ޔުނައިޓެޑުގެ ކޯޗަކަށް އަމޯރިމް ގެންނަން މަސައްކަތް ކުރަނީ

މެންޗެސްޓަރ ޔުނައިޓެޑުގެ ކޯޗަކަށް ޕޯޗުގަލްގެ ރުބެން އަމޯރިމް ގެންނަން މަސައްކަތް ކުރާ ކަމަށް މީޑިއާ ރިޕޯޓުތައް ބުނެފި އެވެ.

ޔުނައިޓެޑުގެ ކޯޗުކަމުގެ މަގާމު ހުސްވީ އެންމެ ފަހުން އެ މަގާމުގައި ހުރި ނެދަލެންޑްސްގެ އެރިކް ޓެން ހާގް މަގާމުން ވަކި ކުރުމުންނެވެ. ހޯމަ ދުވަހު ޔުނައިޓެޑުން ވަނީ އެ ޓީމުގެ ކޯޗުކަމުން ޓެން ހާގް ވަކިކޮށްފަ އެވެ. އަދި ދާއިމީ ކޯޗެއް ހޯދުމުގެ މަސައްކަތް ކުރަމުން އަންނައިރު، އެހާތަނަށް ޔުނައިޓެޑަށް އިރުޝާދު ދޭނީ އެސިސްޓެންޓް ކޯޗު ރުޑް ވެން ނިސްޓަލްރޫއި ކަމަށް އެ ކުލަބުން ވަނީ ބުނެފަ އެވެ.

މީޑިއާ ތަކުގައި ބުނެފައިވާ ގޮތުން ޔުނައިޓެޑުން މަސައްކަތް ކުރަމުން އަންނަނީ އެ ކުލަބުގެ ކޯޗަކަށް އުމުރުން 39 އަހަރުގެ އަމޯރިމް ގެންނާށެވެ. މިވަގުތު އޭނާ އިރުޝާދު ދެމުން އަންނަނީ ޕޯޗުގަލްގެ ސްޕޯޓިންގ އަށެވެ. އޭނާ ހޯދުމުގެ ޝައުޤުވެރިކަން ޔުނައިޓެޑުން ފާޅުކޮށްފައިވާއިރު، އޭނާ ވެސް ހުރީ ޔުނައިޓެޑަށް ބަދަލުވާން ބޭނުންވެފައި ކަމަށް ރިޕޯޓުތައް ބުނެ އެވެ.

އަމޯރިމް ހޯދުމަށް ޔުނައިޓެޑުން ގާތް ގަނޑަކަށް 10 މިލިއަން ޔޫރޯގެ އަދަދެއް ސްޕޯޓިންގ އަށް ދައްކަން ޖެހޭނެ ކަމަށް ވެސް ރިޕޯޓުތައް ބުނެ އެވެ. އަދި އެ އަދަދު ދައްކަން ޔުނައިޓެޑުން ތައްޔާރަށް އޮތް ކަމަށް ވެސް މީޑިއާ ތަކުގައި ވަނީ ރިޕޯޓުކޮށްފަ އެވެ. މީގެ ކުރިމް ބެންފީކާ އަދި ޕޯޗުގަލް ޤައުމީ ޓީމަށް ވެސް ކުޅެފައިވާ އަމޯރިމް ކޯޗިންގެ ކެރިއަރު ފެށީ 2018 ވަނަ އަހަރު އެވެ. އޭގެ ފަހުން ސްޕޯޓިންގ އަކީ އަމޯރިމް އިރުޝާދު ދޭ ތިން ވަނަ ކުލަބެވެ.

ޔުނައިޓެޑުގެ ކޯޗުކަމުން ޓެން ހާގް ވަކިކޮށްފައި ވަނީ އޭނާގެ އިރުޝާދުގެ ދަށުން މި ސީޒަންގައި ޔުނައިޓެޑުގެ ނަތީޖާތައް ވަރަށް ބޮޑަށް ދަށްވުމުންނެވެ. މި ސީޒަންގެ އިނގިރޭސި ޕްރިމިއާ ލީގުގައި ޔުނައިޓެޑުން ކުޅެފައިވާ ނުވަ މެޗުގެ ތެރެއިން އެ ޓީމު މޮޅުވެފައި ވަނީ އެންމެ ތިން މެޗުންނެވެ. ދެ މެޗު އެއްވަރުވެފައިވާއިރު، ހަތަރު މެޗުން ވަނީ ބަލިވެފަ އެވެ. ޔުނައިޓެޑުން ޓެން ހާގް ވަކި ކުރީ ލީގުގައި އާދިއްތަ ދުވަހުގެ ރޭ ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން ބަލިވެފައި ވަނިކޮށެވެ.

ޓެން ހާގްގެ އިރުޝާދުގެ ދަށުން ޔުނައިޓެޑު ވަނީ ޖުމުލަ 128 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 70 މެޗުން މޮޅުވެފަ އެވެ. 23 މެޗު އެއްވަރުވެފައިވާއިރު، 35 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ޔުނައިޓެޑު ވަނީ ދެ ތައްޓެއް ވެސް ކާމިޔާބު ކޮށްފަ އެވެ. އެއީ އެފްއޭ ކަޕްގެ އިތުރުން، ކަރަބޯ ކަޕް އެވެ.