ކުރީގެ ރައީސް އިބްރާހިމް މުހައްމަދު ސޯލިހު ގެ ސަރުކާރުން މާލެ ސަރަހައްދުން ރައްޔިތުންނަށް ދީފައިވާ ގޯތިތައް އަތުލަން ޖެހޭ ކަމަށް ސަރުކާރު ހިންގާ ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ފަލާހު ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ހުޅުމާލެ، ގުޅީފަޅު އަދި ގިރާވަރުފަޅުން ދޫކޮށްފައިވާ ގޯތިތައް ދައުލަަތަށް އަނބުރާ ނަގަން ޖެހޭ ކަމަށެވެ.

ފަލާހު ވިދާޅުވީ ރައްޔިތުންނަށް ދީފައިވާ އެ ބިންތަކުގައި ވަށާ ފާރެއް ރާނާފައި ހުރިއްޔާ ވަށާފާރުގެ ބަދަލު ދީ، ގޯއްޗެއް ރާނާފައި ހުރިއްޔާ އެ ގޯއްޗެއްގެ ބަދަލުދީނުމަށްފަހު ހުރިހާ އެއްޗެއް ދައުލަތަށް ނަގަންޖެހޭ ކަމަށެވެ.

ރައީސް ސޯލިހުގެ ސަރުކާރުން ދީފައިވާ ގޯތިތައް އަތުލަން ފަލާހު ވިދާޅުވި އިރު އެތަނުގައި ގޯތި ވަށާފާރު ރާނާފައިވާ މީހުންނަށް ވެސް ބަލަން ނުޖެހޭ ކަމަށް ފަލާހު މިވަނީ ފާޅުގަ ވިދާޅުވެފައެވެ.

މި ސަރުކާރުން ވެރިކަމާ ހަވާލުވިފަހުން ކުރީ ސަރުކާރުގައި ބިންވެރިޔާ ސްކީމްގެ ދަށުން ދޫކޮށްފައިވަނީ ގޯތިތަކެއް ނޫން ކަމަށް އެއް ފަހަރު ބުނާއިރު އަނެއް ފަހަރު ބިންވެރިޔާ ސްކީމުން ގޯތި ލިބިފައިވާ އެއްވެސް މީހެއްގެ ހައްގަށް އުނިކަން ނުލިބޭނެ ކަމުގެ ޔަގީންކަން ދޭ ކަމަށް ދަނީ ބުނަމުންނެވެ.

ސަރުކާރުގެ ވާހަކަތައް ދެފަހަރު އެއް ގޮތަކަށް ނުހުންނާތީ އެކަމުގެ ޝަކުވާ ވެސް ރައްޔިތުން ކުރަމުންދާތާ ވަނީ ގިނަދުވަސް ވެފައެވެ.

މިދިޔަ ސަރުކާރު ބަދަލުވެގެން ދިޔައިރު ގޯތި ދޫކުރި ހުރިހާ ސަރަހައްދެއް ވަނީ ހިއްކުމުގެ އަމަލީ މަސައްކަތް ފަށާފައެވެ. ބޮޑު ބައެއް ނިމިފައިވަނިކޮށް، މިސަރުކާރުން ވަނީ އެމަޝްރޫއުތަކުގެ އަމަލީ މަސައްކަތް ހުއްޓުވައި، ބޯހިޔާވަހިކަމަށް ފުށިދިއްގަރުފަޅުގެ މަޝްރޫއު ފަށާފައެވެ. މި މަޝްރޫއުގެ މަސައްކަތް "ރަސްމާލެ" ނަމުގައި ހިއްކަން ފަށާފައިވަނީ 18 ޑިސެންބަރު 2023 ގައެވެ. ނަމަވެސް އެމަޝްރޫއު ވެސް ކުރިއަށް ނުގެންދެވި ވަނީ ހުއްޓިފައެވެ. ގިނަ ބައެއްގެ ފާޑުކިޔުން އަމާޒުވުމާ ގުޅިގެން ގުޅީފަޅު، ގިރާވަރުފަޅު އަދި ހުޅުމާލެ ފޭސް 3 ހިއްކުމުގެ މަސައްކަތް ވަނީ ފަށާފައެވެ.

ސަރުކާރު ހިންގާ ޕާޓީގެ އިސް ފަރާތްތަކުގެ ރާގު ބަދަލުވަމުން ދާއިރު މުއިއްޒު ވެރި ކަމަށް ވަޑައިގަންނަމުން ވިދާޅުވެފައި ވަނީ އެއް ވެސް ސަރުކާރަކުން މީހަކަށް ދީފައިވާ ފުލެޓެއް ވިޔަސް ގޯއްޗެއް ވިޔަސް އަތުނުލައްވާނެ ކަމަށެވެ.