ތުހުމަތުތަކަކަށް ރައްދު ދިނުމުގައި އާއްމު ކުރި މައުލޫމާތަށް އެންސްޕާއިން މައާފަށް އެދިއްޖެ

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން ބަލި މީހަކަށް އެހީ ނުދިން ކަމަށް ބުނެ، ކޮށްފައިވާ ތުހުމަތުތަކާއި ގުޅިގެން ރައްދު ދިނުމުގައި އާއްމު ކުރި މައުލޫމާތަށް އެ އެޖެންސީން މައާފަށް އެދިއްޖެއެވެ.

ސޯޝަލް މީޑިއާގައި ދައުރުވެފައިވާ ޕޯސްޓުގައި ބުނެފައިވަނީ ކެންސަރަށް ފަރުވާ ހޯދަމުން އަންނަ މީހަކަށް ކުރީ ސަރުކާރުގައި އެންސްޕާއިން ދިން ފައިސާގެ އަދަދަށް ވުރެ މަދުން ފައިސާ ދޭ ކަމަށެވެ. މި ތުހުމަތުތަކާއި ގުޅިގެން އެންސްޕާއިން ވަނީ އެމީހާއަށް ފޯރުކޮށްދީފައިވާ އެހީގެ ތަފްސީލުތައް ހާމަކޮށްފައެވެ.

މިމައްސަލައާ ގުޅިގެން އަންގާރަ ދުވަހު އެންސްޕާއިން ބުނީ، މިއީ ރާއްޖޭގެ ރައްޔިތުންގެ އިޖްތިމާއީ ރައްކާތެރިކަމަށާއި، ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ހިންގަމުންދާ އެޖެންސީއެއް ކަމަށެވެ.

އެންސްޕާއިން ބުނީ ބަލި މީހަކަށް އެހީ ނުދިންކަމަށް ބުނެ، ސޯޝަލް މީޑިއާގައި ދޮގު މައުލޫމާތު ފަތުރާ މި އެޖެންސީ ބަދުނާމުވާ ގޮތަށް ފެތުރެމުންދިޔަ ވާހަކަތަކާ ގުޅިގެން އެކަން ހިނގާފައިވާ ގޮތުގެ ތަފްސީލު ހާމަކުރުމުގެ ގޮތުން ބަޔާނެއް ނެފައިވާ ކަމަށެވެ.

މި ބަޔާނުގައި ބަލިމީހާގެ އެއްވެސް އައިޑެންޓިޓީ އެއް ބަޔާންކޮށްފައި ނެތްނަމަވެސް އެބަޔާނުގައި ބަލިމީހާއަށް ދީފައިވާ އެހީގެ މައުލޫމާތު ހިމަނާފައިވާ ކަމަށެވެ. އެއީ އެންމެ ރަނގަޅު ގޮތް ކަމުގައި ނުވުމާއެކު އެފަދަ މައުލޫމާތެއް ހިމެނިފައިވާތީ އެކަމަށް މައާފަށް އެދޭ ކަމަށް އެންސްޕާއިން ބުނެފައިވެއެވެ.