ނިއުކާސަލް ބަލިކޮށް، ޗެލްސީ ފަސް ވަނަ އަށް

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، ޗެލްސީން ލީގު ތާވަލްގެ ފަސް ވަނަ އަށް ޖެހިލައިފި އެވެ.

ޗެލްސީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޗެލްސީން ލަނޑެއް ޖެހިއިރު، ނިއުކާސަލް އިން ވެސް ވަނީ ލަނޑެއް ޖަހައިފަ އެވެ. މެޗުން ޗެލްސީ މޮޅުވީ ދެ ވަނަ ހާފުގައި ޖެހި ލަނޑުންނެވެ.

މެޗު ފަށައިގެން ހަތަރު ވަނަ މިނެޓުގައި ޗެލްސީ އަށް ކުޅެމުން އަންނަ އިންގްލެންޑުގެ ކޯލް ޕާމާ ލަނޑެއް ޖެހި ނަމަވެސް، ވީޑިއޯ އެސިސްޓެންޓު ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން ފުރަތަމަ ހާފުގެ 17 ވަނަ މިނެޓުގައި ޗެލްސީ އަށް ލީޑު ނަގައިދިނީ ނިކޮލަސް ޖެކްސަން އެވެ. އެއީ ޕެޑްރޯ ނެޓޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި ނިއުކާސަލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ލެވިސް ހޯލް ތަނަވަަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ އެލެގްޒެންޑާ އިސާކް އެވެ. މެޗުން ޗެލްސީ މޮޅުވީ ދެ ވަނަ ހާފުގައި ލަނޑު ޖަހައިގެންނެވެ. އެގޮތުން ދެ ވަނަ ހާފު ފަށައިގެން ދެ ވަނަ މިނެޓުގައި ޗެލްސީގެ ދެ ވަނަ ލަނޑު ޖެހީ ޕާމާ އެވެ. އެއީ ރޮމެއޯ ލަވިއާ ތަނަވަސްކޮށްދިން ފުރުސަތެއްގައި ޕާމާ ޖެހި ލަނޑެކެވެ.

މޮޅާއެކު ޗެލްސީ ފަސް ވަނައިގައި އޮތީ މިހާތަނަށް ކުޅުނު ނުވަ މެޗުން 17 ޕޮއިންޓު ހޯދައިގެންނެވެ. މި ސީޒަންގެ ލީގުގައި ޗެލްސީ ވަނީ ފަސް މެޗުން މޮޅުވެފަ އެވެ. ދެ މެޗުން އެއްވަރުވެފައިވާއިރު، އަނެއް ދެ މެޗުން ވަނީ ބަލިވެފަ އެވެ.