ހިޒްބުﷲ އާ އެކު ހަނގުރާމަ ހުއްޓާލުމަށް އެއްބަސްވެފައިވާއިރު ވެސް، އިސްރާއީލުން ލުބުނާނަށް ދެމުންދާ ހަމަލާތަކަށް ހުއްޓުމެއް އައިސްފައެއް ނުވެއެވެ. މިދިޔަ ހަފްތާގައި ލުބުނާނުގެ އެކި ސަރަހައްދުތަކަށް އިސްރާއީލުން ދިން ހަމަލާތަކުގައި މަދުވެގެން 6 މީހުން މަރުވެފައިވެއެވެ.
ދެކުނު ލުބުނާނަށް އިސްރާއީލުން ދިން ހަމަލާތަކަށް ފަހު ނަބަތީހް ޑިސްޓްރިކްޓުން ދުން އަރަނީ - 31 އޮގަސްޓް 2025 (ފައިލް)
އިސްރާއީލުގެ ހަމަލާއެއްގައި ލުބުނާނުގެ ދެކުނު ސަރަހައްދުގެ ބޯޑަރު ކައިރިން މީހަކު މަރުވެއްޖެކަމަށް ލުބުނާނުން ހުކުރު ދުވަހު ބުނެފިއެވެ.
ހިޒްބުﷲ އާއެކު ހަނގުރާމަ ހުއްޓާލުމަށް އެއްބަސްވުމަށް ފަހު އިސްރާއީލުން ލުބުނާނުގެ ދެކުނު ސަރަހައްދުތަކަށް ދެމުންދާ ހަމަލާތަކަށް ހުއްޓުމެއް އައިސްފައި ނުވާކަމަށް ރިޕޯޓުތައް ބުނެއެވެ.
"އައިތަރޫން ރަށަށް އިސްރާއީލްގެ ދުޝްމަނުން ދިން ހަމަލާއެއްގައި މީހަކު މަރުވެއްޖެ" ކަމަށް އެ ގައުމުގެ ސިއްހީ މިނިސްޓްރީން ބަޔާނެއްގައި ބުނެފައިވެއެވެ.
އީރާނުގެ އެހީތެރިކަން ލިބޭ ލުބުނާނުގެ ހިޒްބުﷲ އާ ދެމެދު ހިނގި އަހަރަކަށްވުރެ ގިނަ ދުވަސްވީ ހަނގުރާމަ ނިންމުމަށް ނޮވެމްބަރުގައި ވެވުނު އެއްބަސްވުމަށްފަހު ވެސް، އިސްރާއީލުން ދަނީ ލުބުނާނަށް ހަމަލާތައް ދެމުންނެވެ. މިއީ ހިޒްބުﷲ ގެ ހަރަކާތްތެރިންނަށް ނުވަތަ އެ ޖަމާއަތުގެ ތަންތަނަށް އަމާޒުކޮށްގެން ދޭ ހަމަލާތައް ކަމަށް އިސްރާއީލުން ބުނެއެވެ.
ބުރާސްފަތި ދުވަހު، ދެކުނު ލުބުނާނަށް ދިން ހަމަލާއެއްގައި މީހަކު މަރުވިކަމަށް ސިއްހަތާ ބެހޭ މިނިސްޓްރީން ބުނެފައިވެއެވެ. އަދި ހޯމަ ދުވަހު އެ ގައުމުގެ އިރުމަތީ ސަރަހައްދަށް ދިން ހަމަލާތަކެއްގައި 5 މީހުން މަރުވިއެވެ. މި ހަމަލާތަކަކީ ހިޒްބުﷲ މަރުކަޒުތަކަށް އަމާޒުކޮށްގެން ދިން ހަމަލާތަކެއް ކަމަށް އިސްރާއީލްގެ ސިފައިން ބުނެފައިވެއެވެ.
މަސްދަރު: އޭއެފްޕީ
