ހީނާ މަގާމުގައި ހުރެގެން އިތުރަށް ހޭދަވާ ކޮންމެ ދުވަހަކުން ދޭހަވަނީ އެންސްޕާގެ ވައްކަމަކީ ރައީސް މުއިއްޒުގެ އެންގެވުމަށް ކުރި ކަމެއް ކަމެވެ

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ފައިސާއިން ކޮންމެވެސް ބަޔަކު ޓީވީ ޗެނަލެއް ހެދި ހަބަރާއެކު މުޅި ގައުމަށް ސިހުން ގެނުވިއެވެ.

ވާނީވެސް އެހެންތާއެވެ! ފަގީރުންނާއި ނިކަމެތިންނަށް ދައުލަތުގެ ނަމުގައި އެހީތެރިވުމަށް ހަމަޖައްސައިފައި އޮންނަ ފަންޑަކަށް ބަޔަކު ހިޔާނާތްތެރި ވެދާނެ ކަމަށް ހީވެސް ނުކުރެވޭނެ ނޫންތޯއެވެ.

އެ ހަބަރުގެ އެކޮޅު މި ކޮޅު ބަލައިލި އިރު، އެނގިގެން ދިޔައީ، ރައީސް އޮފީހުގެ އިސްވެރިންތަކެއް އެ ޓިވީ އުފެއްދުމުގެ މަސައްކަތުގައި ނިކަން އަވަދިނެތި އުޅުއްވާ ކަމެވެ.

އެމް.އެމް.ޓީވީ ނަމަކަށް ކިޔާ އެ ޓީވީ އަކީ ރައީސް މުއިއްޒު ޕްރޮމޯޓުކުރަން އުފެއްދި ޓީވީ ޗެނަލެއް ކަމަށްވެއެވެ. ޓީވީ ހިންގުމުގެ ހުއްދަ ދޫކޮށްފައިވާނީ މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކަށެވެ. އެ ކުންފުނިން ވަނީ މ. ސީރާޒީގޭ އިމާރާތުން 4 ފަންގިފިލާ ކުއްޔަށް ހިފާފައެވެ. އަދި އޭގެތެރެއިން 2 ފަންގިފިލާ އެންސްޕާއަށް ކުއްޔަށް ދޫކޮށް، ބާކީ 2 ފަންގިފިލާ އެ ކުންފުނީގެ ޓީވީ ސްޓޭޝަން ހިންގުމަށް ބޭނުންކުރަން ފެށިއެވެ. މިކަން ފަޅާ އެރުމުން، އެމްއެމްޓީވީ އާއި ރައީސް މުއިއްޒާ އެއްވެސް ގުޅުމެއް ނެތް ކަމަށް ސަރުކާރުން ހާމަކުރިއެވެ. އެކަން ހާމަކުރެއްވީ ސަރުކާރުގެ އިސް ތަރުޖަމާނު، ހީނާ ވަލީދެވެ. އެކަމެއް ތުހުމަތުވާ އިދާރަ ކަމުގައިވާ އެންސްޕާގެ ސީ.އީ.އޯ އަކީ ވެސް އޭނާއެވެ.

އެމްއެމްޓީވީ އާއި ރައީސް މުއިއްޒާ އެއްވެސް ގުޅުމެއް ނެތް ކަމަށް ސަރުކާރުން ބުނި ނަމަވެސް މޯލްޑިވްސް މީޑިއާ ހައުސްގައި ރައީސް މުއިއްޒުގެ ސީދާ މަސްލަހަތު އޮންނަކަށް ސާފުކޮށް ހާމަވެއެވެ.

އެމްއެމްޓީވީގެ މައި ކުންފުނި ރަޖިސްޓްރީކޮށްފައި ވަނީ، ރައީސް މުއިއްޒުގެ އަމިއްލަގެ މ. ދިމްޔާތު ބަލަހައްޓަން ހުންނަ، އެ މަނިކުފާނުގެ އާއިލީ ބޭފުޅެއް ކަމުގައިވާ ހއ، ވަށަފަރު އަބްދުﷲ ޒާހިރު އެވެ. އޭނާއަކީ މީގެ ކުރިން މީޑިއާގައި އުޅުއްވި އަދި އެ ދާއިރާގެ ވިޔަފާރިއެއް ކުރެއްވި ބޭފުޅެއް ވެސް ނޫނެވެ.

އޮފީސް އިމާރާތެއް ކުޔައްށް ހިފުމަށް، އެމްއެމްޓީވީ އާއި އެންސްޕާއާ ދެމެދު ވެވުނު ފަސް އަހަރުގެ އެއްބަސްވުމަކީ މަހަކަށް 580،000ރ. ގެ ރޭޓުން ކުލި ދައްކާ ގޮތަށް، އެކު ޖުމްލަ 34.8 މިލިއަން ރުފިޔާގެ އެއްބަސްވުމެކެވެ.

