ލުބުނާންގެ ދެކުނުގައި ނޫސްވެރިން ތިބި އިމާރާތްތަކަކަށް އިޒްރޭލުން ދިން ހަމަލާއެއްގައި މަދުވެގެން 3 މީޑިއާ އޮފިޝަލުން މަރުވެއްޖެއެވެ. 

ހުކުރު ދުވަހުގެ ފަތިހު ލުބުނާންގެ ދެކުނުގައިވާ ހަސްބާޔާގައި ހުރި އިމާރާތްތަކަށް އިޒްރޭލުން ދިން ހަމަލާ އަމާޒުވީ އެތަނުގައި ތިބި 6 މީޑިއާ އަކަށް ނިސްބަތްވާ 18 ނޫސްވެރިންނަށެވެ. މީގެ ތެރޭގައި ސްކައި ނިއުސް، އަލްޖަޒީރާ އަދި ލުބުނާންގެ ބްރޯޑްކާސްޓަރުން ހިމެނެއެވެ. 

މި ހަމަލާގައި މަރުވި 3 މީހުންގެ ތެރޭގައި އަލްމަޔާދީން ޓެލެވިޜަން ނެޓްވަރކްގެ ކެމެރާމަނަކާއި އިންޖިނޭރަކު، އަދި އަލްމަނާރުގެ ކެމެރާމަނެއް ހިމެނޭކަމަށް ލުބުނާންގެ މީޑިއާ ރިޕޯޓްތަކުގައި ބުނެފައިވެއެވެ. 

ހަސްބާޔާ ޓައުނަށް ފުރަތަމަ ދިން ހަމަލާގައި ވެސް ނޫސްވެރިންތަކެއް ވަނީ ޒަޚަމްވެފައެވެ. 

"އިޒްރޭލުގެ އަދުއްވުން ނޫސްވެރިން ރޭގަނޑުގެ ބްރޭކަށް އަންނަންދެން މަޑުކޮށްގެން ތިބެ، ހީލަތްތެރިކަމުގެ ތެރެއިން ރޭގަނޑު ހަމަލާ ދިނުމަށް ބޭނުން ކުރީ،" ލުބުނާންގެ އިންފޮމޭޝަން މިނިސްޓަރު ޒިޔާދު މަކާރީ އެކްސްގައި ޕޯސްޓް ކުރެއްވި ލިޔުމެއްގައި ވިދާޅުވިއެވެ. "މިއީ ޤަޞްދުގައި މެރުން. އެތަނުގައި 7 މީޑިއާ އެއް ތަމްސީލުކުރާ 18 ނޫސްވެރިން ތިބިކަން އެނގިހުރެ، ރާވާއިގެން ހަމަލާ ދިނީ. މިއީ ހަނގުރާމައިގެ ޖަރީމާއެއް." އޭނާ އިތުރަށް ވިދާޅުވިއެވެ. 

މިދިޔަ އަހަރު އިޒްރޭލާއި ލުބުނާންގެ ހިޒްބުﷲ އާ ދެމެދު ހަމަނުޖެހުން ފެށުނީއްސުރެ މީޑިއާއަށް އެންމެ ނުރައްކާތެރި ދުވަހަކަށް މިވީ ހުކުރު ދުވަހެވެ. 

މި ހަނގުރާމައިގައި ކުރިން އިޒްރޭލުން ލުބުނާނަށް ދިން ހަމަލާތަކުގައި ރޮއިޓަރޒްގެ ފޮޓޯގްރާފަރެއް ހިމެނޭ ގޮތަށް 5 ނޫސްވެރިން މަރުވެފައިވެއެވެ.

ލުބުނާންގެ އަލްމަޔާދީން ޓީވީ އަށް އިޒްރޭލުން ތަކުރާރުކޮށް ހަމަލާ ދީފައިވެއެވެ. 

އެންމެ ފަހުން މިދިޔަ ބުދަ ދުވަހު، އިޒްރޭލުން ބެއިރޫތުގެ ދެކުނު ސަރަޙައްދުގައި ހުރި އަލްމަޔާދީންގެ އޮފީހަކަށް ވަނީ ހަމަލާ ދީފައެވެ. 

ލުބުނާނުގެ ހެލްތު މިނިސްޓްރީން ބުނާ ގޮތުގައި އެ ހަމަލާގައި އެކަކު މަރުވެ، ކުޑަކުއްޖަކު ހިމެނޭ ގޮތަށް 5 މީހުން ޒަޚަމްވިއެވެ.

މިދިޔަ ނޮވެމްބަރު މަހު، އިޒްރޭލުގެ ސިފައިން ދެކުނު ލުބުނާންގައި އަލްމަޔާދީންގެ ކްރޫއަކަށް ހަމަލާދީ 2 ނޫސްވެރިން މަރާލިއެވެ. 

މިދިޔަ ސެޕްޓެމްބަރު މަހުގެ ފަހުކޮޅުން ފެށިގެން، އިޒްރޭލުން ހިޒްބުﷲ އަށް ދޭ ހަމަލާތައް އިތުރުކޮށް، އެ ޖަމާޢަތުގެ ލީޑަރު ޙަސަން ނަޞްރުﷲ އާއި އިސް ފަރާތްތަކެއް ވަނީ އަވަހާރަކޮށްލާފައެވެ. 

ލުބުނާނުގެ ހެލްތު މިނިސްޓްރީގެ މަޢުލޫމާތު ދައްކާ ގޮތުގައި މިދިޔަ އަހަރު ހަމަނުޖެހުން ފެށުނީއްސުރެ އިޒްރޭލުގެ ހަމަލާތަކުގައި މަދުވެގެން 2,593 މީހުން މަރުވެ، 12,119 މީހުން ޒަޚަމްވެފައިވެއެވެ.