އިޒްރޭލުން އެއްގަމުން ހަމަލާ ފެށިފަހުން 95 އިޒްރޭލު ސިފައިން މަރުވެއްޖެ، 900 ޒަޚަމްވެއްޖެ: ހިޒްބުﷲ
ހިޒްބުﷲ އިން ނެރުނު ބަޔާނެއްގައި ބުނެފައިވަނީ ވޭތުވެދިޔަ 45 ދުވަހުގެ ތެރޭގައި، އެ ޖަމާޢަތުން ވަނީ އިޒްރޭލުގެ ގިނަ އަދަދެއްގެ އަސްކަރީ އުޅަނދުތައް ހަލާކުކޮށްފައި ކަމަށެވެ.
ދެކުނު ލުބުނާނުގެ ބޯޑަރ ސަރަހައްދުގެ ގަލީލީގައި އިޒްރޭލުގެ އަސްކަރީ އުޅަނދުތައް ހަރަކާތްތެރިވަނީ
ހިޒްބުﷲ ޖިހާދީ ޙަރަކާތުން ބުނެފައިވަނީ އިޒްރޭލުން ލުބުނާނަށް އެއްގަމުން ހަމަލާތައް ދޭން ފެށިފަހުން 95ށް ވުރެ ގިނަ އިޒްރޭލު އޮފިސަރުންނާއި ސިފައިން މަރުވެ، 900 ސިފައިން ޒަޚަމްވެފައިވާ ކަމަށެވެ.
ހުކުރު ދުވަހުގެ ހެނދުނު ހިޒްބުﷲ އިން ނެރުނު ބަޔާނެއްގައި އިތުރަށް ބުނެފައިވަނީ ވޭތުވެދިޔަ 45 ދުވަހުގެ ތެރޭގައި، އެ ޖަމާޢަތުން ވަނީ އިޒްރޭލުގެ ގިނަ އަދަދެއްގެ އަސްކަރީ އުޅަނދުތައް ހަލާކުކޮށްފައި ކަމަށެވެ. އޭގެ ތެރޭގައި 42 މަރްކަވާ ޓޭންކާއި، 4 އަސްކަރީ ބުލްޑޯޒަރާއި، ހަނގުރާމައިގައި ބޭނުން ކުރާ އިތުރު އުޅަނދުތައް ހިމެނޭ ކަމަށެވެ.
މީގެ އިތުރުން ޖިހާދު ކުރާ ހަނގުރާމަވެރިން ވަނީ އަދި އިޒްރޭލުގެ ދެ ޑްރޯން ވައްޓާލާފައި ކަމަށްވެސް ބުނެފައިވެއެވެ.
ހިޒްބުﷲ އިން ބުނީ އިޒްރޭލު ސިފައިން ހަމަލާތައް ދެނީ ހަނގުރާމަވެރިންނަށް ނުފެނި ސިއްރިއްޔާތުގައި ތިބެގެން ކަމުގައެވެ. ޚައްސަ ކޮށް ލުބުނާނުގެ އަވަށްތަކަށް ހަމަލާތައް ދެނީ ރޭގަނޑުގެ ވަގުތުގައި ކަމަށާއި، އާންމުންގެ ގެދޮރަށް ހަމަލާތައް ދިނުމަށްފަހު އަލިވާން ވާއިރަށް ފިލަނީ ކަމުގައެވެ.
ހިޒްބުﷲ ގެ ބަޔާނުގައި ބުނެފައިވަނީ، ހަނގުރާމަ ފެށުނީއްސުރެ، ހަނގުރާމައިގެ މައިދާނަށް ފޯރުކޮށްދޭން ބޭނުންވާ ސާމާނު ފޯރުކޮށްދިނުމަށް ސަޕްލައިލައިންތައް ބަރާބަރަށް ދަނީ މަސައްކަތް ކުރަމުން ކަމަށެވެ.
"ކުރިން ރޭވިފައިވާ ޕްލޭންތަކާ އެއްގޮތަށް ހަތިޔާރާއި، މީހުން މެދު ނުކެނޑި ފޯރުކޮށްދެވެމުންދެއެވެ،" ހިޒްބުﷲ ޖަމާޢަތުން ބުނެފައިވެއެވެ.
"ހަނގުރާމަވެރިން ދަނީ ދުޝްމަނުގެ އަސްކަރީ މަރުކަޒުތަކަށް ހަމަލާދެމުންނެވެ. މިކަން ކުރަނީ ދުވާލާއި، ރޭގަނޑު، އެތައް ސަތޭކަ ރޮކެޓް ބޭނުންކޮށްގެންނެވެ. ދުޝްމަނުންނަށް ލުބުނާނުގެ ބިމުން ފޮނުވާ އެއްވެސް ރޮކެޓް ހަމަލާއެއް ހުއްޓުވިފައެއް ނުވެއެވެ،" އެ ބަޔާނުގައި ބުނެފައިވެއެވެ.
