އާސަންދަ ކުންފުނީގެ އޮނިގަނޑަށް ގެންނަ ބަދަލާ އެކު މުވައްޒަފުންގެ މެދުގައި ނުތަނަވަސް ކަމާއި ކަންބޮޑުވުން
ޕެޓިޝަންގައި ކުންފުނީގެ ފަންސާހަކަށް މުވައްޒަފުން ސޮއި ކޮށްފައިވޭ
2023 - ޑިސެމްބަރު 12 - އާމިނަތު ޒީނިޔާ، އަސަންދައިގެ މެނޭޖިންގ ޑިރެކްޓަރ (މ) މަޖިލިސްގެ އެސްއޯއީ ކޮމިޓީގައި
އާސަންދަ ކުންފުނީގެ އޮނިގަނޑަށް ގެންނަން އުޅޭ ބަދަލާ ގުޅިގެން މުވައްޒަފުންގެ މެދުގައި އޮތް ހިތްހަމަ ނުޖެހުމާއި ކަންބޮޑުވުން ފާޅުކޮށް ރައީސް ޑރ. މުއިއްޒު އަށް ޕެޓިޝަނެއް ހުށަހަޅައިފިއެވެ.
އެ ކުންފުނީގެ ފަންސާހަކަށް މުވައްޒަފުން ސޮއިކޮށް ހުށަހަޅާފައި އެ ޕެޓިޝަންގެ ކޮޕީ މި ނޫހަށް ފެނިފައިވާ އިރު، އެ ޕެޓިޝަން ހުށަހެޅީ އާސަންދަ ކުންފުނީގެ މެނޭޖްމަންޓުން ކޭސް ޕްރޮސެސިންގ ޑިޕާޓްމަންޓް އުވާލައި ސުޕަވައިޒަރުންގެ މަޤާމުތައް އުވާލުމަށް ނިންމުމާ ގުޅިގެން މުވައްޒަފުންގެ މެދުގައި އުފެދިފައިވާ ބޮޑެތި ކަންބޮޑުވުންތައް ފާޅުކޮށް އެކަން ހައްލު ކުރުމަށް ކަމަށް ބުނެފައިވެއެވެ.
ޕެޓިޝަންގައި ބުނެފައިވާ ގޮތުގައި 1 ފެބްރުއަރީ 2025 ގައި ޢަމަލުކުރަން ފަށާ މި ބަދަލުތަކުން 60 އަށްވުރެ ގިނަ މުވައްޒަފުންގެ ވަޒީފާ އަށް ނޭދެވޭ އަސަރު ކުރުމުގެ އިތުރުން އާސަންދައިގެ ޚިދުމަތައްވެސް އެކަމުގެ ނޭދެވޭ އަސަރު ކުރާނެ ކަމަށެވެ.
އަސަންދައިން އެތަނުގެ އޮނިގަނޑަށް ގެންނަ ބަދަލުގެ ނަތީޖާ އެއްގެ ގޮތުން ގިނަ ދުވަސްވީ ސުޕަވައިޒަރުންގެ މަޤާމުގެ ބަދަލުގައި އެންމެ ޝިފްޓް އިންޗާޖެއްގެ މަޤާމު ތައާރުފް ކޮށް، ގިނަ މުވައްޒަފުންތަކެއް އެމީހުންނަށް އެކަށީގެންނުވާ މަޤާމުތަކަށް ބަދަލުކުރުމަށް ނިންމާފައިވާ ނިންމުމާ މެދު މުވައްޒަފުންގެ މެދުގައި ވަރަށް ބޮޑު ހިތްހަމަނުޖެހުމަކާއި ނުތަނަވަސް ކަމެއް އުފެދިފައިވާ ކަމަށް ޕެޓިޝަން ގައި ބުނެފައިވެއެވެ.
ޕެޓިޝަންގައި ފާހަގަ ކޮށްފައިވާ ގޮތުގައި ކޭސް ޕްރޮސެސިންގ ޑިޕާޓްމަންޓަކީ ރައްޔިތުންނަށް ކުންފުނިން ފޯރުކޮށްދޭ ސިއްހީ ޚިދުމަތްތަކާ ގުޅޭ ކޭސްތައް ބަލަހައްޓާ ޙައްލުކުރުމުގައި މުހިންމު ދައުރެއް އަދާކުރާ ޑިޕާޓްމަންޓެކެވެ. ނަމަވެސް، 20 ޖަނަވަރީ 2025 ގައި މެނޭޖިންގ ޑިރެކްޓަރ އާމިނަތު ޒީނިޔާ މި މުހިންމު ޑިޕާޓްމަންޓް އުވާލުމަށް ނިންމާފައިވާ ކަމަށް އިއުލާނު ކުރައްވާފައިވާ ކަމަށް ބުނެފައިވެއެވެ.
