ހިޒްބުﷲ އިން އިޒްރޭލަށް އެތައް ސަތޭކަ ރޮކެޓު ހަމަލާ ދީފި

އާދިއްތަ ދުވަހު ހިޒްބުﷲ އިން 340 މިސައިލާއި ޑްރޯން ހަމަލާ އިޒްރޭލަށް ދީފިއެވެ.

އިޒްރޭލުގެ އާމީ ރޭޑިއޯއިން ބުނާ ގޮތުގައި، މި ހަމަލާތަކުގައި 11 މީހުން ޒަޚަމްވެ، ތެލްއަވީވްގައި "ބޮޑެތި ގެއްލުންތަކެއް" ވެފައިވެއެވެ. މީގެ އިތުރުން، ދެކުނު ލުބުނާނުގައި ހިޒްބުﷲ ގެ ހަނގުރާމަވެރިން ގެންދަނީ އިޒްރޭލުގެ ސިފައިންނާ ކުރިމަތިލާ ވަރުގަދަ ދިފާއީ ހަނގުރާމައެއް ކުރަމުންނެވެ.

ހިޒްބުﷲ އިން އިޒްރޭލަށް ދިން ހަމަލާތަކުގެ ތެރޭގައި އާދިއްތަ ދުވަހުގެ ރޭ ހައިފާ ނޭވަލް ބޭސްއަށް ދިން ގިނަ އަދަދެއްގެ މިސައިލް ހަމަލާތައް މީޑިއާ ރިޕޯޓުތަކުގައި ވަނީ ފާހަގަ ކޮށްފައެވެ.

އިޒްރޭލުގެ އިތުރު އަސްކަރީ ބޭސްތަކަށް ވެސް މިސައިލް ހަމަލާ ދީފައިވާ ކަމަށް ރިޕޯޓުތައް ބުނެއެވެ.

މީގެ އިތުރުން ހިޒްބުﷲ ގެ ހަމަލާތަކުގައި ދެކުނު ލުބުނާނުގެ އެކި ސަރަހައްދުތަކުން މަދުވެގެން އިޒްރޭލު ސިފައިންގެ 6 މެރްކަވާ ޓޭންކު ވަނީ ހަލާކުކޮށްލާފައެވެ.

ރިޕޯޓުތައް ބުނާ ގޮތުގައި އާދިއްތަ ދުވަހު، ހިޒްބުﷲ އިން ތެލްއަވީވް ހިމެނޭ ގޮތަށް އިޒްރޭލުން ގަދަކަމުން ހިފާފައިވާ ބިމުގައިވާ ޓާގެޓް ތަކަށް ސަތޭކަ އެއްހާ ރޮކެޓް ހަމަލާ ދީފައިވެއެވެ.

މިހަމާލާތަކުގެ ސަބަބުން މިލިއަނެއްހާ އިޒްރޭލު މީހުން ރައްކާތެރިކަން ހޯދަން ޖެހުނު ކަމަށްވެސް ރިޕޯޓުތައް ބުނެއެވެ.

އިޒްރޭލުގެ މީޑިއާތަކުން ބުނެފައިވަނީ ފާއިތުވި އޮކްޓޯބަރު މަހުން ފެށިގެން މިއީ މިހާތަނަށް ހިޒްބުﷲ އިން ދިން އެންމެ ވަރުގަދަ ހަމަލާތައް ކަމުގައެވެ.

އަނެއްކޮޅުން އިޒްރޭލުން ލުބުނާނުގެ ވެރިރަށަށް ދެމުންދާ ވައިގެ ހަމަލާތަކަށް މެދުކެނޑުމެއް އައިސްފައެއް ނުވެއެވެ. މިކަމުގެ ސަބަބުން ލިބެމުންދާ ގެއްލުންތައް ބޮޑުވަމުން ދާތީ، ލުބުނާންގެ އެޑިއުކޭޝަން މިނިސްޓްރީން ވަނީ ޖެނުއަރީ މަހާ ހަމައަށް ބެއިރޫތުގެ ސްކޫލުތައް ބަންދުކުރުމަށް ނިންމާފައެވެ

ޣައްޒާ ގައި ހަނގުރާމަ ފެށުނު ފަހުން، ލުބުނާނަށް އިޒްރޭލުން ދިން ހަމަލާތަކުގައި މަދުވެގެން 3،754 މީހުން މަރުވެ، 15،626 މީހުން ޒަޚަމްވެއްޖެއެވެ.