ވީއައިއޭ ޕާކިން ޒޯން ކައިރީ އޮންނަ މަގުން އެއްކޮޅަށް ދުއްވޭ ގޮތަށް ހަދައި، ޓްރެފިކް ފްލޯއަށް ބަދަލުތަކެއް

ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި އުޅަނދުތައް ދަތުރުކުރަންވީ ގޮތަށް ބުރާސްފަތި ދުވަހުގެ ރެއިން ފަށައިގެން ބަދަލުތައް ގެންނާނެކަން، އެއާޕޯޓް ހިންގާ ކުންފުނި އެމްއޭސީއެލްއިން ބުނެފިއެވެ.

އެމްއޭސީއެލް ބުދަ ދުވަހު އާއްމުކުރި ޓްރެފިކް ޗާޓްގައިވާ ގޮތުން ބުދަ ދުވަހުގެ ރޭ 12:00 އިން ފެށިގެން ވީއައިއޭގެ ޓްރެފިކް ފްލޯއަށް އަަންނާނެ އެންމެ ބޮޑު ބަދަލަކީ ވެހިކަލްތައް ވަންނަ މަގު ބަދަލުވުމެވެ.

އެ ގަޑިން ފެށިގެން އެއާޕޯޓަށް ވެހިކަލްތައް ވަދެ ނުކުންނަން އެއް މަގު ބޭނުންކުރުމުގެ ބަދަލުގައި ހުރިހާ ވެހިކަލެއް ވެސް ދެން އެއާޕޯޓަށް ވަންނަން ބޭނުންކުރަން ޖެހޭނީ ކަނޑުތޮށި ކައިރީ އޮންނަ އެންމެ ބޭރު މަގެވެ.

އެ ކުންފުނިން ނެރުނު އިއުލާނުގައި ބުނީ އެއާޕޯޓުގެ ދެ ޓާމިނަލަށް މީހުން ގޮވައިގެން ވަންނަ ވެހިކަލްތައް އެއާޕޯޓުން ނިކުންނާނީ އައު ޓާމިނަލް ކުރިމަތީގައި އޮންނަ މަގުން ކަމަށެވެ. އަދި ބޭރު މަގުން ވަންނަ އުޅަނދުތަކުގެ ތެރެއިން އެއާޕޯޓުން ނުކުންނަން ބޭނުންވާ ވެހިކަލްތައް ބޭނުންކުރާނީ ޕާކިން ސަރަހައްދުގެ ކުރިމައްޗަށް އޮންނަ މަގުގެ ކަނާތްފަޅި ކަމަށް ވެސް އެމްއޭސީއެލުން ބުނެފައި ވެއެވެ.

މި އަހަރުގެ ޖުލައި މަހުގެ 26 ވަނަ ދުވަހު އެތަށް މިލިއަން ރުފިޔާއެއް ޚަރަދު ކޮށްގެން އެއާޕޯޓުގެ އާ ޓާމިނަލް ހުޅުވައިފައިވާއިރު، އޭގެ ކުރިންނާއި ފަހުން ވެސް އެއާޕޯޓުގެ ޓްރެފިކަށް ގިނަ ބަދަލުތަކެއް ވަނީ ގެނެސްފަވެއެވެ.

މި ބަދަލުތަކާއި އެކު ބައެއް ފަހަރު ޓެކްސީ ކިޔޫގައި ގިނަ ވަގުތުތަކެއް ހޭދަ ކުރަން ޖެހޭކަމުގެ ކަންބޮޑުވުން އެއާޕޯޓު ބޭނުންކުރާ ފަރާތްތަކުން ވަނީ ފާޅުކޮށްފަ އެވެ. މީގެ އިތުރުން އާ ޓާމިނަލް ހުޅުވުމުގެ ތައްޔާރީތަކަށް، އެ ޓާމިނަލް ކުރިމަތީ އޮންނަ ބޮޑު ޕާކިން ޒޯން ބަންދުކުރި މައްސަލައިގައި ވެސް ގިނަ ބަޔަކު ކަންބޮޑުވުން ފާޅުކުރިއެވެ.

އާ ޓާމިނަލް ކުރިމަތީގައި އޮތް އެ ޕާކިން ޒޯން ބަންދުކުރީ ސަލާމަތީ ސަބަބުތަކާ ހެދި ކަމަށް އެއާޕޯޓް ކޮމްޕެނީން ބުނި ނަމަވެސް، އެ ނިންމުމަށް ދެ މަސްވި ފަހުން، އެ ސަރަހައްދުގައި ޕާކް ކުރުމުގެ ހުއްދަ މިހާރު ވަނީ ދީފަ އެވެ.