ހުކުރު ވިލޭރެ ޣައްޒާ އަށް އިޒްރޭލުން ބޮން އަޅާ މަދުވެގެން ފަލަސްތީނުގެ 15 މީހުން ޝަހީދު ކޮށްލައިފިއެވެ. އޭގެ އިތުރުން އެތައް ބަޔަކު މި ހަމަލާގައި ވަނީ ޒަޚަމްވެފައި ކަމަށް ވަފާ ނިއުސް އެޖެންސީން ބުނެފައިވެއެވެ.

ވާފާގެ ނޫސްވެރިޔާ ބުނާގޮތުގައި، އިޒްރޭލުގެ ބާރުތަކުން އަލް-މުޚައްޔަމް އަދި އަލް-ޖަދީދު ގައި ހުރި ދެގެއަކަށް ޔަހޫދީ ސިފައިން ހަމަލާދިނެވެ. މިއީ ނުސީރާތު ރެފިއުޖީ ކޭމްޕުގެ އުތުރުގައި އޮންނަ ސަރަހައްދެކެވެ. މި ހަމަލާގައި 9 އާންމު ރައްޔިތުން މަރުވެ، އެތައް ބަޔަކަށް އަނިޔާވިއެވެ.

އޭނާ އިތުރަށް ބުނިގޮތުގައި، ޔަހޫދީ ސިފައިން ވަނީ ޣައްޒާގެ މެދުތެރޭގައިވާ އަޒް-ޒަވާއިދާ އަވަށުގައި ދުއްވަމުން ދިޔަ މޮޓޯ ސައިކަލަކަށް ހަމަލާދީ 2 މީހުން ޝަހީދު ކޮށްލާފައެވެ. އަދި ހަމައެއާއެކު، ޣައްޒާ ސިޓީގެ ހުޅަނގު އުތުރުގައި އޮންނަ އަޝް-ޝާންތީ ސަރަހައްދުގެ ކައިރީގައި ހުރި ގެއަކަށް ބޮން އަޅައި، 4 މީހުން ޝަހީދުކޮށްލާފައެވެ. މިހާދިސާގައި މަދުވެގެން 15 މީހުންނަށް އަނިޔާވެފައިވާ ކަމަށް ރިޕޯޓު ކޮށްފައިވެއެވެ.

ބުރާސްފަތި ދުވަހުގެ ހަމަލާތަކުގައި ޣައްޒާގެ އެކި ސަރަހައްދުތަކުން މަދުވެގެން 45 ފަލަސްތީނު މީހުން އިޒްރޭލުން ޝަހީދު ކޮށްލާފައިވާ ކަމަށް އަލް ޖަޒީރާ އިން ވަނީ ރިޕޯޓު ކޮށްފައެވެ. މީގެ ތެރޭގައި ގިނައިން ހިމެނެނީ އާންމު ރައްޔިތުންނެވެ.

އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ޣައްޒާގެ ރަފަހް ގައި އިޒްރޭލުން ހިންގަމުންދާ ޖަރީމާތައް ވަގުތުން ހުއްޓާލުމަށް އަމުރުކުރި ނަމަވެސް، އެ އަމުރަށް އެއްވެސް ސަމާލުކަމެއް ނުދީ އިޒްރޭލުން ގެންދަނީ ޣައްޒާގައި ނަސްލު ފޮހެލުމުގެ ހަމަލާތައް ކުރިއަށް ގެންދަމުންނެވެ. އައިސީޖޭ އިން އިޒްރޭލުގެ މައްޗަށް ކުރި މި އަމުރަކީ ޤާނޫނީ ގޮތުން ތަންފީޒުކުރަން ލާޒިމު އަމުރެކެވެ. އަދި މި އަމުރާ ޚިލާފުވުމަކީ ނަސްލު ފޮހެލުމާ ދެކޮޅަށް އެކުލަވާލާފައިވާ ބައިނަލް އަގްވާމީ މުޢާހަދާ "ޖެނޮސައިޑް ކޮންވެންޝަން" އާ ޚިލާފު ކަމެކެވެ.

ހުސްވި އަހަރުގެ އޮކްޓޯބަރު 7 އިން ފެށިގެން އިޒްރޭލުން ގެންދަނީ ޣައްޒާއަށް ނުރައްކާތެރި މަރުގެ ހަމަލާތައް ހުއްޓުމެއް ނެތި ދެމުންނެވެ. މި ހަނގުރާމާގައި މިހާތަނަށް މަދުވެގެން 43,204 ފަލަސްތީނު މީހުން ޝަހީދުވެ، 101,640 އަށްވުރެ ގިނަ މީހުންނަށް އަނިޔާވެފައިވެއެވެ.

މީގެ އިތުރުން، މަދުވެގެން 10,000 މީހުން ވަނީ ގެއްލިފައެވެ. މި މީހުން ވަނީ ޣައްޒާގެ އެކި ކަންކޮޅުތަކުގައި ފުނޑުވެފައިވާ އިމާރާތްތަކުގެ ދަށުވެ މަރުވެފައި ކަމަށް ބެލެވެއެވެ.

ފަލަސްތީނުގެ އަދި ބައިނަލްއަޤްވާމީ ޖަމްޢިއްޔާތަކުން ބުނާގޮތުގައި އިޒްރޭލުގެ އަނިޔާވެރި ހަމަލާތަކުގައި މަރުވި އަދި ޒަޚަމްވި ގިނަ މީހުންނަކީ އަންހެނުންނާއި ކުޑަކުދިންނެވެ.

އިޒްރޭލުގެ މި އަނިޔާވެރި ހަމަލާތަކުގެ ސަބަބުން ޣައްޒާގެ ހުރިހާ ސަރަހައްދަކުން ގާތްގަނޑަކަށް ދެ މިލިއަން މީހުން ވަނީ ރެފިއުޖީންނަށް ވެފައެވެ. މި މީހުންގެ ތެރެއިން ގިނަ އަދަދެއްގެ މީހުން މިހާރު ތޮއްޖެހިފައި ވަނީ މިޞްރުގެ ބޯޑަރާ ކައިރީގައި އޮންނަ ރަފަހް ސިޓީއަށެވެ. މިއީ 1948 ވަނަ އަހަރުގެ ނަކްބާ އަށްފަހު ފަލަސްތީނުން ތަޖުރިބާ ކުރާ އެންމެ ބޮޑު ރެފިއުޖީ ކާރިސާއެވެ.