ބާލިން ބަލިކޮށް، ބަޔާން އެއް ވަަނައިގައި

ޖަރުމަނު ލީގުގަައި ޔޫނިއަން ބަރލިންއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން އެއް ވަނައިގައި ލީޑު ނަގައިފި އެވެ.

ބަޔާާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބަޔާނުން ވަނީ ދެ ލަނޑު ޖަހައިފަ އެވެ. އަދި އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 15 ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ ބަޔާނަށް ލިބުނު ޕެނަލްޓީ ކާމިޔާބު ކޮށްގެން ކޭން ޖެހި ލަނޑެކެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ބަޔާންގެ ދެ ވަނަ ލަނޑު ޖެހީ ކިންގްސްލީ ކޯމަން އެވެ. އޭނާ އެ ލަނޑު ޖެހީ ކޭން ތަނަވަސްކޮށްދިން ފުރުސަތެއްގަ އެވެ. މެޗުގައި ބަޔާންގެ ތިން ވަނަ ލަނޑު، ދެ ވަނަ ހާފު ފަށައިގެން ހަ ވަނަ މިނެޓުގައި ޖެހީ ކޭން އެވެ. އެ ލަނޑު ޖަހަން ކޭން އަށް ފުރުސަތު ތަނަވަސްކޮށްދިނީ ކޯމަން އެވެ.

ބަޔާންގައި މޮޅު ކުޅުމެއް ދައްކަމުން އަންނަ ކޭން ވަނީ މި ސީޒަންގެ މިހާތަނަށް ބަޔާނަށް ކުޅެދިން 14 މެޗުގައި 17 ލަނޑު ޖަހައިފަ އެވެ. އޭގެ ތެރެއިން 11 ލަނޑަކީ ޖަރުމަނު ލީގުގައި އޭނާ ޖަހާފައިވާ ލަނޑުތަކެވެ. މި ސީޒަންގެ ޖަރުމަނު ލީގުގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ކުރީގައި އޮތީ ވެސް ކޭން އެވެ.

މޮޅާއެކު ބަޔާން ވަނީ އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ. އެއީ މިހާތަނަށް ކުޅުނު ނުވަ މެޗުން 23 ޕޮއިންޓު ހޯދައިގެންނެވެ. ހަތް މެޗުން ބަޔާން މޮޅުވެފައިވާއިރު، އަނެއް ދެ މެޗުން ވަނީ އެއްވަރުވެފަ އެވެ. ބަޔާންގެ ފަހަތުން ދެ ވަނައިގައި އޮތް އާރްބީ ލައިޕްޒިގަށް ނުވަ މެޗުން ލިބެނީ 20 ޕޮއިންޓެވެ.