ގިނަ ދިވެހިންގެ އިތުބާރު ހޯދާފައިވާ "އީވް ކްލިނިކް"ގެ އާ އައުޓްލެޓެއް މާލޭގައި ހުޅުވައިފި
އީވް ކްލިނިކްގެ އާ އައުޓްލެޓް "އީވް ކްލިނިކް ވެސްޓް ޕާކް" ހުޅުވާދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ.
"އީވް ކްލިނިކް"ގެ އާ އައުޓްލެޓް ހުޅުވުން
ގިނަ ދިވެހިންގެ އިތުބާރު ހޯދާފައިވާ ކްލިނިކެއް ކަމަށްވާ، އީވްގެ އާ ކްލިނިކެއް މާލޭގައި ހުޅުވައިފިއެވެ.
ހޮނިހިރު ދުވަހުގެ ރޭ އެ ކްލިނިކް ހުޅުވާފައި ވަނީ ކުރީގެ ވެސްޓް ޕާކް ސަރަހައްދުގައެވެ. އީވް ކްލިނިކްގެ އާ އައުޓްލެޓް "އީވް ކްލިނިކް ވެސްޓް ޕާކް" ހުޅުވާދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ.
އީވް ކްލިނިކް ހުޅުވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަދައްކަވަމުން މިނިސްޓަރ ނާޒިމް ވިދާޅުވީ، އެހެނިހެން ޤައުމުތަކުގައި ވެސް ސިއްޙީ ދާއިރާ ކުރިއަރަނީ އަމިއްލަ ފަރުދުންގެ ވަރަށް ބޮޑު ހިއްސާއަކާއި އެކުގައި ކަމަށެވެ. މީގެ އިތުރުން ރައީސް ޑރ.މުހައްމަދު މުއިއްޒުގެ ސިޔާސަތަކީ އަމިއްލަ ފަރާތްތަކުން ފޯރުކޮށްދޭ މިފަަ ޚިދުމަތްތައް ދިނުމަށް ޤާނޫނީ އިމުގެ ތެރެއިން ދެވެން އޮތް އެންމެ ބޮޑު ފުރުސަތެއް ފަހިކޮށްދިނުން ކަމަށް ނާޒިމް ވަނީ ވިދާޅުވެފައެވެ. އަމިއްލަ ފަރުދުންގެ ބައިވެރިވުމާއި ނުލާ އެއްވެސް ސިނާއަތެއް ކުރި ނާރާނެކަން އެއީ ދުނިޔޭގައި ސާބިތު ހެކި ހުރި ކަމެއް ކަމަށް ނާޒިމް ވިދާޅުވިއެވެ. އީވް ކްލިނިކްގެ އެ އައުޓްލެޓް ހުޅުވުމަކީ ލިބިވަޑައިގަތް ޝަރަފެއް ކަަމަށް މިނިސްޓަރ ވަނީ ވިދާޅުވެފައެވެ. އީވް އަކީ ފަރުވާތެރި ރަނގަޅު ޚިދުމަތެއް ދެމުންދާ ތަނެއް ކަމަށް ވެސް މިނިސްޓަރ ފާހަގަކުރެއްވިއެވެ.
އެ ރަސްމިައްޔާތުގައި ވާހަކަދައްކަވަމުން އީވް ކްލިނިކްގެ ޗެއާމަން ހުސައިން މުހައްމަދުފުޅުގެ ބޭފުޅެއް ކަމަށްވާ ޑރ. ޖައުފަރު ވަނީ އެ އައުޓްލެޓާއި އެކު އީވް ކްލިނިކުން ދެމުން އައި ޚިދުމަތް ފުޅާވެގެންދާނެ ކަމަށް ވިދާޅުވެފައެވެ. އެ ކްލިނިކަކީ އުންމީދެއްކަމަށް ފާހަގަކުރައްވާ އޭނާ ވަނީ އެ ކްލިނިކަށް ހިއްވަރުދެއްވި ޗެއާމަން ހުސައިން މުހައްމަދުފުޅަށް ޝުކުރު އަދާކުރައްވާފައެވެ. މި އައުޓްލެޓާއި އެކު ވަސީލަތްތައް އިތުރުކޮށް ޚިދުމަތް ފުރިހަމަކުރުމަށް އުންމީދުކުރާ ކަމަށް އޭނާ ވަނީ ވިދާޅުވެފައެވެ. ހަމައެހެންމެ އެ ކްލިނިކަށް ޑޮކްޓަރަށް ދައްކަން އަންނަ މީހުންގެ ކިއު މަދުކުރުމަކީ ވެސް އެ އައުޓްލެޓްގެ މަޤްސަދެއް ކަމަށް އޭނާ ވިދާޅުވިއެވެ. އޭނާ ވަނީ އީވް ކްލިނިކްގެ ޑޮކްޓަރުންނާއި މުވައްޒަފުން އަދާކުރާ މުހިންމު ދައުރު ފާހަގަކޮށް އެކަމަށްޓަކާ އެ ބޭފުޅުންނަށް ޝުކުރު އަދާކުރައްވާފައެވެ. ޕްރީމިއަމް ޚިދުމަތެއް ދެމެހެއްޓެނެވި ގޮތަކަށް އަގު ކުޑަކޮށް ފޯރުކޮށްދިނުމުގައި ގިނަ ގޮންޖެހުންތަކެއް ދިމާވާ ކަމަށް އޭނާ ވަނީ ފާހަގަކުރައްވާފައެވެ.
އީވް ކްލިނިކުން ފޯރުކޮށްދޭ ޚިދުމަތްތަކުގެ ތެރޭގައި ހިތުގެ ބަލިތަކާއި،، ފުއްޕާމޭގެ ބަލިތަކާއި، ކިޑްނީގެ ބަލިތަކާއި، ދަތުގެ ބަލިތަކާއި، ހޯމޯންގެ ބަލިތަކާއި، ކުޑަކަމުދާ ނިޒާމުގެ ބަލިތަކާއި، ނަފްސާނީ ބަލިތަކާއި، ރޭޑިއޯގްރަފީ އަލްޓްރާ ސައުންޑް ސްކޭންގެ އިތުރުން އެތެރެ ހަށީގެ ބަލިތަކާއި ކައުންސިލިން، ކަރުންމަތީގެ ބަލިތަކާއި އާއްމު ބަލިތައް އަދި ކަށީގެ ބަލިތަކަށް ފަރުވާ ލިބެން ހުރެއެވެ.
