މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް ނިޝާން އަސްކަރީގެ ވެރިކަމުގެ ޢިއްޒަތް އެރުވުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފިއެވެ.

ރައީސް އޮފީހުން ހާމަކުރެއްވި ގޮތުގައި، މި ޢިއްޒަތް އެރުވުމަށް ނިންމެވީ މޭޖަރ ޖެނެރަލް ޖަލީލް ދިވެހި ޤައުމާއި ރައްޔިތުންގެ ސަލާމަތަށް އަސްކަރީ ގޮތުން ކުރައްވާފައިވާ އަގުހުރި ޚިދުމަތްތަކަށާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށް ކުރައްވާފައިވާ މަސައްކަތްތަކަށް ޝުކުރު އަދާކުރެއްވުމުގެ ގޮތުން ކަމަށް ރައީސް އޮފީހުން ބުނެފައިވެއެވެ. ރައީސް އޮފީހުން ނެރުނު ބަޔާނެއްގައި މި ޝަރަފް އެރުވުމަށް ނިންމެވި ސަބަބާ ބެހޭ ގޮތުން އިތުރަށް ބުނެފައިވަނީ، ޚާއްޞަކޮށް، 1988 ނޮވެންބަރު 3 ގައި ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމަށްޓަކައެވެ.

މި ނިންމެވުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާއާއި ދިވެހިރާއްޖޭގެ ޢިއްޒަތުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިންމަވާފައިވާ ނިންމެވުމެއް ކަމަށް ވެސް ރައީސް އޮފީހުން ވަނީ ބުނެފައެވެ.

މި ޢިއްޒަތް އެރުވުމަށް ހަމަޖެހިފައިވަނީ މިއަހަރުގެ ނަޞްރުގެ ދުވަހުގެ މުނާސަބަތުގައި ބޭއްވޭ ރަސްމީ ޖަލްސާގައެވެ. މި ޖަލްސާ އޮންނާނީ އާދިއްތަ ދުވަހުގެ ރޭ 8:30 ގައި ދަރުބާރުގޭގައެވެ.

މޭޖަރ ޖެނެރަލް ޖަލީލަށް މީގެ ކުރިން ޖިހާދުގެ ރަތް މެޑަލާއި ދިގުމުއްދަތެއްގައި ޚިދުމަތް ކުރުމުގެ މެޑަލްވެސް ވަނީ އަރުވާފައެވެ. ދިފާޢީ ވަޒީރުކަންވެސް ކުރައްވާފައިވާ މޭޖަރ ޖެނެރަލް ޖަލީލަކީ ދިވެހިރާއްޖޭގެ ޤައުމީ ދިފާޢީ ބާރު ހަރުދަނާކޮށް ތަރައްޤީކުރުމަށް މުހިއްމު މަސައްކަތްތަކެއް ކުރައްވާފައިވާ އިސް ބޭފުޅެކެވެ.