އާސަންދަ ރިފޯމްކުރުމާއި މެދު ނާޒިމް އާއި ސަރުކާރުގެ ޚިޔާލު ތަފާތު
އަންނަ އަހަރުގެ ބަޖެޓުގެ ރިކަރެންޓު ޚަރަދުގެ 5.1 އިންސައްތަ ހިއްސާކުރަނީ އާސަންދައަށް ކުރާ ހޭދަ
މަޖިލީހުގެ ނައިބު ރައީސް ނާޒިމް އާއި ފިނޭންސް މިނިސްޓަރ ޒަމީރު
ދައުލަތުގެ ސިއްހީ ފަރުވާގެ އިންޝުއަރެންސް ސްކީމް، އާސަންދަ ނިޒާމު ރިފޯމް ކުރުމާއި މެދު މަޖިލީހުގެ ނައިބު ރައީސް އަދި ދިއްގަރު ދާއިރާގެ ޕީއެންސީ މެންބަރު އަހުމަދު ނާޒިމްގެ ޚީޔާލާއި ސަރުކާރުގެ ޚިޔާލު ތަފާތުކަން ހާމަވެއްޖެއެވެ.
ހޯމަ ދުވަހު މަޖިލީހުގައި ވާހަކަދައްކަވަމުން މިނިސްޓަރ އޮފް ފައިނޭންސް މޫސާ ޒަމީރު ވަނީ އާސަންދަ ރިފޯމްކުރުމަށް ސަރުކާރުން ގެންގުޅުއްވާ ވިސްނުމާއި އެއްގޮތަށް ވަކާލާތުކުރައްވާފައެވެ. އެގޮތުން އަމިއްލަ އިންޝުއަރެންސް އޮންނަ މީހުންނަށް އާސަންދަ ޚިދުމަތް ދިނުމުގައި ގެންނަ ބަދަލާ ގުޅިގެން 500 މިލިއަން ރުފިޔާ ސަލާމަތް ކުރެވޭނެ ކަމަށް އެ މަނިކުފާނު އަންދާޒާކުރެއްވިއެވެ. މި ހިނގާ ނޮވެމްބަރު މަހުން ފެށިގެން ސިއްޙީ ޚިދުމަތް ދޭ ތަންތަނުން ޚިދުމަތް ހޯދާ ބަލިމީހުންނަށް އާސަންދަ ލިބޭނީ އަމިއްލަ އިންޝުއަރެންސްތައް ކެނޑުމަށް ފަހުގައެވެ. އެ ބަދަލުތަކުގެ ސަބަބުން ސަރުކާރުގެ އިސްރާފު ކުޑަ ވާނެ ކަމަށް މިނިސްޓަރ ވިދާޅުވިއެވެ. އެ ބަދަލާއި އެކު އެންމެ ބޭނުންޖެހޭ ރައްޔިތުންނަށް އޭގެ ފައިދާ ލިބޭނެ ކަމަށް ވެސް ވަޒީރު ވަނީ ވިދާޅުވެފައެވެ. އެ ބަދަލުތަކާއެކު އޮޅޭ ބައެއް ކަންތައްތައްހުރި ކަމަށް ވެސް މިނިސްޓަރ ފާހަގަކުރެއްވިއެވެ. އިތުރަށް ވަޒީރު ވިދާޅުވީ އާންމު ރައްޔިތުންނަށް ލިބޭ ޚިދުމަތަށް ބަދަލެއް ނާންނާނެ ކަމަށާއި އިތުރު ފައިސާ އެއްވެސް ދައްކަން ނުޖެހޭނެކަމަށެވެ.
