އެއްބަސްވުން އައު ކުރާނެ ކަމުގެ އިޝާރާތެއް މުސިއާލާ ދީފި

ޖަރުމަނުގެ ބަޔާން މިއުނިކާ އެކު ސޮއި ކޮށްފައިވާ އެއްބަސްވުން އައު ކުރާނެ ކަމުގެ އިޝާރާތެއް އެ ކުލަބަށް ކުޅެމުން އަންނަ ޖަމާލް މުސިއާލާ ދީފި އެވެ.

އުމުރުން 21 އަހަރުގެ ޒުވާން ކުޅުންތެރިޔާ އޭނާގެ ސީނިއާ ކެރިއަރު ފެށީ ވެސް ބަޔާނުންނެވެ. ބަޔާނާއެކު މުސިއާލާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ ދެ އަހަރު އޮތް ނަމަވެސް، ބަޔާނުން ބޭނުން ވަނީ އޭނާގެ އެއްބަސްވުން އައު ކުރުމަށެވެ. ބަޔާނުން ބޭނުން ވަނީ ދިގު މުައްދަތަކަށް މުސިއާލާގެ އެއްބަސްވުން އައުކޮށް، އެ ކުލަބުގައި އޭނާ ބަހައްޓާށެވެ. އެކަމާ ގުޅުން ހުރި މަޝްވަރާތައް ދުވަސް ކޮޅެއް ކުރިން ބަޔާނުން ވަނީ ފަށައިފަ އެވެ.

އެކަމާ ގުޅޭ ގޮތުން ވާހަކަ ދައްކަވަމުން ބަޔާާންގެ ޑައިރެކްޓަރު މެކްސް އެބާލް މީގެ ކުރިން ވިދާޅުވެފައި ވަނީ، މުސިއާލާ އަށް ބަޔާނުން ހުށަހަޅައި އައު އެއްބަސްވުން އޭނާ ޤަބޫލުކޮށް، އޭނާގެ އެއްބަސްވުން އައު ކުރެވޭނެ ކަމުގެ އުންމީދު އޭނާ އަށް ވަރަށް ބޮޑު ކަމަށެވެ. އެކަމާ ގުޅުން ހުރި ވާހަކަތަކާއި، މަޝްވަރާތައް އަދިވެސް ދަނީ ކުރެވެމުންކަން ފާހަގަ ކުރައްވައި އެބާލް އޭރު ވިދާޅުވެފައި ވަނީ، އެކަމުގެ ތެރެއިން ކޮންމެ ވެސް ކަމެއް ހިނގާ ކަމަށެވެ.

ބަޔާން އާއެކު އައު އެއްބަސްވުމުއްގައި ސޮއި ކުރާނެތޯ ދާދި ފަހުން މުސިއާލާ ގާތުން އެހުމުން އޭނާ ބުނީ، އެފަދަ މަންޒަރެއް އޭނާ އަށް ތަސައްވަރު ކުރެވޭ ކަމަށެވެ. އަދި މުސިއާލާ ބުނީ ބަޔާނާ އެކު މަޝްވަރާތައް ކުރިއަށް ގެންދާ ކަމަށާއި، މަޝްވަރާތައް ދަނީ ވެސް ރަނގަޅަށް ކަމަށެވެ. މީގެ އިތުރުން ބަޔާންގައި އޭނާ ހުރީ އުފަލުން ކަމަށާއި، ބަޔާންގައި ހާދަކުރެވޭ ދުވަސްތަކާ މެދު ހިތްހަމަ ޖެހޭ ކަމަށް ވެސް މުސިއާލާ ވަނީ ބުނެފަ އެވެ.

ޒުުވާން ކުޅުންތެރިޔާ ބަޔާންގައި މޮޅު ކުޅުމެއް ދައްކަމުން އަންނައިރު، އައު ކޯޗު ވިންސެންޓް ކޮމްޕެނީ ވެސް އިސްކަން ދެމުން އަންނަ ކުޅުންތެރިންގެ ތެރޭގައި އޭނާ ހިމެނެ އެވެ. އޭނާ ވަނީ މިހާތަނަށް ބަޔާނަށް ކުޅެދިން 174 މެޗުގައި 50 ލަނޑު ޖަހައިފަ އެވެ. އެންމެ ފަހުން ޖަރުމަނު ކަޕްގައި ބަޔާން އިން ކުޅުނު މެޗުގައި މުސިއާލާ ވަނީ ތިން ލަނޑު ޖަހައި ހެޓްރިކް ހަދައިފަ އެވެ. އެއީ މުސިއާލާގެ ކެރިއަރުގައި އޭނާގެ ފުރަތަމަ ހެޓްރިކް އެވެ. ބަޔާނާއެކު އޭނާ ވަނީ ނުވަ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ޖަރުމަނު ލީގު ހަތަރު ފަހަރު، ޖަރުމަނު ސުޕަ ކަަޕް ތިން ފަހަރު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ.