ހުޅުމާލޭ ދެވަނަ ފިޔަވަހީގައި ޤާއިމުކުރި ޕެޓް ކެއަރ ފެސިލިޓީ ހުޅުވައިފިއެވެ.

މި ފެސިލިޓީ ހުޅުއްވައިދެއްވީ، މިކަމަށްޓަކައި ހޮނިހިރު ދުވަހު ހަވީރު ބޭއްވި ރަސްމިއްޔާތެއްގައ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ބެލުމުގެ ދަށުން ކުރީގެ ފަރުކޮޅުފުށި އޮތް ސަރަހައްދުން 5000 އަކަފޫޓުގެ ބިމެއްގައި ގާއިމު ކުރި މި ފެސިލިޓީއަކީ މާލެ ސަރަޙައްދުގެ މަގުތަކުގައި އުޅޭ ބުޅާތައް ގެންދިއުމަށް ހެދި ތަނެއް ކަމަށް ސަރުކާރުން ބުނެއެވެ.

މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ޕެޓް ކެއަރ ފެސިލިޓީ ހުޅުވުމުން މަގުމަތީގައި ބުޅާ ގިނަވާ މައްސަލައަށް އެދެވޭ ޙައްލެއް ލިބިގެންދާނެކަމަށެވެ.

ސަރުކާރުގެ 100 ދުވަހުގެ ވައުދެއްގެ ގޮތުގައި ޕެޓް ކެއަރ ފެސިލިޓީ ހުޅުވުން ހިމަނާފައިވާއިރު، ސަރުކާރުން ބުނެފައިވަނީ މި ފެސިލިޓީ ގާއިމު ކޮށްފައިވަނީ ސަރުކާރުން ބިމާއި ފައިސާ ހަމަ ޖައްސައި ދިނުމުން އެނިމަލް ވެލްފެއަރ މިނިސްޓްރީ އާއި މާލޭ ސިޓީ ކައުންސިލު ގުޅިގެން ކަމުގައެވެ.

މި ފެސިލިޓީ އިތުރަށް ފުޅާ ކުރުމަށް ބުޅަލާއެކު އާންމުންނަށް ވަގުތު ހޭދަކޮށްލެވޭ ގޮތަށް ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއްވެސް ހުޅުވާނެ ކަމަށް ސަރުކާރުން ވަނީ ހާމަކޮށްފައެވެ.

ސަރުކާރުން ބުނާ ގޮތުގައި މި ހުޅުވި ފެސިލިޓީން ކާން ދިނުމުގެ އިތުރުން، އާންމު ޗެކްއަޕްތަކާއި، ފަރުވާތަކާއި، އަދި އޮޕަރޭޝަންތަކާއި، ބޭސް ދިނުން ފަދަ ޚިދުމަތްތައް ބުޅަލަށް ލިބޭނެއެވެ. މީގެ އިތުރުން އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓު ކުރެވޭނެ ކަމަށާއި، އޮޕަރޭޝަނަށްފަހު ބުޅާ އެޑްމިޓް ކޮށްގެން ބެލެހެއްޓުމުގެ ޚިދުމަތްވެސް ލިބޭނެ ކަމަށް ވަނީ ބުނެފައެވެ.