ގުޅިފަޅު އިތުރަށް ހިއްކުމަށް ބޭނުންވާ ފައިސާ ހަމަނުޖެހޭ: މިނިސްޓަރު މުއްތޮލިބް
ބިން ހިއްކަން އެމްޓީސީސީ އާ ހަވާލު ކުރީ ފައިސާ ހަމަ ނުޖައްސާ ކަން މިނިސްޓަރގެ ވާހަކައިން ހާމަވި
މިނިސްޓަރ ޑރ. އަބްދުﷲ މުއްތަލިބު
ގުޅިފަޅު އިތުރަށް ހިއްކުމަށް ބޭނުންވާ ފައިސާ އަދިވެސް ހަމަނުޖެހޭ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބް ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވިދާޅުވެއްޖެއެވެ.
މުއްތޮލިބް ސާފުކޮށްދެއްވި ގޮތުގައި، ޑރ. މުއިއްޒުގެ ސަރުކާރުން އެމްޓީސީސީއާ ހަވާލުކޮށްގެން ގުޅިފަޅުން އިތުރަށް ހިއްކަން ނިންމާފައިވާ 85 ހެކްޓަރުގެ ބިން ހިއްކުމަށް މިހާތަނަށް ފައިސާ ހަމަޖެހިފައި ނުވާ ކަމަށެވެ.
"ސަރުކާރުން އިތުރަށް ހިއްކަން ބޭނުންވާ 85 ހެކްޓަރުގެ ބިން ހިއްކުމަށް އަޅުގަނޑުމެން އެމްޓީސީސީއާ އެކު އެމްއޯޔޫއެއްގައި ސޮއިކޮށް ފައިނޭންސް ހޯދުމުގެ މަސައްކަތްކުރީ. ނަމަވެސް އަޅުގަނޑުމެންނަށް އަދި ސީދާ އެ ފައިނޭންސް ކުރުމުގެ ސާފު މަގެއް ފެންނަން ނެތުމާ އެކު، އެ މަސައްކަތް އަދި ނުފެށި އޮތީ،" މުއްތޮލިބް ވިދާޅުވިއެވެ.
މިނިސްޓަރު އިތުރަށް ވިދާޅުވީ، ސަރުކާރުގެ ޓާގެޓަކީ އެކި ގޮތްގޮތަށް މަސައްކަތް ކޮށްގެން ނަމަވެސް ވީހާވެސް އަވަހަކަށް މި 85 ހެކްޓަރުގެ މަސައްކަތް ކުރިއަށް ގެންދިއުން ކަމަށެވެ. އެހެން ނަމަވެސް އެ ގޮތްގޮތަކީ ކޮބައިކަމެއް މިނިސްޓަރ ވިދާޅެއް ނުވެއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވަނީ ނެދަލެންޑްސްގެ ބޮސްކާލިސް ކުންފުންޏާ ހަވާލުކޮށްގެން ގުޅިފަޅުން 150 ހެކްޓަރުގެ ބިން ހިއްކަން ހަވާލުކޮށް އެބިމުން މާލޭ ރައްޔިތުންނަށް ގޯތިވެސް ދީފައެވެ. ގުޅިފަޅުން ބިން ހިއްކުމަށް ކުރީ ސަރުކާރުން ފެށި މަސައްކަތް މި އަހަރު މުޅިން ނިމިފައިވާއިރު، ޑރ. މުއިއްޒުގެ ސަރުކާރުންވަނީ ގުޅިފަޅުގެ ބިން ބޭނުން ކުރާނެ ގޮތުގެ ޕްލޭން މުޅިން ބަދަލުކޮށް، އެތަނުން ދޫކޮށްފައިވާ ގޯތިތައް ކެންސަލް ކޮށް އަލުން ގުރުއަތުލައިގެން ގޯތި ދޫކުރާ ގޮތައް ނިންމާފައެވެ. ގުޅިފަޅުން ހިއްކާފައިވާ ސަރަހައްދުން ގޯތީގެ ރަޖިސްޓަރީ ލިބިފައިވާ ފަރާތްތަކުން މިކަމުގެ ކަންބޮޑުވުން ފާޅު ކުރަމުންދިޔަ ނަމަވެސް އެކަމަށް ފަރުވާލެއް ބެހެއްޓުމެއްނެތި މި ސަރުކާރުން ވަނީ އަލުން ގުރުއަތުލުމުގެ ކަންކަން އަންގާރަ ދުވަހުން ފެށިގެން ކުރިއަށް ގެންދިއުމަށް ނިންމާފައެވެ. އަލުން ގޯތި ދިނުމަށް ކަނޑައަޅާފައިވާ ސަރަހައްދުގެ ތެރޭގައި ގުޅިފަޅުން ނުހިއްކާ އޮތް ފުން ސަރަހައްދުވެސް ހިމެނޭކަން ފާހަގަ ކުރެވެއެވެ.
ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން ޖުމްލަ 3،520 ގޯތި ދޫކުރަން މި ސަރުކާރުން ވަނީ ނިންމައިފައެވެ. ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް މާލޭ މީހުންނަށް މި ސަރަހައްދުން 9،000 އަށް ވުރެ ގިނަ ގޯތި ދޫކުރަން ކުރީގެ ސަރުކާރުން އޮތީ ނިންމައިފައެވެ.
