މެންޗެސްޓަރ ޔުނައިޓެޑުގެ ކޯޗުކަމުގެ މަޤާމުން ނެދަލެންޑްސްގެ އެރިކް ޓެން ހާގް ވަކިކޮށްފި އެވެ.

އުމުރުން 54 އަހަރުގެ ޓެން ހާގް، ޔުނައިޓެޑުގެ ކޯޗުކަމުގެ މަޤާމަށް ހަމަޖެއްސީ 2022 ވަނަ އަހަރު އެވެ. އޭގެ ފަހުން ޔުނައިޓެޑުން ވަނީ މިއަހަރުގެ ޖުލައި މަހުގެ ތެރޭގައި ޓެން ހާގްގެ އެއްބަސްވުން އައު ކޮށްފަ އެވެ. އެއްބަސްވުން އައު ކުރުމުގެ ކުރިން، ޔުނައިޓެޑުން އޭނާ ވަކި ކުރަން އުޅޭ ކަމުގެ އަޑުތަކެއް ވެސް ފެތުރުނެވެ. މީޑިއާ ތަކުގައި ބުނެފައިވާ ގޮތުން އޭރު ޔުނައިޓެޑުން ޓެން ހާގްގެ އެއްބަސްވުން އައު ކުރީ އޭނާގެ ބަދަލުގައި ގެންނާނެ ކޯޗެއް އެ ކުލަބަށް ނުލިބުމުންނެވެ.

ނަމަވެސް ހޯމަ ދުވަހު ޔުނައިޓެޑުން ވަނީ ކޯޗުކަމުގެ މަގާމުން ޓެން ހާގް ވަކި ކުރަން ނިންމައިފަ އެވެ. ޔުނައިޓެޑުން އާންމު ކޮށްފައިވާ ސްޓޭޓްމަންޓެއްގައި ބުނެފައި ވަނީ އެ ކުލަބުގެ ކޯޗުކަމުގެ މަގާމުން ޓެން ހާގް ވަކިކޮށްފައިވާ ކަމަށެވެ. އަދި ޔުނައިޓެޑުގައި ޓެން ހާގް ކޮށްފައިވާ މަސައްކަތާއި، އެ ކުލަބާ އެކު އޭނާ ހޯދާފައިވާ ކާމިޔާބަށް އެ ކުލަބުން ވަނީ ޝުކުރު އަދާ ކޮށްފަ އެވެ. ޔުނައިޓެޑުން ހާމަކޮށްފައިވާ ގޮތުގައި އެ ކުލަބުގެ ވަގުތީ ކޯޗުގެ ގޮތުގައި މަސައްކަތް ކުރާނީ ރުޑް ވެން ނިސްޓަލްރޫއި އެވެ.

ޓެން ހާގްގެ އިރުޝާދުގެ ދަށުން މި ސީޒަންގައި މިހާތަނަށް ޔުނައިޓެޑަށް ލިބިފައި ވަނީ ދަށް ނަތީޖާ ތަކެކެވެ. މިހާތަނަށް އިނގިރޭސި ޕްރިމިއާ ލީގުގައި ޔުނައިޓެޑުން ކުޅެފައިވާ ނުވަ މެޗުގެ ތެރެއިން އެ ޓީމު މޮޅުވެފައި ވަނީ އެންމެ ތިން މެޗުންނެވެ. ދެ މެޗު އެއްވަރުވެފައިވާއިރު، ހަތަރު މެޗުން ވަނީ ބަލިވެފަ އެވެ. ޔުނައިޓެޑުން ޓެން ހާގް ވަކި ކުރީ ލީގުގައި އާދިއްތަ ދުވަހުގެ ރޭ ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން ބަލިވެފައި ވަނިކޮށެވެ.

ޓެން ހާގްގެ އިރުޝާދުގެ ދަށުން ޔުނައިޓެޑު ވަނީ ޖުމުލަ 128 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 70 މެޗުން މޮޅުވެފަ އެވެ. 23 މެޗު އެއްވަރުވެފައިވާއިރު، 35 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ޔުނައިޓެޑު ވަނީ ދެ ތައްޓެއް ވެސް ކާމިޔާބު ކޮށްފަ އެވެ. އެއީ އެފްއޭ ކަޕްގެ އިތުރުން، ކަރަބޯ ކަޕް އެވެ.