ވެރިކަމާ ހަވާލުވީއްސުރެ ކޮންމެ ދުވަހެއްވެސް އަޅުގަނޑު ހޭދަ މިކުރަނީ ގައުމުގެ މިނިވަންކަން ހިމާޔަތް ކުރުމަށްޓަކައި: ރައީސް މުޢިއްޒު

ވެރިކަމާ ހަވާލުވެވަޑައިގެން ހޭދަވި އަހަރެއްހާ ދުވަހުގެ ތެރޭގައި ކޮންމެ ދުވަހަކު ވެސް މަސައްކަތް ކުރައްވާފައިވާނީ ޤައުމުގެ މިނިވަންކަމާއި އިސްތިގުލާލު ހިމާޔަތް ކުރުކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެ މަނިކުފާނު އެފަދައިން ވިދާޅުވީ ނަޞްރު ދުވަހުގެ ހާއްސަ ޖަލްސާގައި ވާހަކަދައްކަވަމުންނެވެ.

ވެރިކަމާއި ހަވާލުވި އިރު ހަވާލުވެވަޑައިގެންނެވި އެންމެ ބޮޑު ޒިންމާއަކީ ޤައުމު މިނިވަންކުރުމުގެ ޒިންމާ ކަމަށް ރައީސް ވަނީ ވިދާޅުވެފައެވެ. އަދި ޤައުމުގެ މިނިވަންކަން ދިފާއުކުރުމަށް މަސައްކަތްކުރުމަކީ އެ މަނިކުފާނަށް ލިބިވަޑައިގަންނަވާ އެންމެ ބޮޑު ފަޚުރުކަމަށް ވެސް އެ މަނިކުފާނު ވަނީ ވިދާޅުވެފައެވެ. އެގޮތުން އަސްކަރީ ބާރުގެ ވަސީލަތްތައް އިތުރުކޮށް އަސްކަރިއްޔާ ވަރުގަދަކުރުމަށް ގިނަ މަސައްކަތްތަކެއް ކުރައްވާ ކަމަށް އެ މަނިކުފާނު ވިދާޅުވިއެވެ. އެ މަސައްކަތުގެ ތަފްސީލްތަކާއި ގުޅޭގޮތުން ވާހަކަދައްކަވަމުން އެ މަނިކުފާނު ވަނީ ޒަމާނަށް ފެތޭ ޔޫއޭވީތައް މިހާރު ގެނައުމުގެ މަސައްކަތް ކުރައްވާފައިވާކަން ހާމަކުރައްވާފައެވެ. ހަމައެެހެންމެ ރާއްޖޭގެ ކަނޑުގެ ސަރަހައްދު ބެލެހެއްޓޭނެ ގާބިލުކަން ދިވެހިންގެ ސިފައިންގެ ކިބައިގައި އަށަގެންނެވުމުގެ މަސައްކަތް ކުރައްވާފައިވާކަމަށް އެ މަނިކުފާނު ވަނީ ފާހަގަކުރައްވާފައެވެ.

ރައީސް ވިދާޅުވީ މުޅި ރާއްޖޭގެ އެކިކަންކޮޅުތަކުގައި ހުރި ސިފައިންގެ މަރުކަޒުތައް ނުބެލެހެއްޓުމުގެ ސަބަބުން މި ވޭތުވެދިއަ 4 ފަސް އަހަރެއްގެ ތެރޭގައި އެތަންތަނަށް ގެއްލުންވެ ވީރާނާވެފައިވާ ކަަމަށެވެ. އެމަނިކުފާނު ވަނީ އެކުވެރި ދައުލަތްތަކުގެ އެހީތެރިކަމަށް އެދިވަޑައިގެން އެފަދަ ފަރާތްތަކުގެ އެހީގައި އެމަރުކަޒުތައް ހެދިގެންދާނެ ކަމަށް ވިދާޅުވެފައެވެ.

ރައީސް ވަނީ ވެރިކަމަށްވީ ދުވަސްތެރޭގައި ސިފައިންގެ ވަރުގަދަ ކުރުމަށް ކުރައްވާފައިވާ އިތުރު މަސައްކަތްތަކަށް އަލިއަޅުވާލައްވާފައެވެ. އެގޮތުން އަސްކަރިއްޔާ ޒަމާނަށް ފެތޭ ތަނަކަށް ހެދުމަކީ ކުރުން މުހިންމު މަސައްކަތެއް ކަމަށް ވިދާޅުވިއެވެ. ހަމައެހެންމެ ދިވެހިންގެ ބޮޑު އިކޮނޮމިކް ޒޯން އަބަދުވެސް ބެލެހެއްޓޭނެފަދަ ގާބިލް ކަން މިހާރު ސިފައިންގެ ކިބައިގައި ހުންނާނެ ކަމަށް އެ މަނިކުފާނު ވަނީ ވިދާޅުވެފައެވެ. އެ ކެޕޭސިޓީ ބިލްޑުކުރުމުގެ މަރުހަލާ އަދިވެސް ފުޅާވަމުންދާ ކަމަށާއި ކޯސްގާޑްގެ ކެޕޭސިޓީ ވަރުގަދަ ކުރުމަށްޓަކައި ސްޕެޝަލް ސްކޮޑްރަން އެއް އާދިއްތަ ދުވަހު ފަށާފައިވާ ކަމަށް ރައީސް ވިދާޅުވިއެވެ. އަދި ކޯސްޓްގާޑް ޑަބަލްކުރުމުގެ މަޝްރޫޢުގެ ތެރެއިން ދެ ގުނައަށް ފްލީޓް ބޮޑުކުރުމުގެ މަސައްކަތްވެސް ކުރިއަށް ދާކަމަށް އެ މަނިކުފާނު ވިދާޅުވިއެވެ.

އިތުރަށް ވާހަކަދައްކަވަމުން ރައީސް ވިދާޅުވީ ތަފާތު އެކި މުނާސަބާތަކާއި ގުޅުވައި ބައްދަލުވުންތަކާއި ޖަލްސާތައް ބާއްވާއިރު އެކަމުން ރަނގަޅު ނަތީޖާތަކެއް ވެސް ނިކުންނަން ޖެހޭކަމަށެވެ. އެފަދަ ދުވަސްތައް މެދުވެރިކޮށް އަންނަން އޮތް ޖީލުތަކަށް ކުރަން ޖެހޭކަމަށް ވިދާޅުވި އެވެ.