ހޮނިހިރު ދުވަހު ބެއިރޫތައް އިޒްރޭލުން ހަމަލާދީ މަދުވެގެން 11 މަރު
އިޒްރޭލުން ދިން ހަމަލާތަކުގައި ލުބުނާނުން މިހާތަނަށް 3،500 އަށްވުރެ ގިނަ މީހުން މަރުވެ، 15،000 އަށްވުރެ ގިނަ މީހުންނަށް އަނިޔާވެފައިވާ ކަމަށް އެ ގައުމުގެ ސިއްހަތާ ބެހޭ ވުޒާރާއިން ބުނޭ
ނޮވެމްބަރު 23، 2024 ގައި ލުބުނާނުގެ ވެރިރަށް ބެއިރޫތައް އިޒްރޭލުން ބޮންއަޅާ ފުނޑުކޮށްލާފައިވާ އިމާރާތް ހުރިތަނުގެ މަންޒަރެއް
ހޮނިހިރު ދުވަހު އިޒްރޭލުން ލުބުނާނުގެ ވެރިރަށް ބެއިރޫތައް ބޮން އަޅާ މަދުވެގެން 11 މީހުން މަރާލައިފި ކަމަށް ލުބުނާނުގެ ސިވިލް ޑިފެންސުން ބުނެފިއެވެ.
ބެއިރޫތުގެ މެދުތެރޭގެ ސަރަހައްދަކަށް ދިން މި ހަމަލާގައި އެތައް ބަޔަކު ޒަޚަމްވެފައިވާ ކަމަށްވެސް ވަނީ ހާމަ ކޮށްފައެވެ.
މި ނުރައްކާތެރި ހަމަލާ އިޒްރޭލުން ދިނީ ހަނގުރާމަ ހުއްޓުވުމަކަށް ގެނެވޭތޯ އެމެރިކާގެ އޮފިޝަލުން މަސައްކަތް ކުރާ ކަމަށް ބުނެފައިވާ ދަނޑިވަޅެއްގައި ކަން ފާހަގަ ކުރެވެއެވެ.
ލުބުނާންގެ ސިވިލް ޑިފެންސްއިން ބުނީ މަރުވި މީހުންގެ އަދަދު އެއީ ވަގުތީ އަދަދެއް ކަމަށާއި އެ އަދަދު އަދި މައްޗަށްދާނެ ކަމަށް ބެލޭ ކަމަށެވެ. އިމަޖެންސީ އެހީތެރިން އަދިވެސް ގެންދަނީ ފުނޑުވެފައިވާ އިމާރާތުގެ ދަށުގައި ތިރިތިބި މީހުން ތިބިތޯ ބަލަމުންނެވެ.
މިއީ ހަފްތާއެއްގެ ތެރޭގައި ލުބުނާނުގެ ވެރިރަށަށް އިޒްރޭލުން ދިން ހަތަރުވަނަ ހަމަލާއެވެ.
އިޒްރޭލުގެ އަމަލުތައް ހަރުކަށި ކޮށްފައިވާއިރު، އެމެރިކާގެ ސަފީރު އެމޯސް ހޮކްސްޓައިން މި ހަފްތާގައި މި ސަރަޙައްދަށް ޒިޔާރަތްކޮށް، އިޒްރޭލާއި ހިޒްބުﷲ އާ ދެމެދު ހިނގަމުންދާ 13 މަސް ދުވަހަށް ވުރެ ގިނަ ދުވަސްވީ ހަނގުރާމަ ހުއްޓުވުމަށް މަސައްކަތް ކުރަމުންދާ ކަމަށް އެމެރިކާއިން ބުނެފައިވެއެވެ.
އިޒްރޭލުން ދިން ހަމަލާތަކުގައި ލުބުނާނުން މިހާތަނަށް 3،500 އަށްވުރެ ގިނަ މީހުން މަރުވެ، 15،000 އަށްވުރެ ގިނަ މީހުންނަށް އަނިޔާވެފައިވާ ކަމަށް އެ ގައުމުގެ ސިއްހަތާ ބެހޭ ވުޒާރާއިން ބުނެއެވެ. ހަނގުރާމައިގެ ސަބަބުން ގާތްގަނޑަކަށް 1.2 މިލިއަން މީހުން، ނުވަތަ ލުބުނާނުގެ އާބާދީގެ ހަތަރުބައިކުޅަ އެއްބައި މީހުން އުޅެމުންދަނީ ވަރަށް ނިކަމެތި ހާލުގައެވެ.
ހޮނިހިރު ދުވަހު ލުބުނާނަށް އިޒްރޭލުން ބޮން އެޅީ ފަތިހު ލުބުނާނު ގަޑިން 4 ޖެހިއިރު ކަމަށާއި، މި ހަމަލާގައި 8 ބުރީގެ އިމާރާތެއް ފުނޑުފުނޑުވެ، އިމާރާތް ހުރި ބިމުގައި ބޮޑު ވަޅުގަނޑެއް އުފެދިފާވާ ކަމަށް ރިޕޯޓުތައް ބުނެއެވެ. އަދި ހަމަ ހޮނިހިރު ދުވަހު ޑްރޯން ހަމަލާއަކުން ލުބުނާނުގެ ޕޯޓު ސިޓީ ޓަޔަރގައި އެކަކު މަރުވެ، އިތުރު މީހަކަށް އަނިޔާވެފައިވާ ކަމަށް ސަރުކާރުގެ ނެޝަނަލް ނިއުސް އެޖެންސީން ބުނެއެވެ.
