ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ސަޕޯޓަރުންގެ ހިތް އުފާ ކޮށްދެވޭ ކަމަށް އެ ޓީމުގެ ކޯޗު ލުއިސް އެންރީކޭ ބުނެފި އެވެ.
އޭނާ މިހެން ބުނީ ފްރާންސް ލީގުގައި ޕީއެސްޖީން މާސޭއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. މާސޭއާ ދެކޮޅަށް ކުޅުނު މެޗުން މޮޅުވެ ޕީއެސްޖީން ވަނީ އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ.
އެންރީކޭ ބުނީ މެޗުގެ ނަތީޖާއާ މެދު އޭނާ ހުރީ ވަރަށް ބޮޑަށް ހިތްހަމަ ޖެހިފައި ކަމަށެވެ. އޭނާ ބުނީ ކުލަބުގެ ސަޕޯޓަރުން ބޭނުން ވަނީ ޓީމު މޮޅުވާން ކަމަށާއި، ސަޕޯޓަރުންގެ އުންމީދުތައް ޙާސިލުކޮށް، ސަޕޯޓަރުންނަށް އުފާވެރިކަން ގެނެސްދެވޭ ކަމަށް ޤަބޫލު ކުރާ ކަމަށެވެ. ޚާއްސަކޮށް ސަޕޯޓަރުން ބޭނުން ވަނީ ކޮންމެ މެޗަކުން ވެސް މޮޅުވަން ކަމަށާއި، އޭނާ އަދި ކުޅުންތެރިން ވެސް ބޭނުން ވަނީ އެގޮތް ކަމަށް އެންރީކޭ ވަނީ ބުނެފަ އެވެ.
އެންރިކޭ ބުނީ ރަށުން ބޭރުގައި ޕީއެސްޖީން ދެއްކީ ވަރަށް ފުރިހަމަ ކުޅުމެއް ކަމަށާއި، މެޗު ފަށައިގެން ގޮސް، ފަހު ވަގުތާ ހަމައަށް ޕީއެސްޖީގެ ފަރާތުން ފެނުނީ ބޭނުންވާ ކަހަލަ ކުޅުމެއް ކަމަށެވެ. އޭނާ ބުނީ މާސޭ އަކީ ވަރުގަދަ އިދިކޮޅު ޓީމެއް ކަމަށާއި، އެ ޓީމާ ދެކޮޅަށް ކުޅުމަކީ ވެސް އުނދަގޫ ކަމެއް ކަމަށެވެ. އެ މެޗުން ތިން ޕޮއިންޓު މުހިންމުއިރު، އެކަން ޙާސިލު ކުރެވުމުން ހިތްހަމަ ޖެހޭ ކަމަށް ވެސް އެންރީކޭ ބުންޏެވެ.
މީގެ އިތުރުން އެންރީކޭ ބުނީ ޕީއެސްޖީ އޮތީ ރަނގަޅު މިސްރާބެއްގައި ކަމަށާއި، އެ ރޫޙުގައި އޮވެ ޓީމު ކުރިއަށް ދާން އޭނާ ބޭނުންވާ ކަމަށެވެ. މާސޭ މެޗުން ވެސް ރަނގަޅު ކުރަން ހުރި ކަންކަން ފާހަގަވެފައިވާ ކަމަށާއި، ކުރިއަށް އޮތް ތަނުގައި އެކަންކަން ރަނގަޅު ކުރަން މަސައްކަތް ކުރާނެ ކަމަށް އެންރީކޭ ބުންޏެވެ. އޭނާ ދެކޭ ގޮތުގައި ޕީއެސްޖީން ބޭނުންވާ އަމާޒަށް އެ ކުލަބަށް ވާސިލުވެވޭނެ އެވެ.
ފްރާންސް ލީގުގައި ޕީއެސްޖީގެ މެޗެއް ދެން އޮންނާނީ ނޮވެމްބަރު މަހުގެ ދެ ވަނަ ދުވަހު އެވެ. ޕީއެސްޖީގެ އަމިއްލަ ދަނޑުގައި އެ ޓީމު ނިކުންނާނީ ލެންސްއާ ދެކޮޅަށެވެ.