މި މުއާމަލާތުގެ ކަންކަން ސޯޝަލްމީޑިއާގައި ފަޅާއަރުވައިލުމާއެކު، އާންމުންނާއި އިދިކޮޅު ސިޔާސީ ފިކުރުގެ މީހުންގެ ފާޑުކިޔުން އަމާޒުވުމުން އެންސްޕާއިން ވަނީ އެއްބަސްވުން އުވާލާފަ އެވެ.

އޭރު އޮތީ އެންސްޕާގެ ފަންޑުން 34.8 މިލިއަން ރުފިޔާ ދޫކޮށްފައެވެ. އެއްބަސްވުން އުވައިލި ނަމަވެސް، އެ ފައިސާ އަބުރައި އެންސްޕާއަށް ލިބުނުކަން ކަށަވަރެއް ނޫނެވެ. އެންސްޕާ އިން އެ ފައިސާ އަނބުރާ ހޯދި ކަމެއް ނުވަތަ ނުހޯދާ ކަމެއްވެސް ހާމަނުކުރެއެވެ. އެ ވާހަކަ ނުވެސް ދައްކަނީއެވެ.

މި ކަމާ ގުޅިގެން އެއްވެސް މީހެއްގެ މައްސަލަ ބަލަން ފަށައިފައި ނުވެއެވެ. އެއްވެސް މީހަކާމެދު ފިޔަވަޅެއް އަޅައިފައި ނުވެއެވެ. އަދި އެންސްޕާއަށް ސީ.އީ.އޯ ހީނާ ވަލީދު މަގާމުން ވަކިކޮށް ނުވަތަ ސަސްޕެންޑްކޮށްފައެއް ވެސް ނުވެއެވެ.

އެހެންނަމަވެސް، މި ސަރުކާރުގެ ކޮރަޕްޝަންތަކުގެ ސިލްސިލާގެ ތެރެއިން ދެން ފެންމަތިވި ގޯތި ވައްކަމާ ގުޅިގެން، އެޗްޑީސީގެ ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ސަސްޕެންޑުކުރަން ރައީސް މުއިއްޒު ނިންމެވިއެވެ.

އިދިކޮޅު އެމްޑީޕީން، ޓޫރިސްޓު ރިސޯޓަކަށް ޓެރެރިސްޓް ހަމަލާއެއް ދޭން އުޅޭ ކަމަށް ބުނެ، ވެރިކަން ކުރާ ޕީއެންސީގެ ޖަލްސާއެއްގައި، ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ވާހަކަ ދެއްކުމާ ގުޅިގެން، ޖެހިގެން އައިދުވަހު ހެނދުނު، އޭނާ ސަސްޕެންޑުކުރަން ރައީސް މުއިއްޒު ނިންމެވިއެވެ. ވަރަށް އަވަސް ފިޔަވަޅެކެވެ. މިހައި ހިސާބުން އަޅުގަނޑުގެ ހަނދާނަށް އައީ އެންސްޕާގެ ފައިސާއިން ހިންގަންފެށި އެއްކަލަ ޓީވީގެ މަތިންނެވެ.

ފަގީރުންނާއި ނިކަމެތިންނަށް ދައުލަތުގެ ނަމުގައި އެހީތެރިވުމަށް ހަމަޖައްސައިފައި އޮންނަ އެންސްޕާގެ ފަންޑުން 34.8 މިލިއަން ރުފިޔާ ދީގެން އުފެއްދި ޓީވީ ޗެނަލްގެ މައްސަލަ މި ގޮތަކަށް ނުބަލައެވެ. އެކަން ކުރި އެއްވެސް މީހަކަށް ފިވަޅެއް ނާޅައެވެ. ސަސްޕެންޑެއް ނުކުރެއެވެ.

އެންސްޕާގެ ބޮޑު ކޮރަޕްޝަނުގެ ވާހަކަ އެމަނިކުފާނާ ހިސާބަށް އަދި ނާންނަ ކަމަށް ރައީސް މުއިއްޒު ވިދާޅުވި އެވެ. އެއީ ހިނގައިގެން އުޅޭ ކަމެއްކަން އެ މަނިކުފާނަށް އެނގިވަޑައި ގަންނަވާކަމަކަށް ވެސް ނުހެއްދެވިއެވެ.

މިހެން ކަމުން، ބެލެވެނީ، ހިނާ ވަލީދު ކުރެއްވި ކަމެއް ކުރެއްވީ ސީދާ ރައީސް މުއިއްޒުގެ އެންގެވުމަށް ކަމަށެވެ.

ހީނާ މަގާމުގައި ހުރެގެން އިތުރަށް ހޭދަވާ ކޮންމެ ދުވަހަކުން ދޭހަވަނީ އެންސްޕާގެ ވައްކަމަކީ ރައީސްގެ މުއިއްޒުގެ އެންގެވުމަށް ކުރި ކަމެއް ކަމެވެ.