އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ލިބޭނެ ކަމަށް އެންސްޕާ އިން ބުނެފި
ވަރަށް ކުއްލި ގޮތަކަށް އާސަންދައިގެ ޚިދުމަތް ލިބެމުން އައި ގޮތައް ބޮޑު ބަދަލެއް ގެނައުމާއެކު އާންމުންނާއި ސިއްހީ ޚިދުމަތްދޭ އަމިއްލަ ތަންތަނުންވެސް އަންނަނީ ކަންބޮޑުވުން ފާޅު ކުރަމުން
ސްކޫލް ދަރިވަރުން ސިއްހީ ސްކްރީން ކުރުމުގެ ޕްރޮގްރާމުގެ ތެރެއިން ކަލާފާނު ސްކޫލް ދަަރިވަރުން ސްކްރީން ކުރަނީ (ފައިލް)
އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފިއެވެ.
ޕްރައިވެޓް އިންޝުއަރެންސް ހުސްނުވަނީސް އާސަންދަ ބޭނުން ނުކުރެވޭ ގޮތް ހެދުމާ ގުޅިގެން އުފެދުނު ހިތްހަމަނުޖެހުންތަކަށް ހައްލެއް ގެނައުމުގެ ގޮތުން، އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ލިބޭނެކަމަށް އެންސްޕާ އިން ހޮނިހިރު ދުވަހުގެ ރޭ ނެރުނު ބަޔާނެއްގައި ބުނެފައިވެއެވެ.
ނޮވެމްބަރު 1 އިން ފެށިގެން އަމަލުކުރަން ފެށި އާ އުސޫލުގައި އޮތީ ޕްރައިވެޓް އިންޝުއަރެންސް ކަވަރޭޖެއް އޮތްނަމަ އާސަންދަ ލިބޭނީ އެ ކަވަރޭޖެއް ހުސްވުމުން ކަމަށެވެ. މި އުސޫލަށް އަމަލުކުރަން ފެށުމާއެކު، ބައެއް އިންޝުއަރެންސް ކުންފުނިތަކުން ކޭޝްލެސް ހިދުމަތް މެދުކަނޑާލުމުން، ރައްޔިތުންގެ މެދުގައި ހިތްހަމަނުޖެހުމާއި ޝަކުވާތައް ވަނީ އިތުރުވެފައެވެ.
އެންސްޕާ އިން ނެރުނު ބަޔާނުގައި ބުނެފައިވަނީ، "އަމިއްލަ އިންޝުއަރަންސް ކުންފުނިތަކުން ކޭޝްލެސް ޕޭމަންޓު ހުއްޓާލުމުގެ ސަބަބުން ކަމުގައިވިޔަސް އަމިއްލަ އިންޝުއަރަންސް ޕޮލިސީން ކަވަރޭޖު ނުލިބި އަމިއްލަ ޖީބުން ފައިސާ ދައްކަންޖެހޭ ހުރިހާ ހާލަތެއްގައި އާސަންދަ ކަވަރޭޖު ކުރިއެކޭވެސް އެއްގޮތަށް ލިބިގެންދާނެ،" ކަމަށެވެ.
ވަރަށް ކުއްލި ގޮތަކަށް އާސަންދައިގެ ޚިދުމަތް ލިބެމުން އައި ގޮތައް ބޮޑު ބަދަލެއް ގެނައުމާއެކު ސިއްހީ ޚިދުމަތްދޭ އަމިއްލަ ތަންތަނުންވެސް އަންނަނީ ކަންބޮޑުވުން ފާޅު ކުރަމުންނެވެ. ރާއްޖޭގެ އެންމެ ބޮޑު ޕްރައިވެޓް ހޮސްޕިޓަލުން ބުނެފައިވަނީ މި ބަދަލުގެ ސަބަބުން ހޮސްޕިޓަލްގެ ކައުންޓަރުން ހިދުމަތް ދިނުމަށް ލަސްތަކެއް އަންނާނެ ކަމަށެވެ.