"އަހަރުތަކެއް ވަންދެން ޚިދުމަތްކޮށް، ތަޖުރިބާ ލިބިފައިވާ މުވައްޒަފުންނަށް އަންގާފައިވަނީ އެމީހުންގެ ހުނަރާއި ޚިދުމަތްތަކާ ނުގުޅޭ މަޤާމުތަކަށް، އޭގެ ތެރޭގައި ކައުންޓަރުތަކާއި ކޯލް ސެންޓަރުތަކާއި ޕްރޮސެސިންގ ހިމެނޭގޮތަށް، ބަދަލުކުރެވޭނެ ކަމަށެވެ." ޕެޓިޝަންގައި ވެއެވެ.
މި ބަދަލުތައް ގެންނަން ނިންމީ "އެކަށީގެންވާ މަޝްވަރާ އެއް ނުވަތަ އެކަމުގެ ބޭނުންތެރިކަން ސާފުކޮށް ބަޔާންކުރުމަކާ" ނުލާ ކަމަށް ވެސް ބުނެފައިވެއެވެ.
ކުންފުނިން އަމަލު ކުރި ގޮތުގެ ސަބަބުން މުވައްޒަފުންނަށް ދޭހަވަނީ އެމީހުންނަކީ އަގެއް ނެތް، އަދި އެމީހުންގެ އަޑު އިއްވަން ނުޖެހޭ ބައެއްގެ ގޮތުގައި ކަމަށާއި އެކަމުގެ ސަބަބުން މުވައްޒަފުންގެ ހިތްވަރު ގެއްލިފައިވާ ކަމަށްވެސް ޕެޓިޝަންގައި ވެއެވެ.
"މަތީގައި ބަޔާންކޮށްފައިވާ ކަންބޮޑުވުންތަކަށް ރިޢާޔަތްކޮށް، އަޅުގަނޑުމެން އިޙްތިރާމާއެކު ރައީސުލްޖުމްހޫރިއްޔާ އަށާއި، ޕީ.ސީ.ބީ އަދި އާސަންދަ ކުންފުނީގެ ބޯޑުގެ ކަމާބެހޭ ފަރާތްތަކަށް މި މުހިންމު މައްސަލައިގައި، ޙައްލު ހޯދައިދެއްވުމަށް އެދި އިލްތިމާސްކުރަމެވެ." ޕެޓިޝަންގައި ވެއެވެ.
ކޭސް ޕްރޮސެސިންގ ޑިޕާޓްމަންޓް އުވާލުމާއި، ސުޕަވައިޒަރުންގެ މަޤާމުތައް ނައްތާލުމާއި، އަދި އެއާ ގުޅިގެން ގިނަ މުވައްޒަފުންތަކަކަށް ކުރިމަތިވެދާނެ މާލީ އަދި ވަޒީފާގެ މައްސަލަތަކުގެ ސަބަބުން މުވައްޒަފުންގެ ހިތްވަރު ދަށްވެ، މެނޭޖްމަންޓަށް އޮތް އިތުބާރު ގެއްލި، އަދި ރައްޔިތުންނަށް ފޯރުކޮށްދެވޭ ޚިދުމަތުގެ ފެންވަރަށް ނޭދެވޭ އަސަރުކޮށްފާނެ ކަމުގެ ކަންބޮޑުވުން ޕެޓިޝަންގައި ވަނީ ފާޅު ކޮށްފައެވެ.
"މުވައްޒަފުންގެ ޙައްޤުތައް ރައްކާތެރިކުރުމަށާއި، ކުންފުނީގެ އިންޓެގްރިޓީ ދެމެހެއްޓުމަށާއި، އަދި ސަރުކާރުން ހާމަކަން ބޮޑު ގޮތެއްގައި، ހަމަހަމަކަމާއެކު، އަދި ފެންވަރު ރަނގަޅު ޚިދުމަތްތަކެއް ރައްޔިތުންނަށް ފޯރުކޮށްދިނުމަށް ވެފައިވާ ވަޢުދުތައް ފުއްދުމަށް ބޭނުންވާ ފިޔަވަޅުތައް އަޅުއްވާނެ ކަމަށް އަޅުގަނޑުމެން އުންމީދުކުރަމެވެ."
ޕެޓިޝަންގައި ސޮއިކޮށްފައިވާ މުވައްޒަފުން ބުނެފައިވަނީ އެ ފަރާތްތަކުން އެދެނީ މިކަމަށް އަވަސް އިޖާބައެއް ދީ، މި މައްސަލަތައް އަވަހަށް ޙައްލުކޮށްދިނުން ކަމުގައެވެ.