އެހެންނަމަވެސް މެމްބަރު ނާޒިމްގެ ޚިޔާލު ތަފާތުކަން މަޖިލީހުގައި އޭނާ ދެއްކެވި ވާހަކަތަކުން ހާމަވެއެވެ. ނާޒިމް ވަނީ އާސަންދަ ސްކީމަކީ ޚަރަދު ބޮޑު އެއްޗެއް ކަމަށް ފާހަގަކުރައްވާފައެވެ. އަދި މާލިއްޔަތު ކޮމިޓީގައި ބެލި ބެލުމުން އާސަންދައިގެ ކަންކަން އޮތީ ރަނގަޅު ނުކުރެވޭ ވަރަށް ގޯސްވެފައި ކަން އެނގުނު ކަމަށް އެ މަނިކުފާނު ވިދާޅުވިއެވެ. ނާޒިމް ވަނީ ހަގީގީ ކެންސަރު ޖެހިފައި ވަނީ އާސަންދައަށް ކަމަށް ސިފަކުރައްވާފައެވެ. އެކަމާއި މެދު އެހެން ވިސްނުމެއް ގެންގުޅެ އާސަންދަ ދޫކޮށްލަން ޖެހޭ ކަމަށް ނާޒިމް ޤަބޫލުކުރައްވައެވެ. އާސަންދަ ދޫކޮށްލުމަށް ފަހު އަލުން އާ ސްކީމެއް ފެށުމަށް ނާޒިމް ވަކާލާތު ކުރެއްވި ނަމަވެސް އެކަމުން މައްސަލަ ހައްލުވާނެ ގޮތެއް އޭނާ ހާމަ އެއް ނުކުރައްވައެވެ. ނަމަވެސް އާސަންދަ ނިޒާމްގައި ހުރި މައްސަލަތަކަށް ނާޒިމް އަލިއަޅުވާލެއްވިއެވެ. އޭގެ ތެރޭގައި ރާއްޖެއިން ބޭރުގެ ހޮސްޕިޓަލްތަކާއެކު ހަދާފައި ހުރި އެއްބަސްވުންތަކާއި ގުޅޭ ކަންކަމާއި ޗާޖުކޮށްފައި ހުންނަ އަގުތަކަކީ ގަބޫލުކުރަން ދަތި ބޮޑެތި އަގުތަކެއް ކަމަށް ވުމަކީ މައްސަލަ އެއް ކަމަށް ނާޒިމް ފާހަގަކުރެއްވިއެވެ. އެހެންކަމުން އެ އެގްރިމަންޓްތައް ބާތިލުކުރުމަށް ފަހު އާސަންދަ ހަމަމަގަށް އަޅުވަން ޖެހޭކަމަށް ނާޒިމް ޤަބޫލުކުރައްވައެވެ.
ނާޒިމް އަކީ މަޖިލީހުގައި ހުންނެވި އެންމެ ގިނަ ދައުރު ޚިދުމަތްކުރެއްވި އެއް ބޭފުޅާއެވެ. އާސަންދަ ރިފޯމްކޮށް ހަމަމަގަށް އަޅުވާކަމަށް ބުނާއިރު ނާޒިމްގެ ޚިޔާލު މުޅިން އެއާއި ތަފާތުކަން ފާހަގަކޮށްލެވެއެވެ.
އަންނަ އަހަރުގެ ބަޖެޓުގެ ރިކަރެންޓު ޚަރަދުގެ 5.1 އިންސައްތަ ހިއްސާކުރަނީ އާސަންދައަށް ކުރާ ހޭދައެވެ.
އާސަންދަ ނިޒާމު ހަރުދަނާ ކުރުމަށް މަހަކު 60،000 ހާސް ރުފިޔާއަށްވުރެ ގިނައިން އާމްދަނީ ލިބޭ ނުވަތަ އިންކަމް ޓެކްސް ދައްކަންޖެހޭ ފަރާތްތަކުގެ އަތުން ހެލްތް ކޮންޓްރިބިއުޝަން އެއް ދައްކަންޖެހޭ ގޮތަށް ހަދަން އަންނަ އަހަރަށް ލަފާކުރާ ބަޖެޓުގައި ވަނީ ހިމަނާފައެވެ. ދައުލަތުގެ ބަޖެޓު ފޮތުގައި ބުނެފައިވަނީ އާސަންދައާއި މެޑިކަލް ވެލްފެއަރ ނިޒާމު ހަރުދަނާ ކުރުމަށް އަޅަން ރާވާފައިވާ ފިޔަވަޅުތަކުގެ ސަބަބުން 600 މިލިއަން ރުފިޔާ އާ ގާތްކުރާ މިންވަރަކަށް އަންނަ އަހަރު ހަރަދު ކުޑަކުރެވިގެންދާނެކަމަށް ބެލެވޭ ކަމަށެވެ.
އެގޮތުން އެންމެ ގިނައިން އާމްދަނީ ލިބޭ ފަރާތްތަކަށް ކުރިން ދައްކާ (ޕްރީ-ޕޭ) ހެލްތް ކޮންޓްރިބިއުޝަނެއް ތައާރަފް ކުރުން ވަނީ ނިންމާފައެވެ.
