ފެނަކައިގެ 2024 ވަނަ އަހަރުގެ މާލީ ބަޔާނުގައި ބޮޑެތި މައްސަލަތަކެއް، ރައުޔެއް ދެވެން ނެތްކަމަށް ކަނޑައަޅައި އޮޑިޓް ރިޕޯޓު ނެރެފި!
11 ނޮވެމްބަރު 2026 | ބުދަ 16:54ފެނަކައިގެ މާލީ ހިސާބުތަކުގެ ސައްހަކަން ކަށަވަރުކުރެވޭނެ އެކަށީގެންވާ ހެކި ނެތުމުން، އެ ކުންފުނީގެ 2024 ވަނަ އަހަރުގެ މާލީ ބަޔާންތަކާ މެދު ރައުޔެއް ފާޅުކުރެވެން ނެތް ކަމަށް އޮޑިޓަރ ޖެނެރަލް ވަނީ ކަނޑައަޅުއްވާފައި. ކުންފުނީގެ ދަރަނި 3.9 ބިލިއަން ރުފިޔާއަށް އަރައި ހިންގުމުގެ ގާބިލުކަމާ މެދު ސުވާލު އުފެދިފައިވާއިރު، މުދަލާއި އިންވެންޓްރީ ބެލެހެއްޓުމުގައި ވެސް ބޮޑެތި އިހުމާލުތަކެއް ހުރިކަން އޮޑިޓުން ވަނީ ހާމަވެފައި
ފެނަކަ ކޯޕަރޭޝަން ލިމިޓެޑް | ކޯޕަރޭޓް މޯލްޑިވެސް
ފެނަކަ ކޯޕަރޭޝަން ލިމިޓެޑްގެ 2024 ވަނަ އަހަރުގެ މާލީ ބަޔާންތަކަށް އޮޑިޓަރ ޖެނެރަލްގެ ރައުޔެއް ދެވެން ނެތް ކަމަށް ކަނޑައަޅައި އޮޑިޓް ރިޕޯޓް ނެރެފި އެވެ.
އޮޑިޓަރ ޖެނެރަލް ހުސައިން ނިޔާޒީ ސޮއިކުރައްވައި ނޮވެމްބަރު 1، 2026 ގައި ނެރުއްވި މި ރިޕޯޓުގައި ބުނެފައިވަނީ، ކުންފުނީގެ މާލީ ހިސާބުތަކުގެ ސައްހަކަން ކަށަވަރު ކުރުމަށް ބޭނުންވާ އެކަށީގެންވާ ހެކި ލިބިފައި ނުވާތީ، އެ ބަޔާންތަކާމެދު ވަކިގޮތަކަށް ރައުޔެއް ފާޅުކުރެވެން ނެތް ކަމަށެވެ. މިއީ ކުންފުނީގެ މާލީ ހިންގުމުގައި ބޮޑެތި މައްސަލަތަކެއް ހުރިކަން ހާމަވާ ކަމެކެވެ.
އޮޑިޓް ރިޕޯޓުގައި ފާހަގަކޮށްފައިވާ އެންމެ ބޮޑު އެއް މައްސަލައަކީ 2024 ވަނަ އަހަރުގެ ފެށޭ ބެލެންސްތަކާއި 2023 ވަނަ އަހަރުގެ އަޅާކިޔާ ހިސާބުތަކުގެ ސައްހަކަން ކަށަވަރު ނުވުމެވެ. މީގެ ކުރީގެ އަހަރުތަކުގައި ވެސް ފެނަކައިގެ އޮޑިޓް ރިޕޯޓްތަކަށް ރައުޔެއް ދެވެން ނެތް ކަމަށް ނިންމާފައިވާތީ، މާލީ ބަޔާންތަކުގައި ހިމެނޭ ހިސާބުތަކަކީ އިތުބާރު ހުރި ހިސާބުތަކެއް ކަމަށް ބެލެވެން ނެތް ކަމަށް އޮޑިޓަރ ޖެނެރަލް ވިދާޅުވެފައިވެ އެވެ. މީގެ އިތުރުން، 2024 ވަނަ އަހަރުގެ ތެރޭގައި ހިނގާފައިވާ ޖާނަލް އެންޓްރީތަކުގެ ފުރިހަމަ ތަފްސީލު އޮޑިޓަށް ފޯރުކޮށްދީފައި ނުވާކަން ވެސް ރިޕޯޓުގައި ފާހަގަކޮށްފައިވެ އެވެ.
