ދެކުނު ލުބުނާނަށް އިޒްރޭލުން ދިން އައު ހަމަލާތަކަކީ "ހަނގުރާމައިގެ ޖަރީމާ އެއް" ކަމަށް އދ. ގެ ސްޕެޝަލް ރެޕަޓުއަރ ވިދާޅުވެއްޖެ

އިޒްރޭލުން ދެކުނު ލުބުނާނަށް އަލުން ދިން ހަމަލާތަކަކީ "ހަނގުރާމައިގެ ޖަރީމާ އެއް" ކަމަށާއި، މިފަދަ ހަމަލާތަކުގެ ސަބަބުން ސުލްހަ ގެއްލިދާނެ ކަމަށް ވިދާޅުވެ، އދ. ގެ ސްޕެޝަލް ރެޕަޓުއަރ އިންޒާރު ދެއްވައިފި އެވެ.

ހުކުރު ދުވަހު އިޒްރޭލުން ވަނީ ދެކުނު ލުބުނާނުގެ އައިން އަލް-ހިލްވާ ރެފިއުޖީ ކޭމްޕަށް ހަމަލާ ދީފައެވެ. އޭގެ އިތުރުން، އާންމު ރައްޔިތުންނަށާއި، އދ.ގެ ސުލްހަ ބަލަހައްޓާ ފައުޖުގައި ހިމެނޭ ސިފައިންނަށް ތަކުރާރުކޮށް ދިން ހަމަލާތައް ފާހަގަކުރަމުން، މިއީ ބައިނަލް އަގްވާމީ ގާނޫނު ތަކާ ޚިލާފު އަމަލުތަކެއް ކަމަށް އދ.ގެ ސްޕެޝަލް ރެޕަޓުއަރ އޮން އެކްސްޓްރާ ޖޫޑިޝަލް، ސަމަރީ އޯރ އާބިޓަރީ އެގްޒެކިއުޝަންސް މޮރިސް ޓިޑްބޯލް-ބިންޒް ވިދާޅުވެ އިޒްރޭލުގެ އަމަލުތައް ކުށްވެރި ކުރެއްވި އެވެ.

ލުބުނާނުގެ ސިއްހަތާ ބެހޭ ވުޒާރާ އިން ރިޕޯޓްކޮށްފައި ވަނީ ނޮވެމްބަރު 18 ވަނަ ދުވަހު އިޒްރޭލުން ކޭމްޕަށް ދިން ވައިގެ ހަމަލާގައި މަދުވެގެން 13 މީހުން މަރުވެ، އިތުރު ގިނަ މީހުން ޒަޚަމްވި ކަމަށެވެ.

ލޯކަލް އަލް-މަނާރު ޓެލެވިޜަން ޗެނަލުން ބުނި ގޮތުގައި، ބޮޑު އާބާދީ އެއް ދިރިއުޅެމުން އަންނަ އައިން އަލް-ހިލްވާ އަށް އިޒްރޭލުން ވަނީ ވައިގެ ހަމަލާ އެއް ދީފަ އެވެ.

ސްޕެޝަލް ރެޕަޓުއަރ އިތުރަށް ވިދާޅުވީ، "މަދަނީން ނަށާއި، މަދަނީ ތަންތަނަށް ތަކުރާރުކޮށް ދޭ މި ހަމަލާތަކަކީ ހަނގުރާމައިގެ ކުށެއް ކަމަށާއި އަދި އދ.ގެ ޗާޓަރަށް ހިލާފުވުމެއް،" ކަމަށެވެ.

އދ.ގެ ތަޖުރިބާކާރު ފާހަގަކުރެއްވީ އައިން އަލް-ހިލްވާ އަށް ދިން ހަމަލާ އަކީ ހަނގުރާމަ ހުއްޓާލުމުގެ އެއްބަސްވުމާ ޚިލާފަށް ދެމުންދާ އެތައް ހަމަލާތަކުގެ ތެރެއިން ދިން ހަމަލާ އެއް ކަމުގައެވެ.

"މި ހާދިސާތަކަކީ ބައިނަލްއަގުވާމީ ފެންވަރުގައި ފާހަގަ ކުރެވޭ ޖަރީމާ ތައް ކަމަށާއި، އަދި ސެކިއުރިޓީ ކައުންސިލްގެ 1701 ވަނަ ގަރާރާއި ޚިލާފުވުމެއް ކަމަށާއި، ލުބުނާނުގެ ސިޔާދަތަށް ސީރިއަސް ގޮތެއްގައި އަރައިގަތުން،" ކަމަށް ރެޕަޓުއަރ ވިދާޅުވި އެވެ.

ލުބުނާނު ގެ ސިއްހަތާ ބެހޭ ވުޒާރާ އިން ހުކުރު ދުވަހު ބުނީ އެއް އަހަރު ކުރިން ސުލްހަ އެއްބަސްވުމަށް އަމަލު ކުރަން ފެށި ފެށިފަހުން މިހާތަނަށް އިޒްރޭލުގެ ހަމަލާތަކުގައި ލުބުނާނު ގައި 331 މީހުން މަރުވެ، 945 މީހުން ޒަޚަމްވި ކަމަށެވެ.

އިޒްރޭލާއި ހިޒްބުﷲ އިން ހަނގުރާމަ ހުއްޓާލުމަށް އެއްބަސްވެ 2024 ވަނަ އަހަރުގެ ނޮވެމްބަރު 27 ވަނަ ދުވަހު އެ އެއްބަސްވުމަށް އަމަލު ކުރަން ފެށިއެވެ. އެ އެއްބަސްވުމުގެ ދަށުން، ތެލް އަވީވުން ލުބުނާނުގެ ސަރަހައްދުން ފުރިހަމައަށް ފައިބަން ޖެހޭނެއެވެ. އެކަމަކު އދ.ގެ ސެކިއުރިޓީ ކައުންސިލްގެ ރިޒޮލިއުޝަން 1701 އަށާއި ފާއިތުވި ނޮވެމްބަރުގެ އެއްބަސްވުމުގެ ޝަރުތުތަކަށް ސާފުކޮށް ހިލާފުވެ، ފަސް ސަރަހައްދެއްގައި އިޒްރޭލު ސިފައިން ވަނީ ބައިތިއްބާފަ އެވެ.

ހަނގުރާމަ ހުއްޓާލަން އެއްބަސްވި ފަހުން ތަކުރާރު ކޮށް އެތައް ފަހަރެއްގެ މަތިން އިޒްރޭލުން ލުބުނާނަށް ހަމަލާދީ އެއްބަސްވުމަށް ވަރަށް ގިނަ ފަހަރު ހިލާފުވެއްޖެއެވެ.