އައްޑަނަ މަޖައްލާގެ 34 ވަނަ އަދަދު ނެރެފި

ނަޞްރުގެ ދުވަހުގެ މުނާސަބަތުގައި ކޮންމެ އަހަރަކު މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ނެރޭ ދިވެހި ސިފައިންގެ މަޖައްލާ، "އައްޑަނަ" ގެ 34 ވަނަ ޢަދަދު، ނެރެފިއެވެ. 

އައްޑަނަ މަޖައްލާގެ 34 ވަނަ އަދަދު ނެރެދެއްވީ ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑު މައުންޓް ކުރުމުގެ ރަސްމިއްޔާތަށްފަހު ބަންޑާރަކޮށީގައި ޗީފް އޮފް ޑިފެންސް ފޯސް، ލެފްޓިނެންޓް ޖެނެރަލް ޢަބްދުﷲ ޝަމާލެވެ.

އަހަރަކު ދެފަހަރު ނެރެމުން އަންނަ އައްޑަނަ މަޖައްލާއަކީ، ރަޖިސްޓްރީކޮށްގެން 2007 ވަނަ އަހަރުން ފެށިގެން އާންމުކޮށް ނެރެމުން އަންނަ މަޖައްލާއެކެވެ. އެ މަޖައްލާ ޝާއިއުކުރަމުން ދަނީ ކޮންމެ އަހަރެއްގެ ސިފައިންގެ ދުވަހާއި ނަޞްރުގެ ދުވަހުގެ މުނާސަބަތުގައެވެ.

މިއަހަރުގެ ނަޞްރުގެ ދުވަހު ނެރުނު އަދަދުގެ ތީމަކީ، "ޝަހީދުންގެ ޒިކުރާ" އެވެ. ރާއްޖޭގެ ފުންނާބުއުސް އިލްމީ ލިޔުންތެރިންނާއި ސިފައިންގެ ލިޔުންތެރިން ލިޔުއްވާފައިވާ ލިޔުންތަކާއި ދިރާސާތައް މި އަދަދުގައި ހިމަނާފައިވާނެ ކަމަށް އެމްއެންޑީއެފުން ބުންޏެވެ. އޭގެ ތެރޭގައި، ޤައުމިއްޔަތު، އިޖުތިމާއީ، ދީނީ، ސިއްހީ، ތާރީޚު، ބަހާއި އަދަބިއްޔާތުގެ ދާއިރާއިން ތަފާތު ލިޔުންތައް ހިމެނޭނެ ކަމަށް އެ އިދާރާއިން ބުންޏެވެ.

އައްޑަނައިގެ މި އަދަދު ގިނަ ބަޔަކަށް ކިޔާލަން މަގުފަހިކޮށްދިނުމުގެ ގޮތުން އޮންލައިންކޮށް ކިޔާލެވޭ ގޮތަށް އެމްއެންޑީއެފް ވެބްސައިޓްގައި މިހާރު ވަނީ ޝާއިއުކޮށްފައެވެ. އަދި ޕްރިންޓް ކޮޕީ ވެސް ހިލޭ ބެހުމަށް ހަމަޖެހިފައިވާ ކަމަށް އެމްއެންޑީއެފުން ބުންޏެވެ.