ކުންފުނީގެ އާމްދަނީއާއި ޚަރަދުތަކާ ގުޅޭގޮތުން ވެސް ބޮޑެތި ކަންބޮޑުވުންތަކެއް އޮޑިޓް ރިޕޯޓުގައި ވަނީ ހިމަނާފަ އެވެ. އެގޮތުން ސަބްކޮންޓްރެކްޓް މަޝްރޫއުތަކުން ލިބުނު 36.8 މިލިއަން ރުފިޔާގެ އާމްދަނީއާއި އެ މަޝްރޫއުތަކަށް ހިނގި 357.9 މިލިއަން ރުފިޔާގެ ޚަރަދު ހިސާބުކުރުމުގައި އެކަށީގެންވާ ނިޒާމެއް ނެތްކަން ވަނީ ފާހަގަވެފަ އެވެ. އަދި ސަރުކާރުންދޭ ސަބްސިޑީގެ ގޮތުގައި ހިމަނާފައިވާ 789 މިލިއަން ރުފިޔާގެ ތެރެއިން މިސްކިތްތަކުގެ ޓެރިފްގެ ގޮތުގައި ހިމެނޭ 20.5 މިލިއަން ރުފިޔާއާ ގުޅޭ ރަސްމީ އެއްބަސްވުމެއް ނެތްކަން ވެސް އޮޑިޓުން ވަނީ ދައްކާފަ އެވެ.
ފެނަކައިގެ މުދަލާއި އިންވެންޓްރީ ބެލެހެއްޓުމުގައި ވެސް ބޮޑެތި އުނި ކަންތައްތަކެއް ހުރިކަން ރިޕޯޓުން ހާމަވެ އެވެ. ކުންފުނީގެ ފިކްސްޑް އެސެޓް ރަޖިސްޓްރީއާއި މާލީ ބަޔާނާ ދެމެދު 147.5 މިލިއަން ރުފިޔާގެ ފަރަގެއް ހުރި އިރު، 1.6 ބިލިއަން ރުފިޔާގެ ކެޕިޓަލް ވޯކް އިން ޕްރޮގްރެސްގެ ސައްހަކަން ވެސް ކަށަވަރުކުރެވިފައެއް ނުވެ އެވެ. މީގެ އިތުރުން، 530 މިލިއަން ރުފިޔާގެ އިންވެންޓްރީ ހުރި ކަމަށް ބަޔާންކޮށްފައިވީ ނަމަވެސް، އޭގެ ތެރެއިން 444.5 މިލިއަން ރުފިޔާއަކީ ނެގެޓިވް ބެލެންސްގެ ގޮތުގައި ހުރި ހިސާބުތަކެއް ކަމަށް އޮޑިޓް ރިޕޯޓުގައި ބުނެފައިވެ އެވެ.
