ރައްޔިތުން ރުޅިގަދަވުމުން ޕްރައިވެޓް އިންޝުއަރެންސް އޮންނަ މީހުންނަށް ވެސް އާސަންދައިން ލިބޭގޮތަށް ހަދައިފި

ރައްޔިތުން ރުޅިގަދަވުމުން ޕްރައިވެޓް އިންޝިއުރެންސް އޮންނަ މީހުންނަށް ވެސް އާސަންދައިން ލިބޭގޮތަށް ހަދައިފިއެވެ.

ނެޝަނަލް ސޯޝަލް ޕްރޮޓެކްޝަން އެޖެންސީ އެންސްޕާ އިން ބުރާސްފަތި ދުވަހުގެ ރޭ މެންދަމު ނެރުނު ބަޔާނެއްގައި ބުނީ، ސިއްހީ ޚިދުމަތްދޭ މަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކުން ހޯދާ ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުމަށް ހަމަޖައްސާފައި ވާކަމަށެވެ.

އެންސްޕާ އިން ބުނާ ގޮތުގައި މިބަދަލާ ގުޅިގެން "އައުޓް ޕޭޝަންޓް" ގެ ޚިދުމަތްތައް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތެއްނަމަ، ފުރަތަމަ ބިލްކުރާނީ ޕްރައިވެޓް އިންޝުއަރެންސަށެވެ. އާސަންދަ ސްކީމުން އެޚިދުމަތުގެ އަގު ކަވަރުކުރާނީ، ޕްރައިވެޓް އިންޝުއަރެންސް ގެ ލިމިޓު ހަމަވުމުން ކަމަށްވެސް އެންސްޕާއިން ބުނެފައިވެއެވެ.

ނަމަވެސް ހުކުރު ދުވަހުން ފެށިގެން ޕްރައިވެޓް އިންޝުއުރެންސް އޮންނަ ފަރާތްތަކަށް އާސަންދައިން ބާކީ ބައި ކަވަރު ނުކޮށް އަތުން ބޮޑު ހަރަދެއް ކުރަންޖެހި އާންމުން ރުޅިގަދަވެ ސޯޝަލް މީޑިއާ ބަންޑުންކޮށްލިއެވެ. މިއާއެކު އެންސްޕާއިން ވަނީ އަނެއްކާވެސް ބަޔާނެއް ނެރެފައެވެ.

އެންސްޕާއިން ފަހުން ނެރުނު ބަޔާނުގައި ބުނެފައިވަނީ ސިއްހީ ހިދުމަތްދޭ އަމިއްލަ ތަންތަނުން "އައުޓް-ޕޭޝަންޓް" ގެ ހިދުމަތްތަކަށް ބިލް ކުރުމުގައި ޕްރައިވެޓް އިންޝިއުރެންސް އަށް އިސްކަން ދިނުމާއި ގުޅޭގޮތުން އެ އެޖެންސީން ކުރިން ނެރުނު އިއުލާނުގައިވެސް ބަޔާންކޮށްފައިވާ ގޮތަށް އެއްވެސް ފަރާތަކަށް ޕްރައިވެޓް އިންޝުއުރެންސްގެ ކަވަރޭޖް ނުވަތަ ހިދުމަތް ނުލިބޭ ހާލަތެއްގައިނަމަ އެ ފަރާތްތަކަށް އާސަންދަ ސްކީމުން މިހާރުވެސް ހިދުމަތް ލިބެމުންދާގޮތަށް ބޭސްފަރުވާގެ ހިދުމަތް ލިބޭނެ ކަމަށެވެ.

އަދި އަމިއްލަ އިންޝުއުރެންސް ކުންފުނިތަކުން ކޭޝްލެސް ޕޭމަންޓް ހުއްޓާލުމުގެ ސަބަބުންކަމުގައި ވިޔަސް، އަމިއްލަ އިންޝުއަރެންސް ޕޮލިސީ އިން ކަވަރޭޖް ނުލިބި، އަމިއްލަ ޖީބުން ފައިސާދައްކަން ޖެހޭ ހުރިހާ ހާލަތެއްގައި، އާސަންދައިގެ ކަވަރޭޖް ކުރިއެކޭވެސް އެއްގޮތަކަށް ލިބިގެންދާނެ ކަމަށެވެ.

އެންސްޕާއިން ވަނީ އެ އެޖެންސީން ގެނައި ބަދަލުގެ ސަބަބުން ރައްޔިތުން އަމިއްލަ ޖީބުން ފައިސާ ދައްކަމުންދާ ވާހަކަތައް ސޯޝަލް މީޑިއާގައި ހިއްސާކުރަމުންދާތީ އެއީ ދޮގެއްކަމަށް ބުނެ ކަންބޮޑުވުން ފާޅުކޮށްފައެވެ.