ލުބުނާނުގެ އިރުމަތީ ސިޓީ ބާލްބެކްގައި އިޒްރޭލުން ހަމަލީ މަދުވެގެން 30 މީހުން މަރާލައިފިއެވެ.

އިޒްރޭލުން މި ހަމަލާދިނީ އިޒްރޭލުގެ ސިފައިން އެ ސަރަޙައްދުގެ ރައްޔިތުންނަށް ހިޒްބުﷲ އާ ދެކޮޅަށް ގަދަފަދަ ހަމަލާތަކެއް ދޭނެ ކަމަށް ބުނެ އިންޒާރު ދިންތާ ކުޑަ ވަގުތުކޮޅެއްގެ ތެރޭގައި ކަމަށް ރިޕޯޓުތައް ބުނެއެވެ.

ލުބުނާނުގެ ޞިއްޙީ ވުޒާރާއިން ބުނެފައިވާ ގޮތުގައި ބާލްބެކް ސަރަޙައްދުގެ ދެ ތަނަކަށް އިޒްރޭލުން ދިން ހަމަލާތަކުގައި މަދުވެގެން 19 މީހުން މަރުވެފައިވެއެވެ.

އިޒްރޭލުގެ ސިފައިން ބުނެފައިވާ ގޮތުގައި އެމީހުން ހަމަލާދިނީ ބާލްބެކް ނަބަތިއްޔާގައި ހުރި ހިޒްބުﷲ ގެ "ކޮމާންޑް އެންޑް ކޮންޓްރޯލް ސެންޓަރުތަކާއި ޓެރަރިސްޓް އިންފްރާސްޓްރަކްޗަރ" އަށެވެ.

މީގެ އިތުރުން، ލުބުނާނުގެ ޞިއްޙީ ވުޒާރާއިން ބުނެފައިވާ ގޮތުގައި އިރުމަތީ ބެކާ ވެލީގައިވާ ސޮހްމޯރު ޓައުންއަށް އިޒްރޭލުން ދިން ހަމަލާތަކުގައި 11 މީހުން މަރުވެ، 15 މީހުން ޒަޚަމްވެފައިވެއެވެ.

އަނެއްކޮޅުން، ހިޒްބުﷲ އިން ބުނެފައިވާ ގޮތުގައި އެމީހުން ވަނީ އުތުރު އިޒްރޭލުގެ ތިން އަސްކަރީ މަރުކަޒަކަށް، ރޮކެޓާއި ޑްރޯން ހަމަލާ ދީފައެވެ.

ފަހުން އެމީހުން ބުނެފައިވަނީ ތެލް އަވީވުގެ ދެކުނު އިރުމަތީގައިވާ އަސްކަރީ ތަމްރީނު ކޭމްޕަކަށް ވެސް ރޮކެޓް ހަމަލާ ދީފައިވާ ކަމަށެވެ.

ލުބުނާނުގައި ހަނގުރާމަ ފެށުނީ ފާއިތުވި މަހުގެ ފަހުކޮޅުގައެވެ. މިއީ 2023 ވަނަ އަހަރުގެ އޮކްޓޯބަރު 7 ގައި އިޒްރޭލުން ފަލަސްތީނަށް ދޭން ފެށި އަނިޔާވެރި ހަމަލާތަކަށް ރައްދު ދިނުމުގެ ގޮތުން ހިޒްބުﷲ އިން އިޒްރޭލުގެ ބޯޑަރު ސަރަހައްދަށް ދޭތެރެދޭތެރެއިން ހަމަލާދޭން ފެށިތާ ގާތްގަނޑަކަށް އެއް އަހަރު ފަހުންނެވެ..

އޭއެފްޕީގެ ތަފާސްހިސާބު ތަކަށް ބަލާއިރު، ސެޕްޓެމްބަރު 23 ން ފެށިގެން ހަނގުރާމައިގެ ސަބަބުން ލުބުނާނުގައި މަދުވެގެން 1،754 މީހުން މަރުވެފައިވެއެވެ. ނަމަވެސް ޙަޤީޤީ އަދަދު މިއަށް ވުރެ މަތިވުމަކީ އެކަށީގެންވާ ކަމެކެވެ.

އިޒްރޭލުގެ ސިފައިން ބުނާ ގޮތުގައި ސެޕްޓެމްބަރު 30 ގައި އެއްގަމުގެ ހަމަލާތައް ފެށުނު ފަހުން ލުބުނާނުގައި އެމީހުންގެ 37 ސިފައިން މަރުވެފައިވެއެވެ.