އެމްއޭސީއެލްގެ ބޯޑުން އިބްރާހިމް ނޫރައްދީން ވަކިކޮށްފި

މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ބޯޑުން އިބްރާހިމް ނޫރައްދީން މިދިޔަ ބުރާސްފަތި ދުވަހު ވަކިކޮށްފިއެވެ.

ނޫރައްދީން މަގާމުން ވަކިކުރީ ޕްރައިވައިޓައިޒޭޝަން އެންޑް ކޯޕަރައިޓައިޒޭޝަން ބޯޑުންނެވެ. ނޫރައްދީން ވަކިކުރި މައްސަލައިގެ މައުލޫމާތު އެނގޭ ފަރާތެއް ރާއްޖެއެމްވީއަށް މައުލޫމާތު ދެމުން ބުނެފައިވަނީ ނޫރައްދީން ވަކީ ކުރީ ޕީސީބީން ކަމަށެވެ. އަދި އެކަން އާންމުންކޮށް އެއްވެސް ފަރާތަކަށް އަންގާފައި ނުވާއިރު، އޭނާ ވަކިކުރި ސަބަބެއްވެސް ހާމަކޮށްފައި ނުވާ ކަމަށެވެ. އަދި އެއާއެކު ކުންފުނިން، ކުންފުނީގެ ޑިރެކްޓަރުންގެ ބޯޑާއި ގުޅޭ ސަރކިއިލާއެއް ނެރެފައިވާ ކަމަށެވެ.

އެމްއޭސީއެލްއިން ނެރެފައިވާ ސަރކިއުލާފައި ބުނެފައިވަނީ ކުންފުނީގެ ޑިރެކްޓަރުންގެ ބޯޑަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން 24 އޮކްޓޫބަރު 2024 ގައި ގެނައި ބަދަލާއި ގުޅިގެން، ޑިރެކްޓަރުންގެ ބޯޑަށް ބަދަލު އައިސްފައިވާ ކަމަށެވެ.

އެމްއޭސީއެލް ބޯޑުގައި މިހާރު ތިއްބެވީ 5 ބޭފުޅުންނެވެ. އިބްރާހިމް ނޫރައްދީން އާއެކު ކުރިން 6 މެންބަރުން ތިއްބެވެ.

އެމްއޭސީއެލްގެ ޑިރެކްޓަރުންގެ ބޯޑަށް އިބްރާހިމް ނޫރައްދީން އައްޔަންކުރެއްވީ މާޗް 2019 ގައެވެ. އިބްރާހިމް ނޫރައްދީން ވަނީ 2005 ވަނަ އަހަރުން ފެށިގެން އޮކްޓޫބަރު 2008 އާ ހަމައަށް ވެސް އެމްއޭސީއެލްގެ ބޯޑު މެމްބަރުކަން ކުރައްވައިފަ އެވެ. އަދި ނަޝީދުގެ ސަރުކާރުގައި ޑިސެމްބަރު 2008 ން ފެށިގެން ޖޫން 28، 2010 އާ ހަމައަށް އޭނާ ހުންނެވީ އެ ބޯޑުގެ ޗެއާމަންގެ މަގާމުގައެވެ.

މީގެ އިތުރުން އެބޯޑުގެ ޗެއާމަންގެ މަގާމުން މުހައްމަދު އުމަރު މަނިކު (އެމްޔޫ މަނިކު) ވަނީ މި އަހަރުގެ ޖެނުއަރީ މަހުގެ 28 ވަނަ ދުވަހު އިސްތިއުފާ ދެއްވާފައެވެ. އެމްޔޫ މަނިކު އެމްއޭސީއެލްގެ ބޯޑާ ގުޅިވަޑައިގަތީ 2013 ވަނަ އަހަރު އެވެ. އޭގެ ފަހުން އޭނާ ހުންނެވީ އެ ކުންފުނީގެ ޗެއާމަންގެ މަގާމުގައެވެ.