ސްޕެނިޝް ލީގުގައި ވާދަވެރި ބާސެލޯނާއާ ދެކޮޅަށް ކުޅުނު މެޗުން ބަލިވި ނަމަވެސް، އެއްވެސް ކަމެއްގައި "ހިތާމަ" ކުރުމެއް ނެތް ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ބާސެލޯނާއާ ދެކޮޅަށް ކުޅުނު މެޗުން އެ ޓީމު ބަލިވީ 4-0 އިންނެވެ. މެޗު ފަށައިގެން ރަނގަޅަށް ކުޅެމުން ގޮސް، ރެއާލް އިން ލަނޑެއް ޖެހި ނަމަވެސް، ވީޑިއޯ އެސިސްޓެންޓު ރެފްރީ (ވީއޭއާރު) ބެލުމަށްފަހު ރެފްރީ ވަނީ އެ ލަނޑު ބަލައި ނުގަންނަން ވެސް ނިންމައިފަ އެވެ. އޭގެ ފަހުން ދެ ވަނަ ހާފުގައި ޖެހި ލަނޑުތަކުން ބާސެލޯނާ ވަނީ މޮޅުވެފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުން އަންޗެލޮޓީ ބުނީ އެ މެޗުގައި އޭނާ ގެން ގުޅުން ގޭމް ޕްލޭނާ މެދު "ހިތާމަ" ކުރުމެއް ނެތް ކަމަށެވެ. މެޗުގެ ފުރަތަމަ ހާފުގައި ރެއާލްގެ ފަރާތުން ރަނގަޅު ކުޅުމެއް ފެނުނުކަން ފާހަގަ ކުރަމުން އަންޗެލޮޓީ ބުނީ، ފުޓުބޯޅައިގައި ކޯޗިން ގައި އޭނާ މަސައްކަތް ކުރަމުން އަންނަތާ 48 އަހަރުވެފައިވާއިރު، އޭނާ އެހެން ބުނުމަކުން ދޮގަކަށް ނުވާނެ ކަމަށެވެ.

މީގެ ކުރިން ޔުއެފާ ޗެމްޕިއަންސް ލީގުގައި ލީލް އަތުން ވީ ބައްޔަށް އިޝާރާތް ކުރަމުން އަންޗެލޮޓީ ބުނީ، އެ މެޗުން ވީ ބައްޔާއި، ބާސެލޯނާ އަތުން ވީ ބައްޔާ ވަރަށް ބޮޑަށް ތަފާތު ކަމަށެވެ. ލީލް މެޗުގައި ރެއާލަށް ރަނގަޅަށް ނުކުޅެވޭ ކަމަށާއި، އެ މެޗުން ބަލިވީ ނުކުޅެވިގެން ކަމަށް ވެސް އޭނާ ބުންޏެވެ. އެހެން ނަމަވެސް ބާސެލޯނާއާ ދެކޮޅަށް ރެއާލް އިން ރަނގަޅަށް ކުޅެ، ރަނގަޅު ވާދައެއް ކުރި ކަމަށް ވެސް އަންޗެލޮޓީ ބުންޏެވެ.

މީގެ އިތުރުން އަންޗެލޮޓީ ބުނީ ބާސެލޯނާ އަތުން ވީ ބައްޔާ އެކު ވެސް، ރެއާލް އިން ގިނަ ކަންކަން ދަސް ކުރަން ޖެހޭ ކަމަށެވެ. އެކަންކަމުން ފިލާވަޅު ލިބިގަނެގެން ރެއާލް ކުރިއަށް ދާން ޖެހޭ ކަމަށާއި، އެއްވެސް ކަމެއް ދޫކޮށްލެވެން ނެތް ކަމަށް ވެސް އޭނާ ވަނީ ބުނެފަ އެވެ. ބާސެލޯނާ އަތުން ބަލިވި މެޗަށް އިޝާރާތް ކުރަމުން އޭނާ ބުނީ އަދިވެސް ރެއާލް އިން ހުއްޓާނުލައި ގަދައަޅާ މަސައްކަތް ކުރާނެ ކަމަށެވެ. އަދި އޭނާ ބުނީ އެންމެ ފަހުން ބާސެލޯނާ އަތުން 4-0 އިން ބަލިވި އަހަރު ވެސް ރެއާލް އިން ސްޕެނިޝް ލީގު އަދި ޔުއެފާ ޗެމްޕިއަންސް ލީގު ކާމިޔާބު ކޮށްފައިވާނެ ކަމަށެވެ.

ބާސެލޯނާއާ ދެކޮޅަށް ކުޅުނު މެޗުން ބަލި ނުވެ ފަރުޖައްސާލައިގެން، ރެއާލަށް ރެކޯޑެއް ޤާއިމު ކުރުމުގެ ފުރުސަތު ވެސް އޮތެވެ. އެއީ ލީގުގައި ބަލި ނުވެ ބާސެލޯނާ އިން ހަމަކޮށްފައިވާ 43 މެޗުގެ ރެކޯޑެވެ. ބާސެލޯނާއާ ދެކޮޅަށް ކުޅުނު މެޗަކީ ލީގުގައި ބަލި ނުވެ ރެއާލް ކުޅުނު 43 ވަނަ މެޗެވެ. ނަމަވެސް އެ މެޗުން ރެއާލް ވަނީ ބަލިވެފަ އެވެ.