މިހާރު ކުރިއަށްދާ 20 އަހަރުން ދަށުގެ އޭޝިއަން ކަޕް ކޮލިފައިންގައި ރާއްޖޭގެ ޒުވާން ފުޓުބޯޅަ ޓީމު ކޮޅަށް ސައުދީ އަރަބިއްޔާ އިން 11 ލަނޑު ޖަހައިފިއެވެ.

މިއީ ކޮލިފައިންގައި ރާއްޖެއިން ކުޅުނު ދެވަނަ މެޗެވެ. ފުރަތަމަ މެޗުގައި ވާދަކޮށްފައިވަނީ އުޒްބެކިސްތާނާއެވެ. އެ މެޗުން ރާއްޖެ ބަލިވީ 7-0 އިންނެވެ. ސައުދީއާ ދެކޮޅަށް ކުޅުނު މެޗުގައި އެ ޓީމުން ވަނީ ފުރަތަމަ ހާފުގައި ހަ ގޯލު ޖަހާފައެވެ. އަނެއް ފަސް ގޯލު ޖެހީ ދެ ވަނަ ހާފުގައެވެ.

މެޗުގައި ސައުދީގެ ގޯލުތައް ޖެހީ، ޢަބްދުﷲ ހާދީ ރަދީފް، މެޝާރީ ފަހާ އަލްނެމޭރު، ޢަބްދުލް އަޒީޒް ސައުދު، ޔާސިން އަތިއާ އަލްޒުބައިދީ، ޔަޒީދް ޔަހުޔާ އަދި ސާލިހު އަޙުމަދު އަލްރަޙުމާނީއެވެ. މީގެ ތެރެއިން ހާދީ ރަދީފް އާއި މެޝާރީ ފަހާ ވަނީ ކޮންމެ ކުޅުންތެރިޔަކު ތިން ލަނޑު ޖަހައި، ހެޓްރިކް ހަދާފައެވެ. އަދި ސައުދީގެ ޔަޒީދު ވަނީ ދެ ލަނޑު ޖަހާފައެވެ.

ރާއްޖެ ހިމެނޭ ގްރޫޕްގައި ދެން ހިމެނޭ އުޒްބެކިސްތާނުން ވަނީ 0-3 އިން މިޔަންމާ ބަލިކޮށްފައެވެ. ކުޅުނު ދެ މެޗުން މޮޅުވެ ލިބުނު ހަ ޕޮއިންޓާއެކު މި ގްރޫޕްގެ އެއް ވަނަ މަގާމުގައި އޮތީ އުޒްބެކިސްތާންއެވެ.

ކޮލިފައިންގައި ރާއްޖެއަށް ދެން އޮތީ ބުދަ ދުވަހުގެ ރޭ ޗައިނާއާ ދެކޮޅަށް ކުޅޭ މެޗެވެ.