މުދަލާއި ޚިދުމަތުގެ އަގުތައް މައްޗަށް ގޮސް، އަމިއްލަ ފަރުދުންގެ ދިރިއުޅުން ހަނާވެ، ވިޔަފާރިތައް ބަނގުރޫޓު ވާއިރުވެސް އިކޮނޮމިކް މިނިސްޓަރު މުޙައްމަދު ސައީދުގެ މަސައްކަތަކީ ހަމައެކަނި "ފޮނި ބައިސާ" ކެނޑުން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

އެކްސް ގައި ކުރެއްވި ޕޯސްޓެއްގައި އަމީރު ވިދާޅުވީ އަމިއްލަ ގާބިލްކަމެއް ނެތިއްޔާ އެހެން މީހުންގެ ވާހަކަ ނުދައްކާ މަޑުން ހުރިއްޔާ މާ ތާހިރު ވާނެ ކަމަށެވެ. އަމީރު އެފަދައިން ވިދާޅުވީ މި ސަރުކާރުން ބޮޑު ބަޖެޓެއް ފާސްކޮށް، އެ ފައިސާ ހޭދަކުރި ނަމަވެސް ވިޔަފާރިތަކަށް ފައިސާ ދޫނުކޮށް، ވިޔަފާރިތައް ބަނގުރޫޓޫވެ މުދަލުގެ އަގު އުފުލެމުން ދާ ދަނޑިވަޅެއްގައި މިހާރު އުފުލަންޖެހޭ ހުރިހާ ދައްޗެއް ދިވެހީންނަށް ގެނެސްދިނީ އެމްޑީޕީން ކަމަށް މިނިސްޓަރު ސައީދު ދެއްކެވި ވާހަކަފުޅުތަކަށް ރައްދު ދެއްވުމުގެ ގޮތުންނެވެ.

މި ސަރުކާރުގެ ނާގާބިލުކަން ފާހަގަކުރައްވަމުން އަމީރު ވިދާޅުވީ، ޑިވެލޮޕްމަންޓް ބޭންކާއި ފައިނޭންޝަލް ސެންޓަރުގެ ނަމުގައި ގެނައި 8 ބިލިއަން ޑޮލަރުގެ އިންވެސްޓްމަންޓްގެ ނަތީޖާއެއް ނުފެންނަ ކަމަށެވެ. އަދި އެންމެ 2 އަހަރު ތެރޭގައި 30 ބިލިއަނަށް ގައުމު ދަރަނިވެރި ކުރިއިރު ކުރެވުނު އެއްވެސް މަސައްކަތެއް ފެންނަ ދިވެއްސަކު ނެތް ކަމަށް އަމީރު ވިދާޅުވި އެވެ.

މީގެ އިތުރުން ކޮވިޑް-19 ގެ ބަލިމަޑުކަމުގެ ތެރޭގައި ނެގަން ޖެހުނު ދަރަންޏާ ބެހޭގޮތުން އަމީރު ވިދާޅުވީ، އެއީ ގައުމާއި އަމިއްލަ ފަރުދުންނާއި ވިޔަފާރިތައް ސަލާމަތްކުރުމަށް ކޮންމެހެން ނަގަންޖެހުނު ދަރަންޏެއް ކަމަށެވެ.

އަދި ގްރޭޓަރ މާލެ ކަނެކްޓިވިޓީ ބްރިޖްގެ މަޝްރޫޢުއަކީ މާލެ ސަރަހައްދުގެ އިގްތިސާދު މުޅިން ބަދަލުކޮށްލައި، އިޖްތިމާއީ ކުރިއެރުންތަކެއް ގެނުވާނެ ޕްލޭން ތަކަކާއެކު އެކު ފެށުނު މަސައްކަތެއް ކަން ފާހަގަ ކުރައްވާ އަމީރު ވިދާޅުވީ، މި މަޝްރޫޢުގެ ލޯނަކީ 5 އަހަރުގެ ގްރޭސް ޕީރިއަޑަކާއެކު 25 އަހަރުން ދައްކާ ގޮތަށް ހަމަޖެހިފައިވާ އަގުހެޔޮ ލޯނެއް ކަމަށެވެ.

އަމީރު އިތުރަށް ފާހަގަކުރެއްވި ގޮތުގައި، މާލޭ ކޮމާޝަލް ޕޯޓް ގުޅިފަޅަށް ބަދަލުކޮށް، މާލޭ ޕޯޓް ސަރަހައްދު ތަރައްގީކުރުމަށް ކަނޑައެޅިފައިވާ ފައިސާއިން މިހާރު މިސަރުކާރުން ހައުސިންގ މަޝްރޫޢުތައް ހިންގަމުންދާ ކަމަށް ވިދާޅުވިއެވެ. އަދި ގުޅިފަޅު އެއްކޮށް ހިއްކައި، ގިރާވަރު ހިއްކުމުގެ މަސައްކަތް ނިންމައި، މީހުން އާބާދުކުރުމުގެ މަސައްކަތް ފެށެން ޖެހޭނެ ވާނެ ކަމަށާއި އެ ޕްލޭންތައް ވެސް ހުރީ ހެދިފައި ކަމަށް އަމީރު ވިދާޅުވި އެވެ