ސަރުކާރަށް ނުކުރެވޭ ކަންކަމުގެ ވާހަކަ ދެއްކީމަ، އެއީ ސިޔާސީ ވާހަކަތަކެއްގެ ގޮތުގައި ދެކުމަކީ ވަރަށް ކޮށި ވިސްނުމެއް: މޭޔަރ އާޒިމް
މި ސަރުކާރުން ވެރިކަމަށް އައުމަށް ވީ ވައުދުތަކުގެ ތެރެއިން އެއްވެސް ވައުދެއް މިހާތަނަށް ފުއްދިފައިނުވޭ
މާލޭ ސިޓީ މޭޔަރު އާދަމް އާޒިމް: އާޒިމް ވިދާޅުވީ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ މި ސަރުކާރަށް ހައްލުނުކުރެވޭ ކަމަށް
ރައީސް މުއިއްޒުގެ މި ސަރުކާރުން ވެރިކަމަށް އައުމަށްޓަކައި ވީ ވައުދުތައް ނުފުއްދޭ ވާހަކަ ރައްޔިތުން ދައްކާނޭ ކަމަށާއި އެވާހަތައް އެގޮތަށް ދެއްކުމުން އެއީ ސިޔާސީ ވާހަތަކެއްގެ ގޮތުގައި ދެކުމަކީ ވަރަށް ކޮށި ވިސްނުމެއް ގުންގުޅޭ ބަޔަކު ކުރާނޭ ކަމެއް ކަމަށް މާލޭ ސިޓީ މޭޔަރު އާދަމް އާޒިމް ވިދާޅުވެއްޖެ އެވެ.
އާޒިމް މިފަދައިން ވިދާޅުވީ ގިރާވަރު ބިންވެރިޔާ ސައްލާގެ ނަމުގައި ހުކުރު ދުވަހުގެ ރޭ ބޭއްވި ރައްމިއްޔާތުގައި ވާހަކަދައްކަވަމުންނެވެ.
މޭޔަރު އާޒިމް ވިދާޅުވީ މާލޭގެ ރައްޔިތުންނަށް ބޯހިޔާވަހިކަން ނުލިބޭ މައްސައަކީ އަދިވެސް ހައްލުނުކުރެވޭ މައްސަލައެއް ކަމަށާއި އެކަން މި ސަރުކާރަށް ނުވާކަމަށެވެ.
އާޒިމް ވިދާޅުވީ މިސަރުކާރުން ވެރިކަމަށް އައުމަށްޓަކައި ވެފައިވާ ވައުދުތަކުގެ ތެރެއިން އަދި މިހާތަނަށް އޭގެ އެއްވެސް ވައުދެއް ފުއްދިފައި ނުވާކަމަށެވެ.
އާޒިމް ވިދާޅުވީ ގުޅިފަޅުވެސް އަދި ގިރާވަރު ފަޅުވެސް މިހާރު އޮތީ ގޯތި ދެވޭވަރަށް ވަރަށް ބޮޑުތަން ހިއްކާފައިވާ ކަމަށެވެ. އަދި އެތަނުން މިހާރު ގޯތި ނުދެވެންވީ އެއްވެސް ސަބަބެއް ނެތް ކަމަށް އޭނާ ވިދާޅުވި އެވެ.
އާޒިމް ވިދާޅުވީ މި ސަރުކާރަށް އެކަން ނުވުމަކީ ބަހަނާއެއް ދެއްކޭނޭ ކަމެއް ނޫން ކަމަށާއި މި ސަރުކާރަށް ވުރެ ރަނގަޅަށް މާލޭ ސިޓީ ކައުންސިލުން ވެސް އެ މަސައްކަތް ކުރާނޭ ކަމަށެވެ.
ގުޅިފަޅުވެސް އަދި ގިރާވަރު ފަޅުވެސް މިހާރު އޮތީ ގޯތި ދެވޭވަރަށް، ވަރަށް ބޮޑުތަން ހިއްކާފަ. އެތަނުން ގޯތި ނުދެވެންވީ ސަބަބެއް ނުފެނޭ. ގޯތި ދެވޭވަރަށް އެތަންތަން ވަނީ ހިއްކާފަ. ދެން އުތުރުފިލަފަޅަކީ ހަމަގައިމުވެސް ތިބޭފުޅުންނަށް އެނގިވަޑައިގަންނަވާނެ ކުދިކުދި އެޕާޓްމަންޓްތައްހުރި މީހުން އެތަންތަން ދޫކޮށްލީމަ އެމީހުންނަށް ދިނުމައްޓަކައި ފެށި ޕްރޮގްރާމެއް. އަދި ދަފްތަރުގެ ބޭފުޅުންނަށް، މާލޭގަ 20 އަހަރު 25 އަހަރު 30 އަހަރު އެބަތިބި، އެމީހުން ދަފުތަރުގައި ޖެހިގެން. އެމީހުންނަށް ގޮތެއް ހޯދައިދިނުމައްޓަކައި ހުޅުވާލި ފުރުސަތެއް އުތުރު ތިލަފަޅަކީ.މާލެ ސިޓީ މޭޔަރު އާދަމް އާޒިމް
އާޒިމް ވިދާޅުވީ މިކަން މިހެން އޮތްއިރު، ސަރުކާރުން އެންމެ ބޮޑު ހޭދައެއް ކޮށްގެން އެންމެ ފުރަތަމަ ވެސް އެންމެ އިސްކަމެއް ދީގެން ކުރަން ޖެހޭނޭ ކަމަކީ ބޯހިޔާވަހިކަމުގެ މައްސަލަ ހައްލުކުރުން ކަމަށެވެ.
އެހެން ނަމަވެސް މި ސަރުކާރު އައިފަހުން އަދި މިހާތަނަށް ރައްޔިތުންނަށް ބޯހިޔާވަހިކަމެއް ހޯދަދޭން މަސައްކަތް ނުކުރާކަން ފާހަގަވާކަމަށް އާޒިމް ވިދާޅުވި އެވެ.
އާޒިމް ވިދާޅުވީ ސަރުކާރުން ނުކުރެވޭ ކަންކަމުގެ ވާހަކަ ރައްޔިތުން ދައްކާނޭ ކަމަށާއި އެގޮތަށް ދައްކާ ކޮންމެ ވާހަކައަކީ ސިޔާސީ ވާހަކައަކަށް ނުވާނޭ ކަމަށެވެ. އަދި ސަރުކާރުން ނުކުރެވޭ ކަންކަމުގެ ވާހަކަތައް ރައްޔިތުން ދެއްކުމުން އެއީ ސިޔާސީ ވާހަތަކެއް ކަމަށް ވިސްނާނީ ވަރަށް ކޮށި ސިކުނޑި ހުން މީހުން ކަމަށް އާޒިމް ވިދާޅުވި އެވެ.
