ހީނާ ވަލީދުގެ މައްޗަށް ތުހުމަތު ކުރެވިފައިވާ ކަރަޕްޝަންގެ މައްސަލައިގައި އަޅުގަނޑު ބައިވެރިއެއް ނުވަން: ޝިއުނާ

ހީނާ ވަލީދުގެ މައްޗަށް ތުހުމަތު ކުރެވިފައިވާ ކަރަޕްޝަންގެ މައްސަލައިގައި ބައިވެރިވެފައި ނުވާނެ ކަމަށް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ޑެޕިއުޓީ ޗީފް އެގްޒެކެޓިވް އޮފިސަރގެ މަގާމުން ބުރާސްފަތި ދުވަހު މެންދުރުފަހު ވަކި ކުރި ފާތުމަތު ޝިއުނާ ބުނެފިއެވެ.

ޑެޕިއުޓީ ސީއީއޯ ގެ މަގާމުން ވަކި ކުރުމާ ގުޅިގެން ޝިއުނާ ނެރުނު ބަޔާނެއްގައި ބުނެފައިވަނީ، އޭނާ މަގާމުން ވަކި ކުރި ދަނޑިވަޅަކީ އެންސްޕާގެ ސީއީއޯ ހީނާ ވަލީދުގެ މައްޗަށް ކުރެވިފައިވާ ކަރަޕްޝަންގެ ތުހުމަތުގެ އިތުރުން ސަރުކާރުގެ މައްޗަށް ކަރަޕްޝަންގެ ގިނަ ތުހުމަތު ތަކެއް އަމާޒު ވެފައިވާ ދަނޑިވަޅެއް ކަމަށާއި، ސަރުކާރަށް އަމާޒުވާ ކަރަފްޝަންގެ އެއްވެސް މައްސަލަ އެއްގައި އޭނާގެ ބައިވެރިވުމެއް ނޯންނާނެ ކަމުގެ ޔަގީންކަން ދޭ ކަމުގައެވެ.

"ސަރުކާރަށް އަމާޒުވާ އެއްވެސް ކަރަޕްޝަންގެ މައްސަލައެއްގައި އަޅުގަނޑުގެ ބައިވެރިވުމެއް ނޯންކަމުގެ ފުރިހަމަ ޔަގީންކަން އަރުވަމެވެ." ޝިއުނާގެ ބަޔާނުގައި ވެއެވެ.

ޝިއުނާ މަގާމުން ވަކި ކުރި ދަނޑިވަޅަކީ ރައީސް މުއިއްޒު އަޑީގައި ހުންނަވައިގެން އުފެއްދި ކަމަށް އަޑު އަރާފައިވާ އެމްއެމްޓީވީ އާއި އެންސްޕާއާ ދެމެދު ވެވުނު ފަސް އަހަރުގެ އެއްބަސްވުމެއްގެ ދަށުން މަހަކަށް 580،000ރ. ގެ ރޭޓުން ކުލީގެ ގޮތުގައި އެމްއެމްޓީވީ ހިންގަން އެންސްޕާ އިން ޚަރަދު ކުރާގޮތައް، ޖުމްލަ 34.8 މިލިއަން ރުފިޔާގެ އެއްބަސްވުމެއް ހެދިކަން ފަޅާއަރާފައިވާ ދަނޑިވަޅެކެވެ. މި އެއްބަސްވުމުގެ މައުލޫމާތު އާންމު ވުމުން ކުއްލި ގޮތަކަށް އެންސްޕާ އިން އެ އެއްބަސްވުން އުވާލި ކަމަށް ވަނީ ބުނެފައެވެ.

ޝިއުނާގެ ބަޔާނުގައި ބުނެފައިވަނީ އެންސްޕާގެ ޑެޕިއުޓީ ޗީފް އެގްޒެކެޓިވް އޮފިސަރަކަށް އައްޔަން ކުރެވުނު ތާރިޚުން ފެށިގެން، އެމްއެމްޓީވީ އާ އެކު ބޭއްވި އެއްވެސް ބައްދަލުވުމެއްގައި ބައިވެރިވެފައި ނުވާނެ ކަމަށެވެ.

ސަރުކާރުން ކޮރަޕްޝަންގެ އަމަލުތައް ފޮރުވުމަށް ކުރާ މަސައްކަތްތައް ހަރުކަށި އިބާރާތުން ކުށްވެރި ކުރާ ކަމަށް ވެސް ޝިއުނާގެ ބަޔާނުގައި ބުނެފައިވެއެވެ.