މާލީ ހާލަތަށް ބަލާއިރު، 2024 ވަނަ އަހަރު ނިމުނުއިރު ފެނަކައަށް ވަނީ 547 މިލިއަން ރުފިޔާގެ ބޮޑު ގެއްލުމެއް ވެފަ އެވެ. މިއީ 2023 ވަނަ އަހަރު ލިބުނު 811 މިލިއަން ރުފިޔާގެ ގެއްލުމާ އަޅާބަލާއިރު ކުޑަ އަދަދެއް ނަމަވެސް، ކުންފުނީގެ ދަރަނި ވަނީ އިންތިހާއަށް އިތުރުވެފަ އެވެ. ކުންފުނީގެ ކަރަންޓް ލައިބިލިޓީސް ނުވަތަ ކުރު މުއްދަތުގެ ދަރަނި 3.9 ބިލިއަން ރުފިޔާއަށް އަރާފައިވާއިރު، މިއީ ކުންފުނީގެ މިލްކިއްޔާތަށްވުރެ 2.7 ބިލިއަން ރުފިޔާ އިތުރު އަދަދެކެވެ. މި ސަބަބުތަކާ ހުރެ ކުންފުނި ހިންގުމުގެ ގާބިލުކަމާ މެދު އޮޑިޓަރ ޖެނެރަލް ވަނީ ސުވާލު އުފައްދަވާފަ އެވެ.
ކުންފުނީގެ އިދާރީ ހިންގުމަށް ބަލާއިރު، 1.4 ބިލިއަން ރުފިޔާ އިދާރީ ޚަރަދުގެ ގޮތުގައި ހިނގާފައިވާއިރު، އޭގެ ތެރެއިން 398.4 މިލިއަން ރުފިޔާގެ ޚަރަދަށް ބޭނުންވާ އެކަށީގެންވާ ލިޔެކިޔުން ފޯރުކޮށްދެވިފައެއް ނުވެ އެވެ. އަދި ކުންފުނިން އެކި ފަރާތްތަކަށް ދައްކަންޖެހޭ ފައިސާގެ ތެރޭގައި ހިމެނޭ 3.5 ބިލިއަން ރުފިޔާގެ ޓްރޭޑް ޕޭއަބަލްސްގެ ސައްހަކަން ވެސް ކަށަވަރުކުރެވިފައި ނުވާކަން ރިޕޯޓުގައި ފާހަގަކޮށްފައިވެ އެވެ. މީގެ އިތުރުން، ކުންފުނީގެ ހިއްސާގެ ރައުސްމާލުގެ ގޮތުގައި ބަޔާންކޮށްފައިވާ 2.5 ބިލިއަން ރުފިޔާއާއި އިގުތިސާދީ ތަރައްގީއާ ބެހޭ ވުޒާރާގައި ރަޖިސްޓްރީކޮށްފައިވާ 750 މިލިއަން ރުފިޔާއާ ދެމެދު ބޮޑު ފަރަގެއް ހުރިކަން ވެސް ވަނީ ހާމަވެފަ އެވެ.
އޮޑިޓް ރިޕޯޓުގައި އިތުރަށް ބުނެފައިވަނީ، ފެނަކައިގެ ހިންގުން ހަރުދަނާ ކުރުމުގެ ގޮތުން ސަރުކާރުން ނިންމާފައިވާ ނިންމުމާ އެއްގޮތަށް، ކުންފުނީގެ ބައެއް އޮޕަރޭޝަންތައް ސްޓެލްކޯއާއި އެމްޑަބްލިއުއެސްސީއަށް ބަދަލުކުރުމުގެ މަސައްކަތް ފަށާފައިވާ ކަމަށެވެ. އެގޮތުން 2026 ވަނަ އަހަރުގެ ސެޕްޓެމްބަރު މަހު ބައެއް ޚިދުމަތްތައް ސްޓެލްކޯއަށް ބަދަލުކުރުމަށް ބޯޑުން ނިންމާފައިވާއިރު، އައްޑޫ ސިޓީއާއި ފުވައްމުލަކު ސިޓީގެ ފެނާއި ނަރުދަމާގެ ޚިދުމަތް އެމްޑަބްލިއުއެސްސީއަށް ބަދަލުކުރުމަށް ވެސް ވަނީ ނިންމާފަ އެވެ. ނަމަވެސް މި ބަދަލުތަކުގެ ސަބަބުން މާލީ ގޮތުން ކުރާނެ އަސަރު އަދި އަންދާޒާ ކުރެވިފައިނުވާ ކަމަށް ރިޕޯޓުގައި ބަޔާންކޮށްފައިވެ އެވެ.
