ހޯމަ ދުވަހު އިޒްރޭލުން އިރުމަތީ ބެކާ ވެލީގެ އެކި ސަރަޙައްދުތަކަށް ދިން ހަމަލާތަކުގައި މަދުވެގެން 60 މީހުން މަރުވެފައިވާ ކަމަށް ލުބުނާންގެ ސިއްޙަތާ ބެހޭ ވުޒާރާއިން ބުނެފިއެވެ. މީގެ ތެރެއިން ގިނަ މީހުން މަރުވެފައިވަނީ ބައަލްބެކް ސަރަޙައްދުގައެވެ.

ސިއްޙަތާ ބެހޭ ވުޒާރާއިން ބުނެފައިވަނީ މަރުވި މީހުންގެ ތެރޭގައި މަދުވެގެން ދެ ކުޑަކުދިން ހިމެނޭ ކަމަށެވެ.

މަރުވި މީހުންގެ އަދަދުތައް މުޅިން އަދި ކަށަވަރު ނުވާއިރު، މަދުވެގެން 58 މީހުން ޒަޚަމްވެފައިވާ ކަމަށް ސިއްޙީ ވުޒާރާއިން އިތުރަށް ބުނެފައިވެއެވެ. މީހުން ސަލާމަތްކުރުމުގެ މަސައްކަތް ކުރަމުންދާ ކަމަށްވެސް އޮފިޝަލުން ބުނެފައިވެއެވެ.

ހޯމަ ދުވަހު މަރުވި މީހުންގެ އަދަދާއެކު، ފާއިތުވި މަހުގެ ފަހުކޮޅު އިޒްރޭލު-ހިޒްބުﷲ ހަނގުރާމަ ފެށުނީއްސުރެ ލުބުނާނުގައި މަރުވި މީހުންގެ ޖުމްލަ އަދަދު 1,700 އަށްވުރެ އިތުރުވެފައިވާ ކަމަށް އޭއެފްޕީގެ ތަފާސް ހިސާބުތަކުން ދައްކައެވެ. މި ތަފާސް ހިސާބުތަކަކީ ސިއްޙަތާ ބެހޭ ވުޒާރާގެ އަދަދުތަކަށް ބިނާކޮށް ނެރެފައިވާ ތަފާސްހިސާބުތަކެކެވެ.

އެހެން ނަމަވެސް، މަޢުލޫމާތު ފުރިހަމަނުވާތީ، ޙަޤީޤީ އަދަދު މިއަށްވުރެ މަތިވުމުގެ ފުރުޞަތު އެބައޮތެވެ.

ހޯމަ ދުވަހުގެ ހަމަލާތަކާ ބެހޭ ގޮތުން ބައަލްބެކްގެ ގަވަރުނަރު ބަޝީރު ޚުދުރު ވިދާޅުވެފައިވަނީ މިއީ ހަނގުރާމަ ފެށުނީއްސުރެ އެ ސަރަޙައްދަށް ދެވުނު "އެންމެ ގަދަފަދަ" ހަމަލާތައް ކަމުގައެވެ.

ބައަލްބެކަކީ ސީރިއާ އާ އިންވެގެންވާ ބެކާ ވެލީގައި އޮންނަ ފަގީރު ސަރަޙައްދެކެވެ.

ހޯމަ ދުވަހު އިޒްރޭލުން އެ ސަރަޙައްދަށް ބާރުގަދަ ހަމަލާތައް ދިން އިރު އެ ސަރަހައްދުގެ އާންމުންނަށް އެއްވެސް އިންޒާރެއް ދީފައެއް ނުވެއެވެ.

އިޒްރޭލު-ހިޒްބުﷲ ހަނގުރާމަ ފެށުނީ ސެޕްޓެމްބަރ 23 ގައެވެ. މިއީ ގާތްގަނޑަކަށް އަހަރެއް ވަންދެން ދެ ފަރާތުން ބޯޑަރު ހުރަސްކޮށް ހަމަލާދެމުން ގެންދިއުމަށްފަހުގައެވެ.

މި ހަނގުރާމައިގެ ސަބަބުން މަދުވެގެން 1.3 މިލިއަން މީހުން ގެދޮރު ދޫކޮށް ދާން މަޖުބޫރުވެފައިވެއެވެ. އޭގެ ތެރެއިން 800,000 އަށް ވުރެ ގިނަ މީހުން ލުބަނާންގެ އެތެރޭގައި ތިބި ކަމަށް އދ.ގެ ހިޖުރަކުރާ މީހުންނާ ބެހޭ އޭޖެންސީން ބުނެފައިވެއެވެ.

ލުބުނާނުގެ އިދާރާތަކުން ބުނާ ގޮތުގައި އެއް މިލިއަނަށްވުރެ ގިނަ މީހުން ސީރިއާއަށް ހިޖުރަކޮށްފައިވެއެވެ. މީގެ ތެރެއިން ގިނައީ ލުބުނާނުގައި ދިިރިއުޅެމުންދިޔަ ސީރިއާގެ ރައްޔިތުންނެވެ.