާފައެވެ. ދިފާޢީ ވަޒީރުކަންވެސް ކުރައްވާފައިވާ މޭޖަރ ޖެނެރަލް ޖަލީލަކީ ދިވެހިރާއްޖޭގެ ޤައުމީ ދިފާޢީ ބާރު ހަރުދަނާކޮށް ތަރައްޤީކުރުމަށް މުހިއްމު މަސައްކަތްތަކެއް ކުރައްވާފައިވާ އިސް ބޭފުޅެކެވެ.