ޣައްޒާގެ 6 ގެއަކަށް އިޒްރޭލުން ބޮންއަޅާ މަދުވެގެން 45 މީހުން ޝަހީދު ކޮށްލައިިފި

ޣައްޒާގެ އެކި ސަރަހައްދުތަކަށް ބޮން އަޅަމުންދާ ސިލްސިލާގެ ދަށުން އާދިއްތަ ވިލޭރޭ އިޒްރޭލުގެ ބާރުތަކުން ޣައްޒާގެ އުތުރުގައިވާ ބައިތުލް ލަހިޔާގައި 6 ޢިމާރާތަކަށް ބޮން އަޅާ، މަދުވެގެން 45 މީހުން ޝަހީދުކޮށްލާފައިވާ ކަމަށް ވަފާ ނިއުސް އެޖެންސީން ބުނެފައިވެއެވެ. އިޒްރޭލުގެ މި ހަމަލާތަކުގައި މަރުވި މީހުންގެ ތެރޭގައި އަންހެނުންނާއި ކުޑަކުދިން ހިމެނެއެވެ.

އާދިއްތަ ވިލޭރޭގެ ކުރީކޮޅު، އިޒްރޭލުގެ އެހެން ވައިގެ ހަމަލާއެއް ޣައްޒާ ސިޓީގެ ހުޅަނގު ފަރާތުގައި ހުރި ސަލާހުއްދީން ސްކޫލަށް އަމާޒުވިއެވެ. މި ސްކޫލަކީ ގެދޮރު ގެއްލިފައިވާ މީހުންގެ ހިޔާވައްސެއްގެ ގޮތުގައިވެސް ބޭނުންކުރެވެމުން އައި ތަނެކެވެ. މި ހަމަލާގައި އެކަކު މަރުވެ، އިތުރު މީހުން ޒަޚަމްވިއެވެ. 

މީގެ އިތުރުން، އިޒްރޭލު ސިފައިން އާޓިލަރީ ބޭނުންކޮށްގެންނާއި ވައިގެ މަގުން ދެކުނު ޣައްޒާގެ ރަފަހްގެ އެކި ސަރަހައްދުތަކަށް ހަމަލާތައް ވަނީ ދީފައެވެ. އެއާއެކު އިޒްރޭލު ސިފައިން އެއްގަމު މަގުން އަލް-ބުރައިޖް އަދި އަލް-ނުސައިރާތު ރެފިއުޖީ ކޭމްޕުތަކާ ކައިރި އުތުރު ސަރަހައްދުތަކަށް ވެސް ހަމަލާދީފައިވެއެވެ. 

އޮކްޓޯބަރު 5 އިން ފެށިގެން، އިޒްރޭލުގެ ބާރުތަކުން އުތުރު ޣައްޒާގެ އެކި ސަރަހައްދުތަކަށް އެއްގަމު މަގުން ދޭ ހަމަލާތަކާއި ވައިގެ މަގުން ބޮން އެޅުން އެތައް ގުނައެއް ވަނީ މައްޗަށް ޖައްސާފައެވެ. މީގެ މަޤްޞަދަކީ އެ ސަރަހައްދުތަކުގެ ރައްޔިތުން ސަރަހައްދު ދޫކޮށް ދިއުން މަޖުބޫރު ކުރުވުން ކަމަށް ރިޕޯޓްތައް ބުނެއެވެ. 

އިޒްރޭލުގެ ހަމަލާތައް ނުރައްކާވެ، ހަމަލާތައް އިތުރުކޮށްފައިވުމުގެ ސަބަބުން އިމާރާތްތަކުގެ ދަށުވެފައިވާ ކަމަށް ބެލޭ އެތައް ހާސް ފަލަސްތީނު ރައްޔިތުން ހޯދުމުގެ މަސައްކަތް ކުރިއަށް ގެންދެވޭ ގޮތް ނުވާ ކަމަށް އިމަރޖެންސީ އަދި ސިވިލް ޑިފެންސް ޓީމުތަކުން ވަނީ ބުނެފައެވެ.                 

އިޒްރޭލުގެ ސިފައިން ފަލަސްތީނުގެ އާބާދީން ކޮންމެ ދުވަހަކު އެތައް ބަޔަކު މަރަމުންދާ މައްސަލައިގައި ކަންބޮޑުވުން ފާޅުކޮށް އެމެރިކަން އިސްލާމިކް ރިލޭޝަންސް ކައުންސިލް (ކެއަރ) އިން ޣައްޒާގެ "މުޅި އާބާދީ ރޭވުމެއްގެ ދަށުން މުޅިން ނައްތާލުން" ހުއްޓުވުމަށް ގޮވާލާފައިވެއެވެ. ކެއަރ އިން މިހެން ގޮވާލިއިރު، ޣައްޒާގައި ޔަހޫދީ ސިފައިން ހިންގަމުންދާ އުދުވާންތަކަށް ހަތިޔާރުގެ ގޮތުންނާއި އެހެނިހެން ގޮތްގޮތުން އެންމެ ބޮޑަށް ވާގިވެރިވެ އެންމެ ގާތުން އިޒްރޭލުގެ ދިފާއުގައި މަސައްކަތް ކުރާ ގައުމަކީ އެމެރިކާއެވެ.

"ޣައްޒާގެ މުޅި އާބާދީ ވަނީ އެންމެންގެ ލޯތަކުގެ ކުރިމަތީގައި އިޢުލާނުކުރެވި ތަންފީޒުކުރެވެމުންދާ ނަސްލު ނައްތާލުމުގެ ރޭވުމުގެ ދަށުން މަރުވުމުގެ ނުރައްކަލުގައި" ކަމަށް ފަލަސްތީނުން ހިސޯރުކޮށްފައިވާ ބިންތަކާބެހޭ އދ. ގެ ޚާއްސަ މަންދޫބު ފްރަންޗެސްކާ އަލްބަނީސް ވަނީ ވިދާޅުވެފައެވެ.

ޣައްޒާގައި 2023 ވަނަ އަހަރުގެ އޮކްޓޯބަރު 7 އިން ފެށިގެން އިޒްރޭލުގެ ހަމަލާތަކުގައި މަދުވެގެން 42،847 މީހުން މަރުވެ، 100،544 މީހުން ޒަޚަމްވެފައިވެއެވެ.